អគ្គនាយកដ្ឋានរដ្ឋបាល នៃក្រសួងមហាផ្ទៃ សហការជាមួយរដ្ឋបាលខេត្តសៀមរាប រៀបចំកិច្ចប្រជុំបូកសរុបលទ្ធផលការងារប្រចាំឆ្នាំ២០២១ និងលើកទិសដៅសកម្មភាពឆ្នាំ២០២២ របស់អង្គភាពច្រកចេញចូលតែមួយរាជធានី-ខេត្ត នៅសាលប្រជុំសាលាខេត្តសៀមរាប នាព្រឹកថ្ងៃទី១៧ ខែធ្នូ ឆ្នាំ២០២១ ក្រោមអធិបតីភាពឯកឧត្តម ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ និងឯកឧត្តម ទៀ សីហា អភិបាលខេត្តសៀមរាប ដោយមានការអញ្ជើញចូលរួមពីសំណាក់លោក លោកស្រី ជាអគ្គនាយករងនៃអគ្គនាយកដ្ឋានរដ្ឋបាល ក្រសួងមហាផ្ទៃ , នាយករដ្ឋបាលសាលារាជធានី-ខេត្ត និងប្រធានអង្គភាពច្រកចេញចូលតែមួយរាជធានី-ខេត្តទូទាំងប្រទេស សរុបប្រមាណជាង៥០រូប ។
ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា តាមរយៈនៃអង្គភាពច្រកចេញចូលតែមួយរបស់ខេត្ត និងការិយាល័យច្រកចេញចូលតែមួយ នៅតាមបណ្តាក្រុងនិងស្រុក មន្ត្រីជំនាញបានយកចិត្តទុកក្នុងការបំពេញភារកិច្ចតាមតួនាទីរបស់ខ្លួនដោយការទទួលការខុសត្រូវខ្ពស់ ក្នុងនោះការបម្រើសេវាសាធារណៈ ជូនដល់ប្រជាពលរដ្ឋបានដំណើរការយ៉ាងប្រសើរ ដែលមកទល់ពេលនេះមិនទាន់មានបញ្ហាអ្វីដែលបានកើតឡើងគួរឲ្យកត់ឡើយ ប៉ុន្តែអ្វីដែលជាការលំបាកនោះ ក្នុងរយៈពេលប្រមាណឆ្នាំមកនេះ គឺស្ថានភាពនៃការឆ្លងរាលដាលជាសកលជំងឺកូវីដ-១៩ ខណៈតំបន់មួយចំនួនត្រូវបិទខ្ទប់ ក្នុងរយៈពេលយូរថ្ងៃ។
ឯកឧត្តម មានប្រសាសន៍ទៀតថា ដោយបានការយកចិត្តទុកដាក់ខ្ពស់របស់សម្ដេចតេជោ ហ៊ុន សែន ប្រមុខរាជរដ្ឋាភិបាលនៃកម្ពុជា បានសាងសង់ផ្លូវចំនួន៣៨ខ្សែក្នុងក្រុងសៀមរាប ដោយត្រូវរួចរាល់ជាស្ថាពរនៅចុងខែធ្នូនេះ រួមនឹងយុទ្ធសាស្ត្រនៃការចាក់សាំងការពារជំងឺកូវីដ-១៩ ជាពិសេសសម្ដេចបានប្រកាសបើកដំណើរការប្រទេសពេញលេញវិញផងដែរនេះ ធ្វើឲ្យប្រជាពលរដ្ឋមានឱកាសក្នុងការប្រកបមុខរកស៊ីប្រចាំថ្ងៃជាប្រក្រតីឡើងវិញ ហេតុនេះ ការស្វែងរកតម្រូវរបស់ពួកគាត់កាន់តែមានការកើនឡើង ដូច្នេះកិច្ចប្រជុំបូកសរុបលទ្ធផលការងារប្រចាំឆ្នាំ២០២១ និងលើកទិសដៅសកម្មភាពការងារ ឆ្នាំ២០២២ របស់អង្គភាពច្រកចេញចូលតែមួយ រាជធានី-ខេត្តនាពេលនេះ ពិតជាមានសារៈសំខាន់ខ្លាំងណាស់សម្រាប់យើងទាំងអស់គ្នា ដែលត្រូវរួមគ្នាដោះស្រាយនូវបញ្ហាប្រឈម ការលំបាក និង តម្រូវការជូនពួកគាត់ឲ្យកាន់តែមានប្រសិទ្ធភាព។
ឯកឧត្តម ប្រាក់ សំអឿន បានមានប្រសាសន៍ថា គោលបំណងសំខាន់នៃកិច្ចប្រជុំនេះ គឺដើម្បីបង្ហាញលទ្ធផលនៃការអនុវត្តការងារទាំងនៅថ្នាក់ជាតិ និងថ្នាក់ក្រោមជាតិពាក់ព័ន្ធនឹងការគាំទ្រ និងការផ្តល់សេវារដ្ឋបាលនៅរដ្ឋបាលថ្នាក់ក្រោមជាតិក្នុងរយៈពេល១១ខែឆ្នាំ២០២១ , ចែករំលែកបទពិសោធន៍នៃការអនុវត្តការងារ ព្រមទាំងវិធីសាស្រ្តនៃការដោះស្រាយបញ្ហាប្រឈមមួយចំនួនរបស់អង្គភាពច្រកចេញចូលតែមួយ , ជជែកពិភាក្សា និងស្វែងរកដំណោះស្រាយលើបញ្ហាប្រឈមជារួមលើការផ្តល់សេវារដ្ឋបាល និង លើកទិសដៅសកម្មភាពការងារសំខាន់ៗទាំងនៅកម្រិតថ្នាក់ជាតិ និងថ្នាក់ក្រោមជាតិសម្រាប់តម្រង់ទិសយកទៅអនុវត្តក្នុងឆ្នាំ២០២២ ។
ឯកឧត្តមអគ្គនាយក មានប្រសាសន៍បន្ថែមថា ដូចយើងបានដឹងហើយថា ការបង្កើតឲ្យមានអង្គភាពច្រកចេញចូលតែមួយនេះ គឺជាការផ្ទេរមុខងារទៅថ្នាក់ក្រោមជាតិ ដើម្បីបង្ខិតសេវាឲ្យកៀកនឹងប្រជាពលរដ្ឋតាមតម្រូវការរបស់ពួកគាត់ ប៉ុន្តែរយៈកាលកន្លងមកនេះ មានបញ្ហាប្រឈមលើវិស័យចំនួន៣ ដែលធ្វើឲ្យមានការស្មុគស្មាញ និង យឺតយ៉ាវ ហើយគួបផ្សំនឹងស្ថានភាពនៃការឆ្លងរាលដាលជាសកលជំងឺកូវីដ-១៩ ដែលបានធ្វើឲ្យតំបន់មួយចំនួនត្រូវបិទខ្ទប់ផងនេះ ការបម្រើសេវាសាធារណៈជូនដល់ប្រជាពលរដ្ឋត្រូវជួបប្រទះនូវការលំបាក ប៉ុន្តែយើងបានព្យាយាមធ្វើការពិភាក្សាសម្របសម្រួល និង ដោះស្រាយបានជាបណ្ដើរៗហើយដែរ។
ឯកឧត្តម ប្រាក់ សំអឿន មានប្រសាសន៍បន្ថែមទៀតថា ក្រោមការដឹកនាំប្រកបដោយភាពឈ្លាសវៃ និង ប៉ិនប្រសប់របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាពិសេសយុទ្ធសាស្ត្រនៃការចាក់សាំងការពារជំងឺកូវីដ-១៩ ដែលមកទល់ពេលនេះមានប្រជាពលរដ្ឋប្រមាណជិត៩០ភាគរយ នៃប្រជាជនសរុបទទួលបានការចាក់សាំងពេញលេញ ហើយត្រូវបានសម្ដេចប្រកាសបើកដំណើរការប្រទេសពេញលេញវិញផងដែរ ហេតុនេះ ការបម្រើសេវាសាធារណៈជូនដល់ប្រជាពលរដ្ឋ ក៏នឹងមានដំណើរការជាប្រក្រតីវិញដែរ ដូច្នេះក្នុងឱកាសនេះ សូមឲ្យគ្រប់ភាគីទាំងអស់ ត្រូវយកចិត្តដាក់ក្នុងការពិភាក្សាគ្នាឲ្យបានគ្រប់ជ្រុងជ្រោយ រួមគ្នាដោះស្រាយនូវបញ្ហាប្រឈមឲ្យកាន់តែមានប្រសិទ្ធភាព ដើម្បីបម្រើសេវាសាធារណៈជូនដល់ប្រជាពលរដ្ឋ ឲ្យកាន់តែមានប្រសើរឡើង៕
អទ្ថបទ ៖ លោក លីវ សាន្ត
រូបថត ៖ លោក អ៊ុន ណារាជ្យ
