មានប្រសាសន៍នៅក្នុងពិធីផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី២៩ នៅវត្តសិលាចារ្យ ក្នុងស្រុកបន្ទាយស្រី កាលពីព្រឹកថ្ងៃទី២៥ ខែមីនា ឆ្នាំ២០២២នេះ លោក វណ្ណ ប៊ុនណា ប្រធានមន្ទីរធម្មការនិងសាសនាខេត្ត បានបញ្ជាក់ថា រយៈកាលកន្លងមក មានតែភិក្ខុ-សាមណេរមួយចំនួនតូច បាននិមន្តបិណ្ឌបាត្រទៅកាន់ទីផ្សារ ឬទីកន្លែងមិនសមរម្យ ហើយការរៃអង្គាសបច្ច័យនេះ វាស្ទើរតែក្លាយជាសកម្មភាពដើរសុំទានទៅហើយ ដូច្នេះក្នុងឱកាសនេះ សូមស្នើដល់ព្រះចៅអធិការគ្រប់វត្ត អាជ្ញាធរមូលដ្ឋាន និងកម្លាំងនគរបាលប៉ុស្តិ៍រដ្ឋបាលតាមបណ្ដាឃុំសង្កាត់ រួមគ្នាចូលរួមទប់ស្កាត់នៃការនិមន្តបិណ្ឌបាត្រ និងការឃោសនារៃអង្គាស ដែលសកម្មភាពនេះបង្ហាញឱ្យឃើញនូវការធ្លាក់ចុះនៃតម្លៃព្រះពុទ្ឋសាសនា និងប៉ះពាល់ទៅដល់ជំនឿរបស់ប្រជាពុទ្ឋបរិស័ទ ព្រមទាំងទទួលរងនូវការរិះគន់ពីមជ្ឈដ្ឋានជាច្រើនផងដែរ ។
លោក វណ្ណ ប៊ុនណា បញ្ជាក់ទៀតថា៖ន័យនេះមិនមែនហាមប្រាមភិក្ខុ សង្ឃ មិនឱ្យនិមន្តបិណ្ឌបាត្រទេ ការនិមន្តបិណ្ឌបាត្រជាកិច្ចមួយនៅក្នុងចំណោមពុទ្ឋកិច្ចទាំងបួន ដែលព្រះសម្មាសម្ពុទ្ឋទ្រង់បញ្ញត្តឱ្យភិក្ខុសង្ឃត្រូវតែបំពេញ ហេតុនេះសូមកម្លាំងសមត្ថកិច្ចនគរបាលប៉ុស្តិ៍រដ្ឋបាលតាមមូលដ្ឋាន ជួយពិនិត្យសួរនាំឯកសារលិខិតស្នាមពីសង្ឃអង្គនោះ ឱ្យបានច្បាស់លាស់ ទាំងការឃោសនារៃអង្គាស និងការនិមន្តគោចរបិណ្ឌបាត្រតាមទីមិនសមគួរ ដើម្បីរក្សានូវតម្លៃព្រះពុទ្ឋសាសនារបស់យើង បើពិនិត្យឃើញថាក្លែងក្លាយ ត្រូវឃាត់ខ្លួន រួចកសាងសំណុំរឿងចោទពីបទប្រើប្រាស់ឯកសណ្ឋាន និងឯកសារខុស ។
ក្នុងឱកាសនោះដែរ លោកប្រធានមន្ទីរធម្មការនិងសាសនាខេត្ត បានស្នើដល់អាជ្ញាធរគ្រប់លំដាប់ថ្នាក់ ព្រះចៅអធិការ និងឧបជ្ឈាជាអ្នកបំបួស ចូលរួមទប់ស្កាត់ជនខិលខូច ឬមានសីលធម៌ ចរិយា អាកប្បកិរិយាមិនសមរម្យ ហើយចង់បួស ត្រូវពិនិត្យលិខិតបញ្ចាក់កាយសម្បទានិងកិរិយាមារយាទ និងឯកសារពាក់ព័ន្ឋ ពីមូលដ្ឋាននៃបុគ្គលដែលចង់បួសជាមុន ព្រោះថា កុលបុត្រដែលអាចបួសបាន លុះណាមានបដិញ្ញាណបញ្ជាក់ពីកិរិយាមារយាទ មិនមែនជាជនខិលខូចនៃបុគ្គលចង់បួសរបស់មេឃុំឬចៅសង្កាត់ និងទទួលការអនុញ្ញាតិពីអាជ្ញាធរស្រុកសិន ទើបអាចសាងភ្នួសបាន ។
សូមបញ្ជាក់ថា ៖ ពិធីផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី២៩ ត្រូវបានរៀបចំឡើងដោយសាលាអនុគណស្រុកបន្ទាយស្រី និងស្រុកអង្គរធំ មានការនិមន្ត និងអញ្ជើញចូលរួមពីសំណាក់ថ្នាក់ដឹកនាំស្រុកបន្ទាយស្រីស្រុកអង្គរធំ មន្ត្រីសង្ឃសាលាគណខេត្ត ស្ថាប័នពាក់ព័ន្ធជុំវិញស្រុក លោក លោកស្រីមេឃុំ ក្នុងស្រុក២ ព្រមទាំងព្រះចៅអធិការវត្ត អាចារ្យ គណៈកម្មការគ្រប់វត្តទូទាំងស្រុក សរុបប្រមាណ២៥០ អង្គ/ នាក់ ៕
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
