ប្រជាពលរដ្ឋរស់នៅឃុំស្រិត ឃុំកន្ទ្រាំង ស្រុកប្រាសាទបាគង ពួកគាត់បានសម្ដែងមោទនភាព និងសប្បាយរីករាយពីការរីកចំរើនលើវិស័យ នៅក្នុងមូលដ្ឋានរបស់ខ្លួនពួកគាត់ ទាំងហេដ្ឋារចនាសម្ព័ន្ធ វិស័យអប់រំ សេវាសាធារណៈ មន្ទីរពេទ្យ ហេដ្ឋារចនាសម្ព័ន្ធផ្លូវថ្នល់ជាដើម ជាពិសេសវិស័យកសិកម្មមានទីផ្សារល្អ។ ពួកគាត់បន្ដថា នាពេលបច្ចុបប្បន្ននេះក្នុងមូលដ្ឋានរបស់ពួកគាត់មានប្រជាពលរដ្ឋប្រមាណ ៥០ភាគរយ ធ្វើកសិកម្ម ជាពិសេសការដាំបន្លែ បន្ទាប់ពីបញ្ចប់រដូវកាលច្រូតកាត់ស្រូវវស្សា។ ជាមួយគ្នានោះ ការបោះបង់ការសិក្សារបស់សិស្ស ត្រូវបានកាត់បន្ថយ ដោយសារមានការបង្កើតសាលារៀនបន្ថែមទៀត នៅក្បែផ្ទះសិស្សានុសិស្ស។ ការរីចំរើនលើវិស័យទាំងអស់នេះ បានបង្ហាញថា រាជរដ្ឋាភិបាលបានយកចិត្ដទុកដាក់ដល់ការរស់នៅប្រជាពលរដ្ឋ ហើយពួកគាត់ស្នើឱ្យការយកចិត្ដទុកដាក់ដល់ប្រជាពលរដ្ឋនៅអាណត្ដិក្រោយបន្ថែមទៀត។
បើតាមលោក ឃាម ឆាង មេឃុំកន្ទ្រាំង ស្រុកប្រាសាទបាគង បានបញ្ជាក់ថា ក្នុងរយៈពេល ៥ឆ្នាំកន្លងមកនេះ ការអភិវឌ្ឍន៍នៅមូលដ្ឋានឃុំកន្ទ្រាំង បានកសាងនូវសមិទ្ធិផលជាច្រើន គួរឱ្យកត់សំគាល់រូមមាន ការជួសជុលផ្លូវថ្នល់ ការសាងសង់សាលារៀន និងជួសជុលផ្លូវ ធ្វើប្រព័ន្ធធារាសាស្ត្រ ដែលការអភិវឌ្ឍមួយចំនួន បានមកពីការចូលរួមរបស់ប្រជាជន សប្បុរសជន មូលនិធិឃុំ និងក្រុមការងាររាជរដ្ឋាភិបាលចុះជួយមូលដ្ឋាន។ ចំពោះការរីកចំរើននៅមូលដ្ឋាននេះ ជាការយកចិត្ដទុកដាក់ដល់ប្រជាពលរដ្ឋពីអាជ្ញាធរតាមគោលការណ៍នយោបាយរបស់រាជរដ្ឋាភិបាល។
លោកមេឃុំកន្ទ្រាំង ក៏បានប្ដេជ្ញាថា នៅអាណត្ដិទី៥ ឆ្នាំ២០២២ខាងមុខនេះ លោកនឹងធ្វើឱ្យមូលដ្ឋានឃុំនេះ ឱ្យមានការរីចំរើនបន្ថែមទៀត ដូចជាលើកកម្ពស់ជីវភាព រស់នៅរបស់ប្រជាពលរដ្ឋ ឈរលើមូលដ្ឋាននៃការអភិវឌ្ឍន៍ វិស័យ សំខាន់ៗរួមមាន៖ កសិកម្ម ហេដ្ឋារចនាសម្ព័ន្ធ សិប្បកម្ម និង ការបណ្ដុះបណ្ដាល ធនធានមនុស្ស រួមចំណែកយ៉ាងសកម្ម ដល់ការកសាងប្រទេសជាតិទាំងមូល។ ថែរក្សាសន្តិសុខសណ្ដាប់ធ្នាប់សាធារណៈបានរឹងមាំ ការពារភាពសុខសាន្តរបស់ប្រជាជន ទាំងផ្លូវកាយទាំងផ្លូវចិត្ត។ លើកកម្ពស់ការគោរពច្បាប់ ពង្រឹងយុត្តិធម៌ សមភាពក្នុងសង្គម ការពារសិទ្ធិ សេរីភាព កាតព្វកិច្ច និងរាល់ផលប្រយោជន៍ស្របច្បាប់របស់ប្រជាពលរដ្ឋ។ តម្រង់ទិសរបស់រដ្ឋបាលឃុំ ឱ្យមានភាពស្អាតស្អំប្រកបដោយសមត្ថភាព ជិតស្និទ្ធ ស្មោះត្រង់ ចំពោះប្រជាជន ធានាដល់ ការផ្ដល់ជូននូវ សេវាសាធារណៈប្រកបដោយ ប្រសិទ្ធភាព និងជឿទុកចិត្ត ដើម្បីលើកកំពស់ជីវភាពរស់នៅរបស់ប្រជាជន និងដើម្បីកាត់បន្ថយភាពក្រីក្រ នៅមូលដ្ឋាន ជាពិសេសក្នុងពេលបច្ចុប្បន្ននេះ ឃុំកន្ទ្រាំងគ្មានប្រជាពលរដ្ឋធ្វើចំណាកស្រុកនៅក្រៅប្រទេស៕
ព័ត៌មានជាតិ ថ្មីៗ
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
