ប្រជាពលរដ្ឋរស់នៅក្នុងខេត្ដសៀមរាប បានលើកឡើងថា សមិទ្ធិផលផ្លូវ ៣៨ខ្សែ ក្នុងក្រុងសៀមរាប ដែលជាចំណងដៃរបស់សម្ដេចតេជោនាយករដ្ឋមន្ដ្រី ពិតជាបានជួយសម្រួលយ៉ាងខ្លាំងដល់ជីវភាពរបស់ប្រជាជននៅមូលដ្ឋាន ជាពិសេសលើវិស័យទេសចរណ៍ បើទោះបីក្នុងអំឡុងពេលជំងឺកូវីដ-១៩ មិនទាន់ផុតរលត់ក៍ដោយបន្ទាប់ដាក់ឱ្យប្រើប្រាស់ជាផ្លូវការនាពេលកន្លងមក។
ពួកគាត់បានលើកឡើងថា បន្ទាប់ពីផ្លូវ ៣៨ខ្សែនេះ បានស្ថាបនារួចរាល់ និងសម្ភោធដាក់ឱ្យប្រើប្រាស់ជាផ្លូវការកាលពីដើមខែមេសាកន្លងមកនេះ ពួកគាត់បានបង្កើតនូវអាជីវកម្មផ្សេងៗ សម្រាប់បំរើឱ្យវិស័យទេសចរណ៍។ ជាក់ស្ដែងក្រុមប្រតិបត្ដិទេសចរណ៍ដែលអ្នកបំរើអាជីវកម្ម លើវិស័យទេសចរណ៍ ពួកគាត់បានបើកដំណើរការឡើងវិញស្ទើរគ្រប់កន្លែង ខណៈដែលនៅតាមបណ្ដោយផ្លូវនិមួយៗ ក្នុងចំណោមផ្លូវទាំង ៣៨ខ្សែនោះ មានទិដ្ឋភាព និងសោភ័ណ្ឌស្រស់ស្អាត។ ផ្លូវទាំងនោះ ងាយស្រួលដឹកជញ្ជូនទំនិញ និងការធ្វើចរាចរណ៍ ជាពិសេសក្នុងអំឡុងពេលចូលឆ្នាំ មានអ្នកទេសចរជាច្រើនបានទៅទស្សនានៅទីក្រុងសៀមរាប ដែលធ្វើឱ្យប្រជាពលរដ្ឋបានទទួលនូវសេដ្ឋកិច្ចជាច្រើនគួរឱ្យកោតសរសើរផងដែរ។
ពួកគាត់បានលើកឡើងទៀតថា សមទ្ធិផលផ្លូវ ៣៨ខ្សែដ៍ថ្មីស្រឡាងនេះ គឺជាកំណប់ដ៍មហាសាល សម្រាប់ជួយសម្រួលដល់ការរស់នៅប្រជាពលរដ្ឋក្នុងការប្រកបអាជីវកម្ម ការទទួលបាននូវអ្នកទេសចរកើនឡើងជាបន្ដបន្ទាប់។ ពួកគាត់រំពឹងថា វិស័យទេសចរនៅទីក្រុងប្រវត្ដិសាស្ដ្រអង្គរនេះ កាន់តែកើនឡើងនាពេលដ៍ខ្លីខាងមុខនេះ។ ប៉ុន្ដែទោះជាយ៉ាងនេះក្ដី ពួកគាត់ស្នើរឱ្យរាជរដ្ឋាភិបាល ជួយបន្ដអភិវឌ្ឍន៍ផ្លូវថ្នល់ផ្សេងទៀតដែលដែលរងការខូចខាតនៅក្នុងក្រុងនេះផងដែរ។
សូមជម្រាបថា តាមរយៈគម្រោងសាងសង់ផ្លូវទាំង ៣៨ខ្សែនេះ បានធ្វើឲ្យទីក្រុងសៀមរាប ប្រែក្លាយរូបរាងជាទីក្រុងទំនើប និងទេសចរណ៍ដ៏មានសក្តានុពល។ ទីក្រុងនេះ ត្រូវបានរាជរដ្ឋាភិបាលកម្ពុជាកំណត់ជាតំបន់ស្នូលនៃប៉ូលអភិវឌ្ឍជាតិ ជាគោលដៅទេសចរណ៍វប្បធម៌ប្រវត្តិសាស្រ្ត និងធម្មជាតិ ជាដារារះទិសឧត្ដរ ដោយសាររូបសាស្ត្រទីក្រុង បានជួយដល់ការការពារ និងកែលម្អបរិស្ថាន ផាសុខភាពរបស់ប្រជាពលរដ្ឋ និងការរៀបចំអភិវឌ្ឍទីក្រុងឆ្លាតវៃ (Smart City) ផងដែរ។ ផ្លូវ៣៨ខ្សែដ៍ប្រវត្ដិសាស្ដ្រនេះ ជាហេដ្ឋារចនាសម្ព័ន្ធប្រទាក់ក្រឡាគ្នា តភ្ជាប់ទីប្រជុំជន ទៅជាយក្រុង និងតភ្ជាប់ទៅកាន់តំបន់ទេសចរណ៍សំខាន់ៗ និងបណ្តាញខ្សែផ្លូវជាតិនានា សំដៅកាត់បន្ថយការកកស្ទះចរាចរណ៍ក្នុងទីក្រុង ជំរុញកំណើនដឹកជញ្ជូន ទាក់ទាញវិនិយោគិន ធុរជន និងភ្ញៀវទេសចរជាតិ-អន្តរជាតិ ដែលជាការរួមចំណែកក្នុងការជំរុញកំណើនសេដ្ឋកិច្ចជាតិឱ្យកាន់តែរីកចម្រើន នៅក្រោយវិបត្តិនៃជំងឺកូវីដ-១៩៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
