នៅព្រឹកថ្ងៃទី១៥ ខែឧសភា ឆ្នាំ២០២២ ព្រះចរណសោភ័ណ បណ្ឌិត គង់ សុភាព ថិតប្បញ្ញោ ព្រះរាជាគណៈថ្នាក់កិត្តិយស ព្រះគ្រូចៅអធិការវត្តឥន្ទបត្តបុរីអង្គរខាងជើង ស្ថិតក្នុងសង្កាត់នគរធំ ក្រុងសៀមរាប រួមជាមួយវត្តមានលោកជំទាវ មហាឧបាសិកាបណ្ឌិត ហ៊ុន សេងនី និងក្រុមគ្រួសារព្រមទាំងញាតិធម៌ ឯកឧត្តម គង់ប៊ុនលី ទីប្រឹក្សាផ្ទាល់ សម្តេចព្រះមហាសុមេធា ធិបតីកិត្តិឧទេ្ទសបណ្ឌិត នន្ទ ង៉ែត សម្តេចសង្ឃនាយក នៃព្រះរាជាណាចក្រកម្ពុជា និងជាមេបញ្ជាការរងនៃបញ្ជាការដ្ឋានកងអង្គរក្សសម្តេចតេជោសែន និងលោកជំទាវបានមូលមតិគ្នា រៀបចំពិធីដង្ហែព្រះសារីរិកធាតុព្រះសម្មាសម្ពុទ្ឋ និងព្រះអរហន្តធាតុ ជុំវិញប្រាសាទអង្គរតូច ដោយមានការនិមន្តនិងអញ្ជើញចូលរួមពីព្រះសង្ឃ ដូនជីតាជី ប្រជាពុទ្ឋបរិស័ទស្រីប្រុសជិតឆ្ងាយ ប្រមាណជាជាង១ពាន់រូប ដើម្បីបង្ហាញនូវការគោរពរំឭកនឹកដល់ព្រឹត្តិការណ៍ធំៗបី នៃសម័យកាលរបស់ព្រះសម្មាសម្ពុទ្ធសមណគោតមនៃយើង ដែលព្រះអង្គទ្រង់បានប្រសូត បានត្រាស់ដឹង និងជាថ្ងៃចូលបរិនិព្វាន។
ព្រះចរណសោភ័ណ បណ្ឌិត គង់ សុភាព មានថេរដិកាថា ព្រះសង្ឃ និងប្រជាពុទ្ឋបរិស័ទនៅទីអារាមនេះ ក៍ដូចជាទូទាំងខេត្តសៀមរាប បានផ្អាកការជួបជុំប្រារព្ឋពិធីបុណ្យពិសាខបូជា និងពិធីសាសនានានា អស់រយៈពេល ២ឆ្នាំមកហើយ ដោយសារវិបត្តិសាកលរបស់ពិភពលោកកូវីដ-១៩ តែដោយគោលនយោបាយនិងការដឹកនាំ ដ៏ត្រឹមត្រូវរបស់រាជរដ្ឋាភិបាល ប្រទេសយើងគ្រប់គ្រងបានទាំងស្រុងនូវបញ្ហាកូវីដនេះ ដោយបានចាក់វ៉ាក់សាំង គ្រប់គ្រាន់ជូនប្រជាជនកម្ពុជា ព្រមទាំងមានការអនុញ្ញាតពីប្រមុខរាជរដ្ឋាភិបាលឱ្យមានការជួបជុំ និងប្រារព្ធកម្មវិធីនានា ឡើងវិញ ទើបគណៈកម្មវត្ត ព្រះសង្ឃ និងសាសនូបត្ថម្ភវត្ត បានសម្រេចឯកភាព រៀបចំព្រឹត្តិការណ៍ដ៍សំខាន់នេះឡើងវិញ ដើម្បី ជាប្រយោជន៍ដល់យុវជនកូនខ្មែរ និងប្រជាពុទ្ឋបរិស័ទរបស់យើងបានយល់កាន់តែច្បាស់អំពីសារសំខាន់នៃបុណ្យវិសាខបូជា។
ព្រះតេជគុណ បន្តថា បុណ្យវិសាខបូជា គឺជាពិធីបុណ្យសាសនាដ៏សំខាន់បំផុត ក្នុងចំណោមបុណ្យសាសនាដទៃៗទៀត។ បើតាមគម្ពីរព្រះត្រៃបិតកយើងឃើញថា ព្រះសម្មាសម្ពុទ្ឋ ទ្រង់ប្រសូត ត្រាស់ដឹង និងបរិនិព្វាន ក្នុងថ្ងៃ ១៥កើត ពេញបូណ៌មី ខែវិសាខ ដូចគ្នា គឺខុសតែឆ្នាំប៉ុណ្ណោះ។ ដូច្នេះ បុណ្យវិសាខបូជា គឺតំណាងឲ្យ «ថ្ងៃទាំងបី» នេះឯឯ។ ព្រះតេជគុណបន្ថែមថា ក្នុងឱកាសរំលឹកដល់ថ្ងៃដ៏មង្គលទាំងបីនេះ សូមពុទ្ធបរិស័ទទាំងអស់ គប្បីសង្រួមកាយ វាចាចិត្តឲ្យស្អាតល្អបរិសុទ្ធ ផូរផង់ តម្កល់ចិត្តឲ្យជ្រះថ្លាប្រកបដោយបញ្ញា ឈរលើការត្រិះរិះ ពិចារណាដ៏ត្រឹមត្រូវខិតខំដុសខាតសតិស្មារតីឲ្យបានល្អ នឹងនរ ខិតខំបំពេញអំពើជាកុសល ជម្រះចោលនូវអកុសលកម្មទាំងពួង ដើម្បីបន្តរួបរួមគ្នាជាធ្លង់មួយ ក្រោមការដឹកនាំដ៏ត្រឹមត្រូវរបស់រដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ ដើម្បីអភិវឌ្ឍសង្គមជាតិយើងឲ្យមានការរីកចម្រើន លើគ្រប់វិស័យ៕
អត្ថបទ និង រូបភាព៖ លោក យូ វង្ស
