អាជ្ញាធរជាតិអប្សរា រួមសហការជាមួយសារព័ត៌មានអេឡិចត្រូនិកថ្មីៗ បានធ្វើពិធីបើកសម្ពោធសៀវភៅ ដែលមានចំណងជើងថា “អ្នកថែអង្គរ” នៅមុខប្រាសាទអង្គរវត្ត នាព្រឹកថ្ងៃច័ន្ទទី២៣ ខែឧសភា ឆ្នាំ២០២២ បន្ទាប់ពីបានបោះពុម្ពរួចរាល់ចំនួន ៥,០០០ក្បាលបង្ហាញដល់សាធារណជន បានស្គាល់ពីអ្នកថែរក្សាអង្គរ។
ឯកឧត្ដម ឡុង កុសល អគ្គនាយករង នៃអាជ្ញាធរជាតិអប្សរា បានកោតសរសើរចំពោះស្នាដៃនិពន្ធសៀវភៅអ្នកថែអង្គរនេះ ដោយលោកមានប្រសាសន៍ថា ការចងក្រងជាសៀវភៅនេះឡើង គឺជាបេសសកកម្មមានគោលដៅច្បាស់លាស់ហើយក៏ជាវិថីដែលផ្សារភ្ជាប់ ការយល់ដឹង ការអបរំ លើទស្សនវិស័យរួមគ្នារវាងអាជ្ញាធរជាតិអប្សរា និងសារព័ត៌មានអេឡិចត្រូនិកថ្មីៗដែរ។ ឯកឧត្ដ បានបន្ដថា វត្តមានរបស់អ្នកថែអង្គរ គឺមានសារ:សំខាន់បំផុត ប្រសិនបើមិនមានពួកគាត់ទេ គឺការងារជាច្រើន ដូចជាការជួសជុល ការជួយសង្គ្រោះប្រាសាទបុរាណ និងការអភិរក្សរមណីយដ្ឋាននានាប្រាកដជាមិនមានលទ្ធផលល្អ រហូតមកដល់ពេលនេះឡើយ។ « យើងមានតួអង្គអ្នកថែអង្គរជាច្រើន មិនមែនមានតែត្រឹមបង្ហាញនៅក្នុងសៀវភៅនេះទេ ក៏ប៉ុន្តែយើងត្រូវការពេលវេលាថែមទៀត ក្នុងការបង្ហាញតួអង្គអ្នកថែអង្គរឱ្យបានច្រើននាក់នោះ។ សៀវភៅអ្នកថែអង្គរបានបោះពុម្ពផ្សាយជាលើកដំបូងចំនួន ៥,០០០ក្បាលជាភាសាខ្មែរ ហើយនៅពេលអនាគតក្រុមអ្នកនិពន្ធគ្រោងនឹងបកប្រែសៀវភៅនេះ ទៅជាច្រើនភាសាដូចជាភាសាអង់គ្លេស ភាសាចិន និងភាសានៅក្នុងតំបន់ប្រជាជាតិអាស៊ី អគ្នេយ៍ (ASEAN)ជាដើម។
លោក គី សុខលីម សហស្ថាបនិកសារព័ត៌មានអេឡិចត្រូនិកថ្មីៗ ឱ្យដឹងទៀតថា ស្នាដៃនិពន្ធ ដែលសហការជាមួយ និងអាជ្ញាធរជាតិអប្សរា មិនមែនមានតែសៀវភៅអ្នកថែអង្គរ តែមួយនេះទេ គឺនៅពេលខាងមុខដ៏ខ្លី ក្រុមរបស់លោកគ្រោងនឹងបោះពុម្ពផ្សាយសៀវភៅថ្មីមួយទៀត ដែលមានចំណងជើងថា “លើសពីអង្គរ”។ លោក បានថ្លែងនៅក្នុងពិធីបើកសម្ពោធសៀវភៅអ្នកថែអង្គរនោះថា បន្ទាប់ពីរូបលោកបានជួបសន្ទនាជាច្រើនលើកជាមួយលោកឡុង កុសលអគ្គនាយករង នៃអាជ្ញាធរជាតិអប្សរា ភាគីទាំងពីរក៏បានផុសចេញនូវគំនិតរួមគ្នាសរសេរជាសៀវភៅនេះឡើង ក្នុងបំណងដើម្បីលើកទឹកចិត្ត និងដឹងគុណដល់អ្នកថែអង្គរទាំងឡាយ ព្រមទាំងដឹងគុណដល់ដូនតាខ្មែរ ដែលជាអ្នកបានកសាងប្រាសាទជាច្រើនផងដែរ។
លោកមានប្រសាសន៍ទៀតថាមនៅក្នុងសៀវភៅអ្នកថែអង្គរ ដែលបានបោះពុម្ពផ្សាយរួចហើយនេះ អ្នកនិពន្ធចង់បង្ហាញអំពីជីវប្រវត្តិ និងជំនាញរបស់មនុស្សជាច្រើនរូប ដែលបានធ្វើការងារថែរក្សាអង្គរ ខ្លះបានធ្វើការរយ:ពេលជាង ២០ឆ្នាំ និងខ្លះទៀតបានធ្វើការងារពាក់ព័ន្ធ និងការថែរក្សាអង្គររយ:ពេល ៣០ឆ្នាំមកហើយ។សៀវភៅអ្នកថែអង្គរ ដែលមានកម្រាស់ជាង២០០ទំព័រនោះ បានបង្ហាញតួអង្គ អ្នកថែអង្គរ មកពីមជ្ឈដ្ឋានផ្សេងៗគ្នាចំនួន ១៥រូប ដោយអ្នកថែអង្គរទាំងនោះ មានប្រវត្តិ និងជំនាញផ្សេងៗពីគ្នា ដូចជាអ្នកនរវិទូ អ្នកបុរាណវិទ្យា ស្ថាបត្យករ អ្នកជំនាញខាងរៀបថ្មអង្គរ អ្នកជំនាញផលិតដាវបុរាណ អ្នកជំនាញខាងព្យាបាលថ្មប្រាសាទ អ្នកជំនាញខាងជួសជុលឥដ្ឋរបស់ប្រាសាទ អ្នកជំនាញខាងធ្វើឧបករណ៍ភ្លេងខ្មែរ អ្នកកសិកម្មនៅក្នុងតំបន់អង្គរមនិងអ្នកសិល្ប:ចម្លាក់ស្បែកបន្តពីវប្បធម៌អង្គរជាដើម៕
អត្ថបទ និងរូបភាព៖ លោក បូ សាវី និងលោក យូ វង្ស
កែសម្រួល៖ លោក លីវ សុខុន
