ក្រសួងព័ត៌មាន ក្នុងនាមជាប្រធានគណៈកម្មការទទួលបន្ទុកផ្សព្វផ្សាយអប់រំ នៃគណៈបញ្ជាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ បានបើកយុទ្ធនាការផ្សព្វផ្សាយអប់រំ ស្ដីពីបញ្ហាគ្រឿងញៀន នៅទីរួមខេត្តស្វាយរៀង នាថ្ងៃទី១៨ ខែវិច្ឆិកា ឆ្នាំ២០២៥។
យុទ្ធនាការនេះ មានគោលបំណងបន្តជំរុញស្មារតី និងចលនាជាតិតែមួយ ដើម្បីចូលរួមផ្សព្វផ្សាយ អប់រំ ឱ្យបានសកម្មគ្រប់មជ្ឈដ្ឋាន អំពីផលប៉ះពាល់ និងវិនាសកម្មនៃគ្រឿងញៀន ដោយផ្ដោតសំខាន់លើគោលការណ៍ “ម្នាក់ៗមិនពាក់ព័ន្ធនឹងគ្រឿងញៀន”។
សភាពការណ៍គ្រឿងញៀនទាំងក្នុងតំបន់ និងសកលលោក នៅតែបន្តវិវត្តន៍ប្រែប្រួលគួរឱ្យព្រួយបារម្ភ ដែលបានជះឥទ្ធិពលដល់ប្រទេសកម្ពុជាផងដែរ។ ដើម្បីឆ្លើយតបនឹងបញ្ហានេះ រាជរដ្ឋាភិបាលកម្ពុជា បានដាក់ឱ្យអនុវត្តនូវផែនការយុទ្ធសាស្រ្តប្រយុទ្ធប្រឆាំងគ្រឿងញៀនមានចំនួន ១០លើក រួមជាមួយសារាចរណែនាំ និងបទបញ្ជាផ្សេងៗ សំដៅដល់ការធ្វើយ៉ាងណារួមគ្នាជាចលនាជាតិមួយ ក្នុងការប្រយុទ្ធប្រឆាំងគ្រឿងញៀន ដើម្បីកសាងសហគមន៍គ្មានគ្រឿងញៀន។
ការងារផ្សព្វផ្សាយអប់រំ ត្រូវបានចាត់ទុកថាជាកិច្ចការអាទិភាព និងជាយន្តការដ៏មានប្រសិទ្ធភាព ក្នុងការបង្ការ ទប់ស្កាត់ និងប្រយុទ្ធប្រឆាំងគ្រឿងញៀន។ កន្លងមក ស្ថាប័ន និងបុគ្គលជាច្រើន បានចូលរួមចំណែកយ៉ាងសកម្មក្នុងការបញ្ជ្រាបការយល់ដឹងអំពីបញ្ហាគ្រឿងញៀនទៅកាន់គ្រប់មជ្ឈដ្ឋាន រួមមាន៖ ស្ថានីយទូរទស្សន៍ និងវិទ្យុ, សិល្បៈករ-សិល្បៈការិនី, ពិធីករ-ពិធីការិនី, អ្នកផលិតមាតិកា (Content Creators)។
សម្រាប់យុទ្ធនាការផ្សព្វផ្សាយអប់រំនាពេលនេះដែរ មានការចូលរួមយ៉ាងផុសផុលពីសំណាក់ អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន, ថ្នាក់ដឹកនាំរដ្ឋបាលខេត្ត, មន្ត្រីរាជការ និងកងកម្លាំងប្រដាប់អាវុធ, លោកគ្រូ អ្នកគ្រូ, សិស្សានុសិស្ស និងយុវជន យុវនារីសរុបមានប្រមាណជាង ៥០០នាក់ ដែលបានបង្ហាញពីស្មារតីរួបរួមគ្នាក្នុងកិច្ចការជាតិដ៏សំខាន់នេះ៕
