យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប នៅថ្ងៃទី១៩ ខែវិច្ឆិកា ឆ្នាំ២០២៥ បានបង្ហាញថា គិតត្រឹមថ្ងៃទី១៧ ខែវិច្ឆិកា ឆ្នាំ២០២៥ ខេត្តសៀមរាបបានទទួលរងឥទ្ធិពលពីព្យុះចំនួន២ ដែលបានបង្កឱ្យមានភ្លៀងធ្លាក់ពីមធ្យមទៅច្រើនរាយប៉ាយទូទាំងខេត្ត បណ្ដាលឱ្យលិចដំណាំស្រូវ និងដំណាំដំឡូងមី ក្នុងស្រុកចំនួន៦ ស្មើនឹង ១២៤ភូមិ និងគ្រួសាររងគ្រោះចំនួន ៧ ០២៩គ្រួសារ។
របាយការណ៍ដដែលបញ្ជាក់ថា ដំណាំស្រូវវស្សា មានផ្ទៃដីរងផលប៉ះពាល់សរុបចំនួន ៩ ៩៧៦ហិកតា ក្នុងស្រុកចំនួន៦ រួមមាន ៖ ស្រុកអង្គរជុំ ប៉ះពាល់ចំនួន ១៤៨ហិកតា, ស្រុកវ៉ារិន ៦ ៨០៤ហិកតា, ស្រុកស្វាយលើ ៣៤០ហិកតា, ស្រុកជីក្រែង ២ ៦៨៤ហិកតា, ស្រុកស្រីស្នំ ៨៤០ហិកតា និងស្រុកក្រឡាញ់ ផ្ទៃដីប៉ះពាល់ចំនួន ៥០ហិកតា ខណៈដំណាំស្រូវប្រាំង ផ្ទៃដីប៉ះពាល់សរុបចំនួន ១ ៤១០ហិកតា។
ជាមួយគ្នានោះ ក្រៅពីដំណាំស្រូវ ដំណាំដំឡូងមី ក៏បានទទួលនូវផលប៉ះពាល់លើផ្ទៃដីសរុបចំនួន ១០ ៣០២ហិកតា ក្នុងស្រុកចំនួន២ ស្មើនឹង ៤៥ភូមិ និងគ្រួសាររងគ្រោះចំនួន ៥ ២២៩ គ្រួសារ ដោយក្នុងនោះ ស្រុកវ៉ារិន ផ្ទៃដីចំនួន ១០ ១៨១ហិកតា និង ស្រុកជីក្រែង ផ្ទៃដីចំនួន ១២១ហិកតា។
សូមបញ្ជាក់ថា ក្នុងការឆ្លើយតបឱ្យបានទាន់ពេលវេលានូវគ្រោះមហន្តរាយនេះ មន្ទីរកសិកម្មខេត្តនឹងបន្តកិច្ចសហការល្អជាមួយមន្ទីរពាក់ព័ន្ធ អាជ្ញាធរដែនដី និងដៃគូរអភិវឌ្ឍន៍ផ្សេងៗ ដើម្បីឱ្យការងារអន្តរាគមន៍ការដាំដុះស្ដារឡើងវិញ តាមមធ្យោបាយផ្សេងៗ និងបន្តតាមដានស្ថានភាពទឹកជំនន់ទឹកភ្លៀង និងទឹកជំនន់ទឹកទន្លេសាប នៅតាមបណ្ដាក្រុង/ស្រុក ដោយបន្តណែនាំដល់កសិករក្នុងការកម្ចាត់កត្តាចង្រៃផ្សេងៗ ដូចជាកម្ចាត់ស្មៅ ជំងឺ និងសត្វល្អិតជាដើម៕
អត្ថបទ៖ ហែម បូរ៉ាន្នី
កែសម្រួល៖ លោក អ៊ុន ណារាជ្យ
