សាខាកាកបាទក្រហមកម្ពុជា ខេត្តសៀមរាប បាននិងកំពុងពង្រឹងកិច្ចសហប្រតិបត្តិការអន្តរជាតិ តាមរយៈការទទួលស្វាគមន៍ និងការចុះពិនិត្យទីតាំងជាក់ស្ដែង សម្រាប់ត្រៀមរៀបចំដំណើរទស្សនកិច្ចសិក្សាផ្លាស់ប្ដូរបទពិសោធរវាងប្រតិភូយុវជនកាកបាទក្រហម ជប៉ុន និងកម្ពុជា ដែលនឹងប្រព្រឹត្តទៅនៅខេត្តសៀមរាប នាខែធ្នូ ឆ្នាំ២០២៥ ខាងមុខនេះ។
ក្នុងឱកាសអញ្ជើញចុះមកពិនិត្យទីតាំងផ្ទាល់ នៅថ្ងៃទី១៩ ខែវិច្ឆិកា ឆ្នាំ២០២៥នេះ លោក នួន ពុទ្ធារ៉ា សមាជិកគណៈកម្មាធិការសាខាកាកបាទក្រហមកម្ពុជាខេត្ត បានបង្ហាញយ៉ាងក្បោះក្បាយអំពីសកម្មភាពមនុស្សធម៌ និងសមិទ្ធផលរបស់សាខា ស្របតាមគោលការណ៍គ្រឹះនៃចលនាអន្តរជាតិកាកបាទក្រហម និងយុទ្ធសាស្រ្ត ២០២១-២០៣០ របស់កាកបាទក្រហមកម្ពុជា។ ពិសេសជាងនេះ លោកបានគូសបញ្ជាក់អំពីសមិទ្ធផលកិច្ចសហប្រតិបត្តិការនានារបស់សាខាជាមួយកាកបាទក្រហមជាមិត្ត។
ជាការឆ្លើយតប លោក Hiroaki Sakai អគ្គលេខាធិការកាកបាទក្រហមជប៉ុន សាខាហ៊ីរ៉ូស៊ីម៉ា បានសម្ដែងនូវការដឹងគុណយ៉ាងជ្រាលជ្រៅ ចំពោះការទទួលស្វាគមន៍នេះ និងបានគូសរំលេចថា ដំណើរទស្សនកិច្ចផ្លាស់ប្ដូរបទពិសោធរវាងប្រតិភូយុវជននៃប្រទេសទាំងពីរ នឹងត្រូវបានជំរុញឱ្យមានបន្តជាច្រើនឆ្នាំទៅមុខទៀត ដើម្បីធ្វើឱ្យកិច្ចសហការ និងការផ្លាស់ប្ដូរបទពិសោធនេះកាន់តែមានភាពល្អប្រសើរឡើងៗ ពីមួយឆ្នាំទៅមួយឆ្នាំ។
ក្រោយពីបញ្ចប់កិច្ចស្វាគមន៍ និងពិភាក្សា លោក នួន ពុទ្ធារ៉ា បានអញ្ជើញជូនដំណើរលោកអគ្គលេខាធិការ កក្រមជប៉ុន សាខាហ៊ីរ៉ូស៊ីម៉ា ចុះពិនិត្យទីតាំងសំខាន់ៗមួយចំនួន ដើម្បីធានាបាននូវភាពរលូននៃដំណើរទស្សនកិច្ចសិក្សារបស់យុវជននាខែក្រោយ។ ទីតាំងចុះពិនិត្យរួមមាន៖ សហគមន៍បណ្ដែតទឹកចុងឃ្នៀស ដែលជាទីតាំងមានសារៈសំខាន់សម្រាប់យុវជនសិក្សាស្វែងយល់ពីជីវភាពសហគមន៍មូលដ្ឋាន, ឧទ្យានសហស្សវត្សរ៍កាកបាទក្រហមកម្ពុជា, ស្រុកអង្គរធំ ដើម្បីពិនិត្យមើលផ្ទះស្នាក់នៅសម្រាប់ទទួលភ្ញៀវយុវជនជប៉ុន និងពិនិត្យស្ថានភាពទូទៅនៅក្នុងសហគមន៍ និងប្រាសាទអង្គរវត្ត ដែលជាបេតិកភណ្ឌពិភពលោក។
ការចុះពិនិត្យ និងរៀបចំនេះ បង្ហាញពីការត្រៀមលក្ខណៈរួចរាល់របស់សាខា កក្រក ខេត្តសៀមរាប ក្នុងការទទួលស្វាគមន៍ប្រតិភូយុវជនកាកបាទក្រហមជប៉ុន ដើម្បីបន្តពង្រឹងចំណងមិត្តភាពមនុស្សធម៌រវាងប្រទេសទាំងពីរ៕
អត្ថបទ និងរូបភាព៖ សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
