អាជ្ញាធរខេត្តសៀមរាប បានអំពាវនាវដល់អាណាព្យាបាល គ្រូបង្រៀន និងសហគមន៍ទាំងមូល ឱ្យផ្តល់ឱកាស និងការសម្រេចចិត្តដល់កូនស្រី តាមរយៈការអប់រំ ការការពារ និងការផ្តល់ឱកាសស្មើភាពគ្នាក្នុងការអភិវឌ្ឍខ្លួន ដើម្បីឱ្យក្មេងស្រីមានទំនុកចិត្ត ហ៊ានបញ្ចេញមតិយោបល់ និងចូលរួមយ៉ាងសកម្មក្នុងកិច្ចការសហគមន៍។
ការអំពាវនាវនេះធ្វើឡើងក្នុងកម្មវិធីបើក “យុទ្ធនាការជិះកង់ដើម្បីក្មេងស្រី និងដើម្បីទាំងអស់គ្នា” ជាមួយសាធារណជន និងយុវជនជុំវិញក្រុងសៀមរាប និងពិធីអបអរសាទរ ទិវាអន្តរជាតិក្មេងស្រីឆ្នាំ២០២៥ ក្រោមប្រធានបទ “ភាពជាអ្នកដឹកនាំរបស់ក្មេងស្រីដើម្បីទាំងអស់គ្នា” ដែលរៀបចំឡើងដោយក្រសួងកិច្ចការនារី សហការជាមួយរដ្ឋបាលខេត្តសៀមរាប គាំទ្រដោយអង្គការភ្លែនអន្តរជាតិកម្ពុជា នៅព្រឹកថ្ងៃទី២០ ខែវិច្ឆិកា ឆ្នាំ២០២៥នេះ។
ក្នុងឱកាសនោះ លោក យុន លីនណេ អភិបាលរងខេត្តសៀមរាប បានសង្កត់ធ្ងន់ថា យើងទាំងអស់គ្នា ជាអាជ្ញាធរ មាតាបិតា និងគ្រូបង្រៀន ត្រូវតែរួមគ្នាបង្កើតបរិយាកាសគាំទ្រដល់ក្មេងស្រីក្នុងមូលដ្ឋាន ដើម្បីឱ្យពួកគេមានទំនុកចិត្ត និងចូលរួមយ៉ាងសកម្ម។ លោកក៏បានផ្ញើសារដល់យុវជន យុវនារី ថាប្អូនៗមានសក្តានុពលគ្មានដែនកំណត់ ដូច្នេះសូមកុំខ្លាចក្នុងការបញ្ចេញមតិក្លាហាន តស៊ូ និងឈានក្លាយជាអ្នកដឹកនាំនៅក្នុងគ្រួសារ សហគមន៍ និងសង្គមជាតិ។ ត្រូវហ៊ានសុបិនឱ្យធំ និងដើរតាមក្តីសុបិនរបស់ខ្លួន ហើយត្រូវចងចាំថាក្តីសុបិនរបស់ប្អូនៗ គឺជាការកសាងនូវអនាគតសង្គមមួយប្រកបដោយសុខដុមរមនា និងចីរភាព។
លោកអភិបាលរងខេត្តបានបន្តថា កម្មវិធីជិះកង់នាថ្ងៃនេះ គឺជាសកម្មភាពមួយក្នុងយុទ្ធនាការទិវាអន្តរជាតិក្មេងស្រី ដើម្បីបង្កើនការយល់ដឹង និងការចូលរួមពីសាធារណជន ក្នុងការគាំទ្រ និងផ្តល់តម្លៃលើសារៈសំខាន់នៃការលើកកម្ពស់ភាពជាអ្នកដឹកនាំរបស់ក្មេងស្រី។ លោកថាភាពជាអ្នកដឹកនាំរបស់ក្មេងស្រី សំដៅលើភាពអង់អាច សមត្ថភាព សកម្មភាព សំឡេង និងឥទ្ធិពលដែលក្មេងស្រីមាននៅក្នុងការដឹកនាំ ចាប់ពីខ្លួនឯង គ្រួសារ សហគមន៍ និងសង្គម។ នៅពេលក្មេងស្រីត្រូវបានបណ្តុះភាពជាអ្នកដឹកនាំ ពួកគេនឹងមានជំនឿជាក់ មានសមត្ថភាពប្រឈម ដោះស្រាយបញ្ហា និងមានភាពធន់នឹងវិបត្តិផ្សេងៗ។
លោកស្រី សេង ផលដាវីន អគ្គនាយករងនៃអគ្គនាយកដ្ឋានសមភាពយេនឌ័រ និងអភិវឌ្ឍន៍សេដ្ឋកិច្ច នៃក្រសួងកិច្ចការនារី មានប្រសាសន៍ថា ទិវាអន្តរជាតិក្មេងស្រី គឺជាយុទ្ធនាការសកលរបស់អង្គការសហប្រជាជាតិដែលប្រព្រឹត្តទៅជារៀងរាល់ឆ្នាំនៅថ្ងៃទី១១ ខែតុលា ចាប់តាំងពីឆ្នាំ២០១២មក។ យុទ្ធនាការនេះឆ្លើយតបទៅនឹងគោលការណ៍របស់រាជរដ្ឋាភិបាលក្នុងការ បញ្ឈប់រាល់ទម្រង់នៃការរើសអើង និងអំពើហិង្សាទៅលើស្ត្រីនិងក្មេងស្រី ព្រមទាំងបង្កើនភាពអង់អាចរបស់ក្មេងស្រី។
លោកស្រីបន្តថា យុទ្ធនាការនេះផ្តោតលើគោលដៅចម្បងៗដូចជា៖ លើកកម្ពស់ការគាំទ្រ ពីសំណាក់ក្រុមគ្រួសារ សហគមន៍ និងជាពិសេសបុរស និងក្មេងប្រុស ក្នុងការអនុញ្ញាតឱ្យក្មេងស្រីទទួលបានឱកាសពេញលេញ និងអនុវត្តសិទ្ធិរបស់ពួកគេ និងបង្កើនការអភិវឌ្ឍសមត្ថភាព ចំណេះដឹង និងភាពជាអ្នកដឹកនាំ របស់ក្មេងស្រី ដើម្បីឱ្យក្លាយជាធនធានមនុស្សដ៏មានតម្លៃប្រកបដោយគុណធម៌ និងសីលធម៌។
លោកស្រីបានគូសបញ្ជាក់ថា ក្មេងស្រីគឺជាកម្លាំងចលករដ៏សំខាន់សម្រាប់សង្គម ហើយយើងត្រូវធានាថាក្មេងស្រីគ្រប់រូបទទួលបានការអប់រំប្រកបដោយគុណភាព ជំនាញឌីជីថល និងសុវត្ថិភាព ដើម្បីពួកគេអាចអភិវឌ្ឍសមត្ថភាពដឹកនាំរបស់ខ្លួន។ ភាពជាអ្នកដឹកនាំរបស់ក្មេងស្រី គឺជាគន្លឹះក្នុងការកសាងសង្គមមួយដែលរីកចម្រើន ប្រកបដោយសមធម៌ និងបរិយាប័ន្នសម្រាប់មនុស្សគ្រប់រូប៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
