កាលពីថ្ងៃទី១៨ ខែវិច្ឆិកា ឆ្នាំ២០២៥ ក្រុមការងារអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ បានចុះពិនិត្យ និងវាយតម្លៃលើការងារថែទាំខួប និងថែទាំប្រចាំផ្លូវក្រាលកៅស៊ូ DBST ចំនួន ២គម្រោង ដំណាក់កាលទី២ ក្នុងភូមិសាស្ត្រក្រុងស្រុកចំនួន៨ ក្នុងខេត្តសៀមរាប ដឹកនាំដោយ ឯកឧត្តម សាន វិសាល រដ្ឋលេខាធិការ និងជាសមាជិកគណៈកម្មាធិការលទ្ធកម្ម។
ឯកឧត្តម សាន វិសាល បានបញ្ជាក់ថា គម្រោងទាំងពីរមានលក្ខណៈដូចខាងក្រោម៖ គម្រោងទី១.ការងារថែទាំជាប្រចាំផ្លូវក្រាលកៅស៊ូ DBST ចំនួន ១៥ខ្សែ ប្រវែងសរុប ១៧១ ៩២០ ម៉ែត្រ ស្ថិតនៅក្នុងស្រុកជីក្រែង ស្រុកសូទ្រនិគម ស្រុកប្រាសាទបាគង ស្រុកស្រីស្នំ ស្រុកក្រឡាញ់ ស្រុកពួក ស្រុកអង្គរជុំ ស្រុកវ៉ារិន និងក្រុងសៀមរាប។ គម្រោងនេះ បានបំពាក់ស្លាកសញ្ញាចរាចរណ៍ចំនួន ៥២២ស្លាក នៅលើផ្លូវ ៤ខ្សែ ក្នុងគម្រោង។
សម្រាប់គម្រោងទី២ គឺការងារថែទាំខួបផ្លូវមួយកំណាត់ ដោយក្រាលកៅស៊ូ DBST បន្ថែមពីលើ (Reseal DBST) ប្រវែង ៨ ៧០០ម៉ែត្រ ទទឹង ៥ ម៉ែត្រ គំនូសចរាចរណ៍ ១ ៧៤០ ម៉ែត្រក្រឡា ស្ថិតនៅលើផ្លូវក្នុងឃុំខ្ចាស់ និងឃុំចាន់ស ស្រុកសូទ្រនិគម ក្នុងគម្រោងដែលអនុវត្តដោយនាយកដ្ឋានផ្លូវជនបទ។
ក្នុងឱកាសចុះពិនិត្យនោះ ឯកឧត្តម សាន វិសាល បានកោតសរសើរដល់ក្រុមការងារនៃមន្ទីរអភិវឌ្ឍន៍ជនបទខេត្តសៀមរាប ដែលបានបំពេញការងារបានល្អ ក្នុងការចុះត្រួតពិនិត្យរាល់ការងារដែលក្រសួងប្រគល់ ទាំងគុណភាព និងសោភ័ណភាព។ ទន្ទឹមនឹងនេះ ឯកឧត្តមក៏បានណែនាំបន្ថែមដល់មន្ទីរអភិវឌ្ឍន៍ជនបទខេត្ត លើការងារបច្ចេកទេសដើម្បីពង្រឹងការងារថែទាំផ្លូវផ្សេងទៀត ត្រូវធ្វើអនាម័យសម្អាតស្មៅ និងដើមឈើតូចៗ ដែលដុះនៅអមសងខាងដងផ្លូវ និងត្រូវជំរុញដល់អ្នកទទួលគម្រោងការថែទាំផ្លូវ ឱ្យធ្វើការគូសគំនូសចរាចរណ៍ និងបំពាក់ស្លាកសញ្ញាចរាចរណ៍ឱ្យបានត្រឹមត្រូវតាមបច្ចេកទេស និងកិច្ចសន្យាជាមួយក្រសួង។
ឯកឧត្តមបានបញ្ជាក់ថា ការថែទាំខួបផ្លូវចំនួន ១៥ខ្សែ ដោយក្រាលកៅស៊ូ DBST បន្ថែមពីលើនេះ បានលើកកម្ពស់សោភ័ណភាព និងសុវត្ថិភាព តាមដងផ្លូវបានល្អស្អាត។ ម្យ៉ាងទៀត ផ្លូវទាំងនេះបានជួយសម្រួលដល់ប្រជាពលរដ្ឋក្នុងមូលដ្ឋានឱ្យធ្វើចរាចរណ៍ទៅមកកាន់តែងាយស្រួល ការដឹកជញ្ជូនកសិផលរបស់ប្រជាពលរដ្ឋទៅកាន់ទីផ្សារ សិស្សានុសិស្សធ្វើដំណើរទៅកាន់សាលារៀន និងការដឹកជញ្ជូនអ្នកជំងឺមកកាន់មណ្ឌលសុខភាពបានទាន់ពេលវេលាផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
