នៅថ្ងៃទី១៨ ខែវិច្ឆិកា ឆ្នាំ២០២៥នេះ ក្រុមគ្រូពេទ្យស្ម័គ្រចិត្តមកពីប្រទេសអូស្រ្តាលី ក្រោមការគាំទ្រពីអង្គការពិភពពន្លឺនៃជីវិត បានចុះធ្វើការពិនិត្យព្យាបាលជំងឺបឋមជូនប្រជាពលរដ្ឋនៅភូមិជ្រោយនាងងួន ឃុំជ្រោយនាងងួន ស្រុកស្រីស្នំ ខេត្តសៀមរាប ដោយមានការសហការជាមួយមន្ទីរសុខាភិបាលខេត្ត រដ្ឋបាលស្រុក ដែលការពិនិត្យព្យាបាលនេះ ធ្វើឡើងក្នុងវិទ្យាល័យ ២៨ មករា ស្រុកស្រីស្នំ។
លោក ហ៊ន់ ឬទ្ធិ អភិបាលស្រុកស្រីស្នំ បានថ្លែងអំណរគុណដល់ក្រុមគ្រូពេទ្យស្ម័គ្រចិត្តមកពីប្រទេសអូស្ត្រាលីក្រោមការគាំទ្រពីអង្គការពិភពពន្លឺនៃជីវិតដែលបានចំណាយថវិកា កម្លាំងកាយ និងកម្លាំងចិត្ត ក្នុងការយកចិត្តទុកដាក់ចំពោះសុខភាពបងប្អូនប្រជាពលរដ្ឋក្នុងមូលដ្ឋានស្រុកស្រីស្នំ ដោយទទួលការពិនិត្យព្យាបាលឥតគិតថ្លៃនេះ។
លោក ហ៊ន់ ឬទ្ធិ បានឱ្យដឹងថា ប្រជាពលរដ្ឋដែលមកទទួលសេវាព្យាបាលដោយឥតគិតថ្លៃនេះមានចំនួន ៣៤៦នាក់ ស្រី២៣២នាក់ ដោយមានគ្រូពេទ្យចំនួន៦ផ្នែក ដូចជា ការអប់រំ និងព្យាបាលបញ្ហាសុខភាពមាត់ធ្មេញ ការព្យាបាលបញ្ហាជំងឺភ្នែក ការពិនិត្យចង្វាក់បេះដូង ការឆ្លុះអេកូ វះកាត់ខ្នាតតូច បញ្ហាឈឺសន្លាក់ដៃជើង ឈឺក្រពះ ផ្ដាសាយ ឈឺក្បាល គ្រុនក្ដៅ រមាស់ សើរស្បែក បញ្ហាខ្សោយអស់កម្លាំង រោគស្ត្រី និងជំងឺទូទៅមួយចំនួនទៀត៕
អត្ថបទ៖ លោក អោត រត់
កែសម្រួល៖ លោក អ៊ុន ណារាជ្យ
