នាបរិវេណវត្តបុព្វទិសារាម ហៅវត្តកំពង់ក្តី ព្រឹកថ្ងៃទី២៥ ខែឧសភា ឆ្នាំ២០២២ មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តសៀមរាប សហការជាមួយអាជ្ញាធរស្រុកជីក្រែង បានរៀបចំពិធីបិទផ្សាយជាសាធារណៈនូវឯកសារនៃការវិនិច្ឆ័យក្បាលដីចំនួន ៩០៧ក្បាលដី នៃភូមិពោធិសិរី ឃុំកំពង់ក្តី ស្រុកជីក្រែង ខេត្តសៀមរាប ដើម្បីប្រជាពលរដ្ឋធ្វើការពិនិត្យព័ត៌មានក្បាលដីរបស់ខ្លួនឱ្យបានច្បាស់លាស់ និងធ្វើការតវ៉ាក្នុងករណីព័ត៌មានទាំងនោះមិនត្រឹមត្រូវ។
មានប្រសាសន៍ក្នុងពិធីនោះ លោក ប៊ូ ជុំសម្បត្តិ បង្ហាញថា ការបិទផ្សាយជាសាធារណៈនូវឯកសារការវិនិច្ឆ័យក្បាលដីនាពេលនេះ មានសារសំខាន់ណាស់ចំពោះប្រជាពលរដ្ឋ ដែលត្រៀមនឹងទទួលបានវិញ្ញាបនបត្រសំគាល់ម្ចាស់អចលនវត្ថុ ឬហៅសាមញ្ញថា ប្លង់រឹង។ ក្នុងរយៈពេល១៥ថ្ងៃនេះ បងប្អូនប្រជាពលរដ្ឋអាចមកពិនិត្យ ឬតវ៉ាក្នុងថ្ងៃឈប់សម្រាក ឬថ្ងៃបុណ្យក៏បាន ដោយមន្ត្រីរបស់យើងពុំមានការឈប់សម្រាកទេ។ ក្នុងការពិនិត្យផ្ទៀងផ្ទាត់នេះដែរ បងប្អូនប្រជាពលរដ្ឋត្រូវពិនិត្យព័ត៌មានសំខាន់ៗដូចជា ឈ្មោះម្ចាស់ដី ទំហំដី រូបរាងដី ប្រភេទទ្រព្យ ដីមានជាប់ពាក់ព័ន្ធនឹងដីបុរាណដ្ឋាន។ល។ ប្រសិនបើបងប្អូនមានការលំបាកក្នុងការពិនិត្យ ឬពុំចេះអក្សរ សូមបងប្អូនស្នើដល់មន្ត្រីជំនាញជួយពន្យល់ និងណែនាំបន្ថែម។
លោកអនុប្រធានមន្ទីរ បញ្ជាក់ថា ក្នុងករណីបងប្អូនប្រជាពលរដ្ឋ មិនមានការតវ៉ាចំពោះព័ត៌មានក្បាលដីរបស់ខ្លួន ដែលបានបិទផ្សាយជាសាធារណៈក្នុងរយៈពេល១៥ថ្ងៃនេះទេ បានន័យថាព័ត៌មានក្បាលដីរបស់បងប្អូនត្រឹមត្រូវ។ បន្ទាប់ពីបិទបញ្ចប់ការផ្សាយជាសាធារណៈនេះ គណៈកម្មការរដ្ឋបាល នឹងលើកសំណើរជូនទៅ ឯកឧត្តមអភិបាល នៃគណៈអភិបាលខេត្តសៀមរាប ដើម្បីសម្រេចចេញវិញ្ញាបនបត្រសំគាល់ម្ចាស់អចលនវត្ថុជូនបងប្អូន។
គួរជម្រាបថា លទ្ធផលនៃការចុះបញ្ជីដីធ្លីមានលក្ខណៈជាប្រព័ន្ធសម្រាប់ខេត្តសៀមរាប មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានធ្វើការបិទផ្សាយ នឹងចេញប័ណ្ណរួចរាល់បានចំនួន ៨៦ភូមិ រួមមាន៖ ១. ក្រុងសៀមរាប មានចំនួន ០៩ សង្កាត់ ស្មើនឹង ៥៣ភូមិ គឺ សង្កាត់សៀមរាបចំនួន ៧ភូមិ, សង្កាត់សាលាកំរើកចំនួន ៧ ភូមិ, សង្កាត់ស្វាយដង្គំចំនួន ១៤ ភូមិ, សង្កាត់ជ្រាវចំនួន ៧ភូមិ, សង្កាត់ស្លក្រាមចំនួន ៨ភូមិ, សង្កាត់គោកចកចំនួន ៣ភូមិ និងសង្កាត់នគរធំចំនួន ១ភូមិ, សង្កាត់សំបួរចំនួន ៥ភូមិ និងសង្កាត់ស្រង៉ែចំនួន ១ភូមិ ។ ២. ស្រុកសូទ្រនិគម ឃុំដំដែក ស្មើនឹង ១៣ភូមិ ក្នុងនោះ ១០ភូមិ បានចេញប័ណ្ណរួចរាល់ និង ៣ភូមិ ដែលបានធ្វើការបិទផ្សាយរួចរាល់។ ៣ស្រុកប្រាសាទបាគង បានចំនួន ៣ឃុំ ស្មើនឹង ៦ភូមិ គឺ ឃុំបាល្ល័ង្កចំនួន ១ភូមិ ឃុំអំពិលចំនួន ៤ ភូមិ និងឃុំកណ្តែកចំនួន ២ភូមិ ក្នុងនោះ មាន ១ភូមិបានចេញប័ណ្ណរួចរាល់ និង ១ភូមិទៀតបានបិទផ្សាយរួចរាល់។ ៤. ស្រុកពួក ឃុំពួក ស្មើនឹង ៦ភូមិ ក្នុងនោះ ៤ ភូមិ បានចេញប័ណ្ណរួចរាល់ និង ២ ភូមិបានបិទផ្សាយរួចរាល់។ ៥.ស្រុកក្រឡាញ់ ឃុំកំពង់ថ្កូវ ស្មើនឹង ៨ភូមិ ក្នុងនោះ ៦ភូមិ បានចេញប័ណ្ណរួចរាល់ និង ២ភូមិ ដែលបានធ្វើការបិទផ្សាយរួចរាល់។ និង៦.ស្រុកជីក្រែង ឃុំកំពង់ក្តី បានចំនួន ១ភូមិ ដែលកំពុងតែរៀបចំការបិទផ្សាយ។
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក សេង ផល្លី
