លោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប បានឲ្យដឹងថា កាលពីព្រឹកថ្ងៃទី២៦ ខែឧសភា ឆ្នាំ២០២២នេះ មានគណបក្សនយោបាយចំនួន២ ក្នុងចំណោមគណបក្សនយោបាយចំនួន១៣ ដែលបានចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ បានធ្វើយុទ្ធនាការឃោសនារកសំឡេងឆ្នោតដោយការហែក្បួន ក្នុងនោះមាន៖ ១.គណបក្សភ្លើងទៀន បានហែក្បួននៅឃុំចំនួន៣ ក្នុងស្រុកស្វាយលើ រួមមាន ៖ ឃុំបឹងមាលា, ឃុំស្វាយលើ និងឃុំតាសៀម មានអ្នកចូលរួមសរុបចំនួន ៣៣៥នាក់ ក្នុងនោះស្រីចំនួន ១៥៧នាក់ និង២.គណបក្សហ៊្វុនស៊ិនប៉ិច បានធ្វើការហែក្បួននៅសង្កាត់ចំនួន៩ ក្នុងក្រុងសៀមរាប មានសង្កាត់នគរធំ, សង្កាត់ស្វាយដង្គុំ, សង្កាត់គោកចក, សង្កាត់ទឹកវិល, សង្កាត់ក្របីរៀល, សង្កាត់សំបួរ, សង្កាត់សៀមរាប និងសង្កាត់ចុងឃ្នៀស ដោយមានអ្នកចូលរួមសរុបចំនួន ៣០០នាក់ ក្នុងនោះស្រី ចំនួន ១០២នាក់។
លោក នឹម វ៉ាន់សំ បន្តថា ក្រៅពីការហែក្បួន មានគណបក្សនយោបាយចំនួន៨ បានធ្វើសកម្មភាពដោយការចែកខិត្តប័ណ្ណ, ការជួបប្រជុំ និងការចាក់មេក្រូ រួមមាន៖ ១.គណបក្សប្រជាជនកម្ពុជា, ២.គណបក្សភ្លើងទៀន, ៣.គណបក្សហ្វ៊ុនស៊ិនប៉ិច, ៤.គណបក្សរួបរួមជាតិ, ៥.គណបក្សខ្មែរស្រឡាញ់ជាតិ, ៦.គណបក្សកម្ពុជានិយម, ៧.គណបក្សប្រជាធិបតេយ្យមូលដ្ឋាន និង៨.គណបក្សឆន្ទៈខ្មែរ។
លោកប្រធានគណៈកម្មការ បានបន្តទៀតថា ការឃោសនាបោះឆ្នោតមានរយៈពេល ១៤ថ្ងៃ ដោយចាប់ផ្តើមពីថ្ងៃទី២១ ខែឧសភា រហូតដល់ថ្ងៃទី០៣ ខែមិថុនា ឆ្នាំ២០២២ ហើយបើគិតចាប់ពីថ្ងៃទី២១ ដែលជាថ្ងៃបើកយុទ្ធនាការឃោសនារកសំឡេងឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ រហូតមកទល់ថ្ងៃទី២៦ ខែឧសភានេះ សភាពការណ៍សន្តិសុខ និងសុវត្ថិភាពទូទៅ មិនមានបញ្ហាអ្វីកើតឡើងគួរឲ្យកត់សម្គាល់នោះឡើយ ខណៈគណៈកម្មការឃុំសង្កាត់ រៀបចំការបោះឆ្នោត បាននឹងកំពុងសហការជាមួយអាជ្ញាធរដែនដី ក្នុងការរៀបចំតម្រាយផ្លូវឱ្យគណបក្សនយោបាយ ព្រមទាំងមានការបែងចែកពេលវេលា ដើម្បីចៀសវាងកុំឱ្យមានការប្រឈមការទល់មុខគ្នាក្នុងការដង្ហែក្បួនទាំងឡាយ។
សូមបញ្ជាក់ថា ក្នុងទូទាំងខេត្តសៀមរាប មានឃុំសង្កាត់ចំនួន១០០ មានការិយាល័យបោះឆ្នោតចំនួន១.៥០៨ការិយាល័យ និងអ្នកមានឈ្មោះក្នុ ងបញ្ជីបោះឆ្នោតចំនួន ៥៨៨.៥៣៣នាក់ ដែលមានគណបក្សនយោបាយចំនួន១៣ ចូលរួមប្រកួតប្រជែង រួមមាន ៖ ១.គណបក្សប្រជាជនកម្ពុជា, ២.គណបក្សភ្លើងទៀន, ៣.គណបក្សខ្មែររួបរួមជាតិ, ៤.គណបក្សហ៊្វុនស៊ិនប៉ិច, ៥.គណបក្សខ្មែរស្រឡាញ់ជាតិ, ៦.គណបក្សប្រជាធិបតេយ្យមូលដ្ឋាន, ៧.គណបក្សឆន្ទៈខ្មែរ, ៨.គណបក្សសំបុកឃ្មុំសង្គមប្រជាធិបតេយ្យ, ៩.គណបក្សកែទម្រង់កម្ពុជា, ១០.គណបក្សកម្ពុជានិយម, ១១.គណបក្សសញ្ជាតិកម្ពុជា, ១២.គណបក្សយុវជនកម្ពុជា និង១៣.គណបក្សរស្មីខេមរា ហើយការបោះឆ្នោតនឹងធ្វើឡើងនៅថ្ងៃទី០៥ ខែមិថុនា ឆ្នាំ២០២២ ចាប់ពីម៉ោង ៧:០០ព្រឹក រហូតដល់ម៉ោង ៣:០០រសៀល៕
អត្ថបទ ៖ លោក លីវ សាន្ត
