នៅព្រឹកថ្ងៃទី២៧ ខែឧសភា ឆ្នាំ២០២២ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន បានទទួលជួបពិភាក្សាជាមួយ
លោក Li Tao អគ្គនាយក សារព័ត៌មានខ្មែរ AP Time ផ្សាយជាភាសាចិន ដើម្បីបង្ហាញពីវឌ្ឍនភាពការងារនៃដំណើរការរៀបចំកម្មវិធីប្រឡងសំនៀងជនពិការកម្ពុជា ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី២ ដែលបានរៀបចំរួចរាល់ហើយ ហើយយគ្រោងបើកដំណើរប្រឡងនាពាក់កណ្តាលខែមិថុនា ឆ្នាំ២០២២ បន្ទាប់ពីការបោះឆ្នោតជ្រើសរើសក្រុមប្រឹក្សាឃុំ សង្កាត់ រួចរាល់។
លោក Li Tao បានគោរពស្នើសុំសម្តេចតេជោនាយករដ្ឋមន្រ្តី ហ៊ុន សែន តាមរយៈឯកឧត្តម រដ្ឋមន្រ្តី ខៀវ កាញារីទ្ធ ដើម្បីថតជាវីដេអូក្លីប ១នាទី ដើម្បីបង្ហាញពីចំណាប់អារម្មណ៍គាំទ្រដល់កម្មវិធីប្រឡងសំនៀងជនពិការកម្ពុជា រួមជាមួយចំណាប់អារម្មណ៍របស់មន្រ្តីជាន់ខ្ពស់មួយចំនួន ក្នុងជួររាជរដ្ឋាភិបាលកម្ពុជាផងដែរ។ លោកក៏បានស្នើសុំអោយមានកិច្ចសហការគ្នារវាងសារព័ត៌មាន AP Time និងបណ្តាញសារព័ត៌មាន ឈានមុខ និងល្បីៗនៅកម្ពុជា ដើម្បីរួមគ្នាផ្សព្វផ្សាយកម្មវិធីប្រឡងសំនៀងជនពិការនេះ បានទូលំទូលាយ និងស្នើដល់ក្រសួងព័ត៌មាន ជួយណែនាំក្រុមហ៊ុន សហគ្រាសនៅកម្ពុជា ដែលមានការចាប់អារម្មណ៍ សូមចូលរួមឧបត្តម្ភ ដើម្បីអោយដំណើរការកម្មវិធីបានដោយរលូន និងទទួលបានជោគជ័យ។
ឯកឧត្តម រដ្ឋមន្រ្តី ខៀវ កាញារីទ្ធ បានឯកភាពចំពោះការស្នើសុំរបស់ថ្នាក់ដឹកនាំសារព័ត៌មាន APTime ដើម្បីថតក្លីបបវីដេអូខ្លី នូវប្រសាសន៍របស់ប្រមុខរាជរដ្ឋាភិបាលកម្ពុជា ទាក់ទងដល់ដំណើរការកម្មវិធីប្រឡងសំនៀងជនពិការ ហើយសំណើរនេះនឹងដាក់ជូនទៅសម្តេចតេជោ ពិនិត្យសម្រេចនាពេលខាងមុខ។ ទាក់ទងគោលបំណង ចង់ធ្វើកិច្ចសហការគ្នារវាង AP Time និងបណ្តាស្ថានីយ៍វិទ្យុ ទូរទស្សន៍ រួមទាំងស្ថាប័នសារព័ត៌មានឈានមុខគេនៅកម្ពុជា ឯកឧត្តមរដ្ឋមន្រ្តី នឹងជួយសម្របសម្រួលក្នុងកិច្ចការងារនេះ ដើម្បីអោយការផ្សព្វផ្សាយពីដំណើរការប្រឡងសំនៀងជនពិការកម្ពុជា បានទូលំទូលាយបន្ថែមទៀត។
នៅក្នុងឱកាសនេះដែរ តន្រ្តីករ លោក Shen Jualin បានឧបត្តម្ភតាមរយៈការផ្ទេរ និងប្រគល់កម្មសិទ្ធិបញ្ញា នៃបទចម្រៀង ប្រចាំកម្មវិធី ប្រឡងសំនៀងជនពិការកម្ពុជា ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី២ ដែលមានចំណងជើងថា «សន្តិភាព និងក្តីសង្ឃឹម» ជូនដល់ក្រុមការងារដើម្បីប្រើប្រាស់ចាប់ពីពេលនេះតទៅ៕
#ទូរទស្សន៍ជាតិកម្ពុជា
