ថ្លែងក្នុងកិច្ចប្រជុំបូកសរុបការងារប្រចាំឆ្នាំ២០២១ និងលើទិសដៅ ២០២២ របស់គណៈគិលានុបដ្ឋាកកម្ពុជា នៅខេត្តសៀមរាប នាព្រឹកថ្ងៃទី២៧ ខែឧសភា ឆ្នាំ២០២២នេះ លោកសាស្រ្តាចារ្យ ឃុន លាងឈុន នាយករងមន្ទីរពេទ្យជ័យវរ្ម័នទី៧ ឬមន្ទីរពេទ្យកុមារគន្ធបុប្ផាខេត្ដសៀមរាប បានលើកឡើងថា ក្រុមគិលានុបដ្ឋាកកម្ពុជា និងក្រុមគ្រូពេទ្យទាងអស់ បើធ្វើជាគ្រូពេទ្យ ត្រូវមានបេះដូងជាពេទ្យ ដើម្បីបានបង្ហាញឱ្យឃើញពីការលះបង់គ្រប់បែបយ៉ាង ដើម្បីជួយសង្គ្រោះអាយុជីវិតរបស់ប្រជាជន។
លោកសាស្រ្តាចារ្យ មានប្រសាសន៍ថា នៅក្នុងអំឡុងនៃការរាតត្បាតខ្លាំងនៃមេរោគកូវិដ-១៩ គិលានុបដ្ឋាកម្ពុជាយើង បានចូលរួមយ៉ាងសកម្ម ក្នុងការប្រយុទ្ធប្រឆាំងយ៉ាងខ្លាំងខ្លា ដែលនិយាយបានថា ក្រុមគ្រូពេទ្យ ជាវីរៈបុរស់អាវស ឬកងទ័ពអាវស ដែលសកម្មភាពទាំងនេះ បានបង្ហាញឱ្យឃើញពីការលះបង់គ្រប់បែបយ៉ាង ដើម្បីជួយសង្គ្រោះអាយុជីវិតរបស់ប្រជាជនកម្ពុជា បើទោះបីដឹងថា ខ្លួនប្រឈម និងគ្រោះថ្នាក់គ្រប់ពេលក៏ដោយ ដែលទាំងនេះហើយដែលហៅថា ធ្វើពេទ្យមានបេះដូងជាពេទ្យ។ ប៉ុន្តែបើទោះបីជាគិលានុបដ្ឋាមួយចំនួនធំ បានគោរពក្រមសីលធម៌ ភាពសុច្ចរិតយុត្តិធម៌ និងភក្តីភាព និងការមើលថែអ្នកជំងឺប្រកបដោយវិជ្ជាជីវៈក៏ពិតមែន ប៉ុន្តែក៏នៅមានគិលានុបដ្ឋាមួយចំនួនតូច នូវមិនទាន់អនុវត្តគោរពក្រមសីលធម៌បានល្អ ដែលធ្វើឱ្យមានការប៉ះពាល់ដល់វិស័យសុខាភិបាលយើងខ្លះដែរ។
លោកសាស្រ្តាចារ្យ ក៏បានណែនាំឱ្យគិលានុបដ្ឋាកទាំងអស់ បើធ្វើជាពេទ្យ ត្រូវមានបេះដូងជាពេទ្យ មានន័យថា ធ្វើជាពេទ្យពេលមានអ្នកជំងឺមកជួបយើងឱ្យជួយសង្គ្រោះជីវិត គ្រូពេទ្យត្រូវតែធ្វើតួនាទីរបស់ខ្លួនឱ្យបានល្អ គឺសង្គ្រោះជីវិតមនុស្សឱ្យបានទាន់ពេលវេលា និងមើលថែប្រកបដោយវិជ្ជាជីវៈ និងមានក្រមសីលធម៌ល្អ។
មានប្រសាសន៍ក្នុងឱកាសនោះដែរលោកអនុបណ្ឌិត អ៊ុន សាន ប្រធានក្រុមប្រឹក្សាគណៈគិលានុបដ្ឋាជាតិ បានបញ្ជាក់ថា គណៈគិលានុបដ្ឋាកកម្ពុជាបង្កើតឡើង ក្នុងគោលបំណង គឺពង្រឹងការលើកកំពស់សុខមាលភាពជូនប្រជាពលរដ្ឋស្របតាមគោលនយោបាយជាតិ កាត់បន្ថយបាតុភាពអវិជ្ជមាន បណ្តាលមកពីការមិនគោរពឱ្យបានត្រឹមត្រូវនូវគោលការណ៍ក្រមសីលធម៌ វិជ្ជាជីវៈថែទាំ និងដើម្បីការពារកិត្តិយស និងឥស្សរៈភាពរបស់វិជ្ជាជីវៈ និងដើម្បីធ្វើយ៉ាងណាឱ្យសម្រេចបានទិសដៅសំខាន់ៗ ក្នុងការអនុវត្តឱ្យស្របតាមក្រមសីលធម៌ ផ្ដល់ការថែទាំព្យាបាលអ្នកជំងឺឱ្យមានគុណភាព។ គិលានុបដ្ឋា ដែលប្រកបវិជ្ជាជីវៈថែទាំ ទាំងសេវាសាធារណៈ និងឯកជន ត្រូវតែគោរពកិច្ចការរបស់ខ្លួនដោយចុះបញ្ជីកា និងមានអាជ្ញាបណ្ណក្នុងការប្រកបវិជ្ជាជីវៈថែទាំ ស្របតាមព្រះរាជក្រម ស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាល ដើម្បីជាប្រយោជន៍ក្នុងការលើកកំពស់វិជ្ជាជីវៈថែទាំនៅកម្ពុជា។ សម្រាប់បច្ចុប្បន្ននេះសម្រាប់មន្ទីរពេទ្យណា ដែលគិលានុបដ្ឋាគោរពក្រមសីលធម៌ ភាពសុច្ចរិតយុត្តិធម៌ និងភក្តីភាព និងការមើលថែអ្នកជំងឺប្រកបដោយវិជ្ជាជីវៈ និងទទួលបានការលើទឹកចិត្ត និងរង្វាន់ផងដែរ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
