ថ្លែងទៅកាន់សមាជិក សមាជិកា គណៈបក្សប្រជាជនកម្ពុជា នៅឃុំស្លែងស្ពាន ស្រុកស្រីស្នំ ខេត្តសៀមរាប ក្នុងឱកាសយុទ្ឋនាការឃោសបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥ នៅព្រឹកថ្ងៃទី២៧ ខែឧសភា ឆ្នាំ២០២២ ឯកឧត្តមបណ្ឌិត អ្នកឧកញ៉ា សៀង ណាំ តំណាងរាស្រ្តមណ្ឌលសៀមរាប បានអំពាវនាវដល់បងប្អូនពលរដ្ឋ ដែលមានឈ្មោះក្នុងបញ្ជីបោះឆ្នោត សូមអញ្ជើញទៅបោះឆ្នោតគ្នា នៅថ្ងៃអាទិត្យ ទី៥ ខែមិថុនា ឆ្នាំ២០២២ខាងមុខ នៅការិយាល័យដែលបងប្អូនបានចុះឈ្មោះ ដើម្បីជ្រើរើសនូវថ្នាក់ដឹកនាំដែលបងប្អូនពេញចិត្ត ក្នុងការដឹកនាំភូមិឃុំ-សង្កាត់របស់បងប្អូន។
ឯកឧត្តមបណ្ដិត មានប្រសាសន៍ថា គណបក្សប្រជាជនកម្ពុជា គឺជាគណបក្សចាស់ទុំបំផុត ព្រមទាំងជាគណបក្សដែលបាន កសាងសមិទ្ធផលជូនជាតិ និងប្រជាជនយ៉ាងច្រើនអនេក ជាពិសេសបានកម្ចាត់របបប្រល័យពូជសាសន៍ សង្គ្រោះជាតិនិងអាយុជីវិតប្រជាជនឱ្យផុតពីការស្លាប់ ព្រមទាំងទប់ស្កាត់ធ្វើឱ្យរបបនេះ មិនអាចវិលត្រឡប់មកវិញបាន នាំមកជូនប្រជាជន នូវសិទ្ធិសេរីភាពគ្រប់បែបយ៉ាង ព្រមទាំងសេចក្ដីថ្លៃថ្នូរ ដែលបានបាត់បង់ទាំងស្រុង ក្នុងរបបកម្ពុជាប្រជាធិបតេយ្យ។ គណៈបក្សប្រជាជនកម្ពុជា បានធ្វើជាកម្លាំងស្នូលនៃការផ្សះផ្សាបង្រួបបង្រួមជាតិ រហូតដល់មានកិច្ចព្រមព្រៀងសន្តិភាពទីក្រុងប៉ារីស និងការបញ្ចប់សង្គ្រាមដែលរ៉ាំរ៉ៃរាប់ទសវត្ស បង្កើតបាននូវសន្តិភាព ធ្វើឱ្យមានឯកភាពជាតិ និងឯកភាពទឹកដី មិនតែប៉ុណ្ណោះនៅបានពង្រឹង និងពង្រីកលទ្ធិប្រជាធិបតេយ្យសេរីពហុបក្ស និងនីតិរដ្ឋ ដែលជាមូលដ្ឋាននៃសុខដុម របស់សង្គមជាតិ។
ឯកឧត្តមតំណាងរាស្ត្រ ក៍បានលើកឡើងពីសមិទ្ឋផលដែលគណៈបក្សប្រជាជនកម្ពុជាបានស្តារសេដ្ឋកិច្ច និងសង្គម ពីស្ថានភាពខ្ទេចខ្ទីឱ្យមានការអភិវឌ្ឍគ្រប់វិស័យ ហើយកម្ពុជាបាន ស្ថិតក្នុងចំណោមប្រទេសដែលសម្រេចបានកំណើនសេដ្ឋកិច្ចខ្ពស់ និងសម្រេចបានវឌ្ឍនភាពល្អ ប្រសើរក្នុងការកាត់បន្ថយភាពក្រីក្រ ជាពិសេសភាពជោគជ័យក្នុងការប្រយុទ្ធនឹងជំងឺកូវីដ-១៩ ដោយបានចាក់វ៉ាក់សាំងជូនប្រជាពលរដ្ឋដណ្តប់បានទូទាំងប្រទេស និងការពារបានយ៉ាងគត់មត់ នូវឯករាជ្យ អធិបតេយ្យ និងបូរណភាពដែនដី ព្រមទាំងការថែរក្សាសន្តិភាព ស្ថិរភាពនយោបាយ និងសណ្តាប់ធ្នាប់សាធារណៈផងដែរ។
បើតាមរបាយការណ៍របស់លោក ឈឹម ច្រៃ អនុប្រធានគណៈបក្សឃុំស្លែងស្ពាន និងជាបេក្ខជនលេខរៀងទី២ នៃគណៈបក្សប្រជាជនកម្ពុជា បានឲ្យដឹងថា ឃុំស្លែងស្ពាន មានភូមិចំនួន១៥ មានប្រជាពលរដ្ឋសរុបចំនួន ១៣.៤៤៥នាក់ ស្រី ៦.៧៣៤នាក់ ក្នុងនោះប្រជាពលរដ្ឋមានអាយុ ១៨ឆ្នាំឡើង ចំនួន ៨.៣៨១នាក់ ស្រី ៤៨១២នាក់៕
អត្ថបទ៖ លោក យូ វង្ស
រូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
