នៅល្ងាចថ្ងៃទី២៨ ខែឧសភា ឆ្នាំ២០២២ នាបរិវេណសួនច្បារព្រះរាជដំណាក់ក្នុងក្រុងសៀមរាប មានរៀបចំពិធីបើកការប្រកួតប្រដាល់គុនខ្មែរប្រចាំប្រទេសរបស់ក្រុមហ៊ុន WURKZ ក្រោមគណអធិបតីភាព លោក នាក់ ណេរ៉ុន អភិបាលរងខេត្ត តំណាងឯកឧត្ដម ទៀ សីហា អភិបាលខេត្តសៀមរាប និង ឯកឧត្តម ឧត្តមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់គុនខ្មែរកម្ពុជា រួមជាមួយការគាំទ្រពីសំណាក់បងប្អូនប្រជាពលរដ្ឋក្នុងខេត្តសៀមរាបជាច្រើន។
គោលបំណងនៃការរៀបចំការប្រកួតកីឡាគុនខ្មែរប្រចាំប្រទេសនាពេលនេះ គឺដើម្បីចូលរួមថែរក្សាកេរ្តិ៍ដំណែលដូនតាខ្មែរ លើកទឹកចិត្តដល់កីឡាករ លើកកម្ពស់ការលេងកីឡា និងមិត្តភាព។ ដូចនេះ ការប្រកួតដណ្ដើមពានរង្វាន់ប្រាក់លាន និងខ្សែក្រវាត់នេះ នឹងជួយជំរុញ និងលើកទឹកចិត្តដល់កីឡាករទាំងអស់ បានបញ្ចេញសមត្ថភាព ក្នុងការទទួលបានជ័យជំនះ ក៏ដូចជាបទពិសោធន៍បន្ថែមទៀត។ ជាមួយគ្នានេះ គណៈអធិបតី ក៏បានសំណូមពរដល់កីឡាករទាំងអស់ សូមរក្សាឱ្យបាននូវសាមគ្គីភាព ប្រកាន់នូវការអធ្យាស្រ័យយោគយល់គ្នា ចំពោះកំហុសឆ្គងដោយអចេតនាណាមួយរវាងគូរប្រកួត និងរក្សាឱ្យបានសេចក្តីថ្លៃថ្នូរក្នុងពេលប្រកួត។
សូមជម្រាបថា ជារៀងរាល់សប្តាហ៍ ព្រឹត្តិការណ៍កីឡាប្រដាល់គុនខ្មែររបស់របស់ក្រុមហ៊ុន WURKZ នេះ នឹងធ្វើដំណើរទៅកាន់ខេត្តក្រុងនានា ដើម្បីផ្ដល់ជូនទស្សនីយភាពជូនប្រជាពលរដ្ឋ ទស្សនាប្រដាល់ផ្ទាល់ភ្នែក ព្រមទាំងទទួលយកការកម្សាន្ត។ ដូច្នេះការរីកចម្រើន នៃវិស័យកីឡាក្នុងប្រទេស នឹងចូលរួមលើកស្ទួយកិត្តិយសជាតិយើង ឱ្យអន្តជាតិបានស្គាល់វប្បធម៌ ទំនៀមទម្លាប់ ប្រពៃណីខ្មែរ មិនតែប៉ុណ្ណោះ កីឡាបានផ្តល់ឱ្យយើងនូវសាមគ្គីភាព មិត្តភាព រវាងបណ្តាប្រទេសនៅលើសកលលោក ដូចពាក្យស្លោកថា «កីឡាជាទូតសន្តិភាព» ៕
ប្រភព និងរូបភាព៖ រដ្ឋបាលខេត្តសៀមរាប
