នៅថ្ងៃទី២៨ ខែឧសភា ឆ្នាំ២០២២ លោក នាក់ ណេរ៉ុន អភិបាលរងខេត្ត តំណាងឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប រួមជាមួយអាជ្ញាធរស្រុកជីក្រែង និងបងប្អូនប្រជាពលរដ្ឋក្នុងមូលដ្ឋាន បានចុះពិនិត្យមើលស្ថានភាពដីនៅតំបន់២ និងតំបន់៣ ក្នុងភូមិសាស្ត្រឃុំស្ពានត្នោត និងឃុំអន្លង់សំណរ ដែលប្រជាពលរដ្ឋកំពុងអាស្រ័យផលយូរឆ្នាំ និងតំបន់មួយចំនួនទៀតជាភូមិចាស់របស់ពួកគាត់ ដើម្បីធ្វើការផ្សព្វផ្សាយអំពីគោលនយោបាយរបស់រាជរដ្ឋាភិបាលទៅលើការអភិរក្ស និងការយកចិត្តទុកដាក់លើផលប្រយោជន៍របស់ប្រជាពលរដ្ឋដែលរស់នៅតំបន់បឹងទន្លេសាប។
លោកអភិបាលរងខេត្ត បានបង្ហាញថា ការចុះពិនិត្យនាពេលនេះ គឺអនុវត្តន៍តាមបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្ដេចបានថ្លែងសារពិសេសស្តីពីបឹងទន្លេសាប ដោយបានកំណត់ថា បឹងទន្លេសាបជាបឹងដ៏ធំមួយ និងជាប្រភពពូជត្រីច្រើនប្រភេទ ដែលទាមទារឱ្យមានការយកចិត្តទុកដាក់ថែរក្សា និងអភិរក្ស។ ជាមួយនោះ តំបន់បឹងទន្លេសាប ត្រូវចែកចេញជា ៤តំបន់ ហើយតំបន់ទី៤ ជាតំបន់ដែលទាមទារឱ្យមានការអភិរក្សជាដាច់ខាត ក្នុងនោះដែរតំបន់បឹងទន្លេសាប ត្រូវចែកជាពីរកត្តាចាំបាច់ គឺទី១ ការអភិរក្ស និងទី២ គឺត្រូវតែគិតដល់ផលប្រយោជន៍ប្រជាពលរដ្ឋ ដែលរស់នៅជុំវិញបឹងទន្លេសាបនោះ ។ បន្ថែមពីនោះ បញ្ហាបឹងទន្លេសាប ត្រូវគិតលើគោលការណ៍សំខាន់ចំនួន៣ ហើយគោលការណ៍ ដែលត្រូវយកចិត្តទុកដាក់នោះ គឺគោលការណ៍ថ្លឹងថ្លែងជាមួយការអភិរក្ស និងគោលការណ៍រស់នៅរបស់ប្រជាពលរដ្ឋជាក់ស្តែង ។
លោកអភិបាលរងខេត្ត ក៏បានបញ្ជាក់អំពីសាររបស់សម្តេចតេជោ នាយករដ្ឋមន្ត្រីបន្ថែមថា អាជ្ញាធរពាក់ព័ន្ធទាំងអស់ត្រូវពិនិត្យពិចារណាស្ថានភាពជាក់ស្តែង ដោយកាត់ឆ្វៀលដីពីតំបន់២ និងតំបន់៣ ជូនទៅប្រជាពលរដ្ឋ ដែលរស់នៅជាក់ស្តែង និងបានណែនាំឱ្យកែសម្រួលព្រំប្រទល់តំបន់២ និងតំបន់៣ឡើងវិញ ទៅតាមស្ថានភាពជាក់ស្តែងនៃការអាស្រ័យផលរបស់ប្រជាពលរដ្ឋ។ ម្យ៉ាងទៀត ទីតាំងដែលប្រជាពលរដ្ឋ អាស្រ័យផលរាប់សិបឆ្នាំមកហើយនោះ គឺត្រូវរក្សា និងចេញកម្មសិទ្ធិជូនពួកគាត់។ ហើយរាជរដ្ឋាភិបាលកម្ពុជា ប្រឆាំងដាច់ខាតចំពោះអ្នកមានអំណាច និងអ្នកមានលុយ ហើយទៅជ្រកក្រោមរូបភាពជាប្រជាពលរដ្ឋ ហើយបានកាប់ទន្ទ្រានដី ដែលត្រូវបានហាមឃាត់នៅបឹងទន្លេសាប។
លោកអភិបាលរងខេត្ត ក៏បានសង្កត់ធ្ងន់ផងដែរចំពោះអ្នកមានអំណាច អ្នកមានលុយ ដែលជ្រកក្រោមរូបភាពជាប្រជាពលរដ្ឋ ហើយបានកាប់ទន្ទ្រានដី ដែលត្រូវបានហាមឃាត់នៅបឹងទន្លេសាប។ ការអាស្រ័យផលយូរឆ្នាំនេះ មិនរាប់អ្នកទើបទៅកាន់កាប់ត្រឹមតែ ២ ឬ ៣ឆ្នាំនោះទេ។ ទន្ទឹមនឹនេះ សូមប្រជាពលរដ្ឋ ដែលទទួលបានការកាត់ឆ្វៀលដីហើយនោះ សូមកុំបន្តកាប់ទន្ទ្រានដី ដែលត្រូវបានអភិរក្សបន្តទៅទៀត ។ ដីដែលកាត់ឆ្វៀលជូនប្រជាពលរដ្ឋ គឺជាដីដែលពលរដ្ឋអាស្រ័យផលយ៉ាងតិចបំផុត១០ឆ្នាំ ឬដីលំនៅឋានជាក់ស្តែង៕
ប្រភព និងរូបភាព៖ រដ្ឋបាលខេត្តសៀមរាប
