នៅរសៀល ថ្ងៃទី២៨ ខែឧសភា ឆ្នាំ២០២២ លោក ស៊ិន ចាន់ថុល អភិបាលស្រុកពួក តំណាងលោក ប្រាក់ សោភ័ណ អភិបាលរងខេត្ត និងជាប្រធានក្រុមការងារទី៥ បានចុះផ្សព្វផ្សាយពីអនុសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ស្តីពីបឹងទន្លេសាប ដោយមានការចូលរួមពីមន្ទីរ អង្គភាព និងអ្នកពាក់ព័ន្ធ ព្រមទាំងប្រជាពលរដ្ឋប្រមាណជាង៤០០នាក់ មកពីឃុំចំនួន ៣ គឺឃុំល្វា ឃុំមុខប៉ែន និងឃុំសសរស្តម្ភ នៃស្រុកពួក ខេត្តសៀមរាប។
ដោយមានការគិតគូរខ្ពស់ពីទុកលំបាករបស់ប្រជាពលរដ្ឋ កាលពីថ្ងៃទី២៧ ខែឧសភាកន្លងមកនេះ សម្ដេចតេជោ ហ៊ុន សែន បានដាក់បទបញ្ជាឱ្យអាជ្ញាធរពាក់ព័ន្ធ ចុះសិក្សាដីរបស់ប្រជាពលរដ្ឋ ដែលបានរស់នៅ និងអាស្រ័យផលយូរឆ្នាំ ស្ថិតនៅក្នុងតំបន់២ និងតំបន់៣ នៃបឹងទន្លេសាប ដើម្បីធ្វើការកាត់ឆ្វៀល នៅតាមទីតាំងរបស់ប្រជាពលរដ្ឋជាក់ស្ដែង។ ដូច្នេះ ការកែសម្រួលនេះ ប្រជាពលរដ្ឋ នឹងអាចទទួលបានដីកម្មសិទ្ធ ឬអាស្រ័យផលដោយស្របច្បាប់ ទៅតាមការចុះសិក្សារបស់អាជ្ញាធរជំនាញ។
តាមរយៈការចុះផ្សព្វផ្សាយនាពេលនេះ បងប្អូនប្រជាពលរដ្ឋស្ថិតក្នុងឃុំទាំង៣ បានបង្ហាញការសាទរ និងសូមថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ជាពិសេស សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលបានគិតគូរយ៉ាងពិតប្រាកដពីសុខទុក្ខ ក៏ដូចជាផលប្រយោជន៍របស់បងប្អូនប្រជាពលរដ្ឋដែលបានកាន់កាប់ និងអាស្រ័យផលយូរឆ្នាំមក រហូតដល់បច្ចុប្បន្ន។
បន្ទាប់ពីបញ្ចប់ការសំណាលសំណេះជាមួយប្រជាពលរដ្ឋទាំង៣ឃុំ ក្រុមការងារបានបន្តកិច្ចប្រជុំពិភាក្សានៅសាលាស្រុកពួក ដើម្បីរៀបចំផែនការ និងសកម្មភាពអនុវត្តន៍ការងារចុះពិនិត្យ និងសិក្សាលើទីតាំងដីប្រជាពលរដ្ឋផ្ទាល់ ដើម្បីធានាបានប្រសិទ្ធភាពការងារ ភាពត្រឹមត្រូវ និងរក្សាផលប្រយោជន៍ជូនប្រជាជន៕
ប្រភព និងរូបភាព៖ រដ្ឋបាលខេត្តសៀមរាប
