កាលពីរសៀលថ្ងៃទី២៨ ខែឧសភា ឆ្នាំ២០២២ម្សិលមិញនេះ ឯកឧត្តម ជា ច័ន្ទបរិបូរណ៍ ប្រធានក្រុមការងាររាជរដ្ឋាភិបាលចុះជួយស្រុកក្រឡាញ់ បានជួបសំណេះសំណាលជាមួយបងប្អូនប្រជាពលរដ្ឋរស់នៅក្នុងឃុំចំនួន២ គឺឃុំសំបួរ និងឃុំស្រណាល ដែលកំពុងអាស្រ័យផលនៅលើផ្ទៃដីក្នុងតំបន់៣ នៃតំបន់បឹងទន្លេសាបស្ថិតក្នុងភូមិសាស្ត្រស្រុកក្រឡាញ់ ខេត្តសៀមរាប ពិសេសដើម្បីធ្វើការផ្សព្វផ្សាយប្រសាសន៍របស់ម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អំពីការកែសម្រួលការបោះបង្គោលព្រំប្រទល់ដី និងកាត់ឆ្វៀលដីនៅក្នុងតំបន់បឹងទន្លេសាបជូនប្រជាពលរដ្ឋដែលបានអាស្រ័យផលជាក់ស្ដែងយូរឆ្នាំ រួមទាំងការផ្សព្វផ្សាយអំពីគោលនយោបាយរបស់រាជរដ្ឋាភិបាលទៅលើការអភិរក្ស និងការយកចិត្តទុកដាក់លើផលប្រយោជន៍របស់ប្រជាពលរដ្ឋដែលរស់នៅតំបន់បឹងទន្លេសាប ។
លោកស្រី ម៉ននី រង្សី អភិបាលស្រុកក្រឡាញ់ បានឲ្យដឹងថា នៅឆ្នាំ២០១២ រាជរដ្ឋាភិបាលបានចេញអនុក្រិតស្តីពីការកំណត់ដែនព្រៃលិចទឹកស្ថិតនៅក្នុងខេត្តចំនួន៦ជុំវិញបឹងទន្លេសាប ក្នុងនោះខេត្តសៀមរាប មានស្រុកក្រុងចំនួន៦ដែលមានភូមិសាស្ត្រស្ថិតនៅជាប់បឹងទន្លេសាប ហើយនៅឆ្នាំ២០១២នោះដែរ គណៈកម្មការក្រុមការងារខេត្ត និងស្រុកបានវាស់វែងនិងបែងចែកជូនដល់បងប្អូនដែលកំពុងអាស្រ័យផលជាក់ស្តែងចំនួន៣៨១គ្រួសារ មានផ្ទៃដីសរុបចំនួន៩០២ហិកតា ប៉ុន្តែថ្មីៗនេះ សម្តេចតេជោ ហ៊ុន សែន បានផ្តល់នូវអនុសាសន៍ដល់អាជ្ញាធរខេត្តស្ថិតនៅជាប់បឹងទន្លេសាប ឲ្យដឹកនាំអាជ្ញាធរក្រុងស្រុក ឃុំសង្កាត់និងមន្ត្រីអាជ្ញាធរជំនាញនានា ចុះពិនិត្យនិងវាយតម្លៃឱ្យបានច្បាស់លាស់ អំពីការរស់នៅនិងការអាស្រ័យផលរបស់ប្រជាកសិករ ថាតើគ្រួសារពួកគាត់ពិតជាមានលំនៅឋានអចិន្ត្រៃនិងកំពុងអាស្រ័យផលធ្វើស្រែតាំងពីយូរមកហើយឬក៍ត្រឹម១០ឆ្នាំចុះក្រោមនៅតំបន់ព្រៃលិចទឹកនៃភូមិសាស្ត្របឹងទន្លេសាប ដើម្បីផ្តល់សិទ្ឋិឱ្យគាត់ប្រើប្រាស់ ។
លោកស្រីអភិបាលស្រុក បន្តថា នៅពេលឆាប់ៗខាងមុខនេះ អាជ្ញាធរខេត្ត ក្រោមការដឹកនាំរបស់ ឯកឧត្តម ទៀ សីហា អភិបាលនៃគណៈអភិបាលខេត្ត នឹងចាត់តាំងដឹកនាំក្រុមការងារនិងមន្ត្រីជំនាញ ដើម្បីពិនិត្យវាស់វែងនិងបោះបង្គោលទៅតាមនិយាមការលើដីជាក់ស្តែងដែលបងប្អូនបានរស់នៅ និងអាស្រ័យផលជាយូរមកហើយ ហេតុនេះ សូមបងប្អូនប្រជាពលរដ្ឋទាំងអស់ កុំជឿការញុះញង់ពីក្រុមឈ្មួញនិងក្រុមជនដែលបន្លំបោកប្រាស់ដោយយកបងប្អូនធ្វើជាខ្នងបង្អែក ដើម្បីទទួលបានសិទ្ឋិកាន់កាន់ដីតំបន់នោះដែលនាំឱ្យមានបញ្ហាប្រឈមនឹងផ្លូវច្បាប់។
មានប្រសាសន៍សំណេះសំណាលក្នុងឱកាសនោះ ជំនួសមុខឲ្យបងប្អូនប្រជាពលរដ្ឋក្នុងស្រុកក្រឡាញ់ដែលកំពុងអាស្រ័យផលលើដីក្នុងតំបន់៣នៃភូមិសាស្ត្របឹងទន្លេសាប ឯកឧត្តម ជា ច័ន្ទបរិបូរណ៍ ប្រធានក្រុមការងាររាជរដ្ឋាភិបាលចុះជួយស្រុកក្រឡាញ់ បានថ្លែងនូវអំណរគុណយ៉ាងជ្រាលជ្រៅជាទីបំផុតចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលគ្រប់ទីកន្លែងគ្រប់ពេលវេលា សម្តេចតែងតែយកចិត្តទុកដាក់ពីសុខទុក្ខ និងការលំបាក ដល់បងប្អូនប្រជាពលរដ្ឋជានិច្ច ។
ឯកឧត្តម មានប្រសាសន៍បន្តថា ៖ កាលពីថ្ងៃទី២៧ ខែឧសភា ឆ្នាំ២០២២ សម្ដេចតេជោ ហ៊ុន សែន បានថ្លែងសារពិសេសជូនបងប្អូនជនរួមជាតិស្តីអំពីបញ្ហាបឹងទន្លេសាប ដែលនេះជាយុទ្ឋសាស្ត្រជោគជ័យថ្មីមួយទៀតរបស់ប្រមុខរាជរដ្ឋាភិបាលក្នុងការកាត់តម្រឹម និងវែករកឈ្មួញឬជនខិលខូច ដែលបន្លំដោយយកខ្នងប្រជាកសិករជាខ្នងបង្អែក បិទបាំងភាពលោកភលន់របស់ខ្លួន ដើម្បីស្រាវជ្រាវនិងចាត់ការពួកទាំងនោះទៅតាមនិតិវិធីច្បាប់ ។ឯកឧត្តម មានប្រសាសន៍ទៀតថា៖នេះជាយុទ្ឋសាស្ត្រដ៍ឈ្លាសវៃ មុតស្រួចនិងប៉ិនប្រសព្វប្រកបដោយគតិបណ្ឌិតរបស់សម្តេចតេជោសែន ហើយក្រោមការដឹកនាំរបស់សម្តេចដីស្រែកសិកម្មរបស់បងប្អូនមិនត្រូវបានយកពន្ឋអាករឡើយ។
ឯកឧត្តម ជា ច័ន្ទបរិបូរណ៍ បន្តថា ទីតាំងដែលបងប្អូនប្រជាពលរដ្ឋអាស្រ័យផលរាប់សិបឆ្នាំមកហើយនោះ គឺត្រូវរក្សា និងចេញកម្មសិទ្ធិជូនពួកគាត់ ហើយរាជរដ្ឋាភិបាលកម្ពុជាប្រឆាំងដាច់ខាតចំពោះអ្នកមានអំណាច និងអ្នកមានលុយ ហើយទៅជ្រកក្រោមរូបភាព ជាពលរដ្ឋ ហើយបានកាប់ទន្ទ្រានដីដែលត្រូវបានហាមឃាត់នៅបឹងទន្លេសាប ហើយភូមិឋាន និងទីលំនៅរបស់ប្រជាពលរដ្ឋ ដែលមានតាំងពីយូរលង់ណាស់មកហើយនោះ មិនអាចរុះរើចេញបាននោះឡើយ ហើយផ្ទៃដីដែលកាត់ឆ្វៀល គឺសំដៅអ្នកអាស្រ័យផលយូរឆ្នាំ មិនរាប់អ្នកទើបទៅកាន់កាប់ត្រឹមតែ២ ឬ៣ឆ្នាំនោះទេ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
