ក្រុមនិស្សិតអាហារូបករណ៍របស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន នៃវិទ្យាស្ថានខ្មែរជំនាន់ថ្មី ចំនួន ១៦៨នាក់ បានធ្វើកម្មសិក្សានៅតាមប្រាសាទបុរាណមួយចំនួនក្នុងតំបន់អង្គរ ដើម្បីស្វែងយល់ពីប្រវត្ដិសាស្ដ្រស្ថាបត្យកម្មរបស់ខ្មែរ បន្ទាប់ពីពួកគាត់ធ្លាប់បានសិក្សាតាមទ្រឹស្ដីមេរៀនកន្លងមក ដែលការធ្វើទស្សនកិច្ចនេះ ធ្វើឡើងមានរយៈពេល ៣ថ្ងៃ ចាប់ពីថ្ងៃទី២៧ ដល់ថ្ងៃទី២៩ ខែឧសភា ឆ្នាំ២០២២កន្លងទោនេះ។
បើតាមលោកបណ្ឌិត កុល សារូ នាយករងនៃវិទ្យាស្ថានខ្មែរជំនាន់ថ្មី ដែលជាអ្នកដឹកនាំក្រុមនិស្សិតផ្ទាល់ បានឲ្យដឹងថា ក្រុមនិស្សិតទាំង ១៦៨នាក់ ដែលចុះមកធ្វើការសិក្សាស្វែងយល់នាពេលនេះ ជានិស្សិតអាហាររូបករណ៍របស់សម្ដេចតេជោ ហ៊ុន សែន នាយករដ្ឋមន្ដ្រី និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានសិក្សានៅវិទ្យាស្ថានខ្មែរជំនាន់ថ្មី ថ្នាក់បរិញ្ញាប័ត្រ បរិញ្ញាប័ត្រជាន់ខ្ពស់ ពួកគាត់តែងតែទៅធ្វើទស្សនកិច្ចសិក្សាជារៀងរាល់ឆ្នាំ ពីសំណង់ប្រាសាទបុរាណនៅតំបន់អង្គរ ដែលនេះជាលើកទី១៩ ហើយ បន្ទាប់ពីបានអាក់ខានពីរឆ្នាំ ដោយសារការរាត្បាតនៃជំងឺកូវីដ-១៩។ ក្នុងរយៈពេល ៣ថ្ងៃនេះ ពួកគាត់បានចុះសិក្សាស្រាវជ្រាវនៅតាមសំណង់ប្រាសាទមួយចំនួនដែលស្ថិតនៅតំបន់អង្គរ រួមមាន ស្ពានកំពង់ក្ដី ប្រាសាទបាគង ប្រាសាទព្រះគោ ប្រាសាទបន្ទាយស្រី ប្រាសាទបន្ទាយសំរ៉ែ ប្រាសាទបាខែង ប្រាសាទអង្គរ និងប្រាសាទសំខាន់ៗមួយចំនួនទៀត។ក្រោយពេលបំពេញបេសសកម្ម ក្រុមនិស្សិតបានធ្វើបទបង្ហាញ តាមក្រុមនិមួយៗ បន្ទាប់ពីពួកគាត់បានស្វែងយល់ដឹងខ្លះៗពីបេតិកភ័ណ្ឌស្ថាបត្យកម្មសំណង់ប្រាសាទខ្មែរ។ ជាលទ្ធផលក្រុមនិស្សិតបានយល់កាន់តែច្បាស់ និងទទួលបានចំណេះដឹងបន្ថែមទៀតពីសម្បត្ដិបេតិកភ័ណ្ឌ បន្ទាប់ពីបានសិក្សាតាមទ្រឹស្ដី។
ក្នុងឱកាសនោះដែរក្រុមនិស្សិត ក៍បានថ្លែងអំណគុណដល់សម្ដេចតេជោ សម្ដេចកិត្ដិព្រឹទ្ធបណ្ឌិត ប៊ុន រ៉ានីហ៊ុន សែន និងលោកបណ្ឌិត ហ៊ុន ម៉ាណែត ដែលតែយកចិត្ដទុកដាក់ផ្ដល់អាហាររូបករណ៍ និងផ្ដល់ឱកាសឱ្យក្រុមនិស្សិតធ្វើកម្មសិក្សាស្វែងយល់ពីបេតិកភ័ណ្ឌបន្ថែមទៀតពីលើទ្រឹស្ដី នៅតាមប្រាសាទបុរាណក្នុងតំបន់អង្គរ។ ពួកគាត់បានលើកឡើងថា ការធ្វើទស្សកិច្ចរយៈពេលបីថ្ងៃនេះ បានធ្វើឱ្យពួកគាត់ស្គាល់កាន់តែច្បាស់ ពីសំណង់ស្ថាបត្យកម្មរបស់បុព្វការីជន ដែលបានបន្សល់ទុកឱ្យខ្មែរជំនាន់ក្រោយ ហើយប្រវត្ដិសាស្ដ្រវប្បធម៌ អរីយធម៌ពិតជាបេតិកភ័ណ្ឌរបស់ជាតិខ្មែរ មិនអាចរកអ្វីមកកាត់ថ្លៃបានឡើយ។
អត្ថបទ និង រូបភាព៖ លោក បូ សាវី
