លោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្តសៀមរាប បានឲ្យដឹងថា នៅព្រឹកថ្ងៃទី៣១ ខែឧសភា ឆ្នាំ២០២២ព្រឹកមិញនេះ មានគណបក្សនយោបាយចំនួន៣ ក្នុងចំណោមគណបក្សនយោបាយចំនួន១៣ ដែលបានចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ បានធ្វើការហែក្បួនឃោសនារកសំឡេងឆ្នោត រួមមាន ៖ ១. គណបក្សភ្លើងទៀន បានហែក្បួននៅឃុំចំនួន៧ ក្នុងស្រុកចំនួន៣ គឺឃុំលាងដៃ និង ឃុំស្វាយចេក ក្នុងស្រុកអង្គរធំ ឃុំកែវពណ៌ ឃុំខ្នាត ឃុំពួក ឃុំសំរោងយា ក្នុងស្រុកពួក និងឃុំកន្ទ្រាំង ក្នុងស្រុកប្រាសាទបាគង មានអ្នកចូលរួមសរុបចំនួន ១ ០៩៦នាក់ ក្នុងនោះស្រីចំនួន៥២៦នាក់ , ២.គណបក្សរួបរួមជាតិ បានហែក្បួននៅឃុំទាំង៤ឃុំ ក្នុងស្រុកអង្គរធំ គឺឃុំជប់តាត្រាវ ឃុំលាងដៃ ឃុំពាក់ស្នែង និងឃុំស្វាយចេក មានអ្នកចូលរួមសរុបចំនួន ៣២នាក់ ក្នុងនោះស្រីចំនួន១០នាក់ និង ៣.គណបក្សសញ្ជាតិកម្ពុជា បានហែក្បួននៅឃុំកណ្ដែក ក្នុងស្រុកប្រាសាទបាគង មានអ្នកចូលរួមសរុបចំនួន ៣១នាក់ ក្នុងនោះស្រីចំនួន១១នាក់។
លោក នឹម វ៉ាន់សំ បន្តថា ក្រៅពីនេះ មានគណបក្សនយោបាយមួយចំនួនបានធ្វើសកម្មភាពដោយការចែកខិត្តប័ណ្ណ ការជួបប្រជុំ និង ការចាក់មេក្រូ ក្នុងនោះមាន ៖ ១.គណបក្សប្រជាជនកម្ពុជា , ២.គណបក្សខ្មែរស្រឡាញ់ជាតិ , ៣.គណបក្សកែទម្រង់កម្ពុជា , ៤.គណបក្សកម្ពុជានិយម , ៥.គណបក្សឆន្ទះខ្មែរ , ៦.គណបក្សប្រជាធិតេយ្យមូលដ្ឋាន , ៧.គណបក្សយុវជនកម្ពុជា និង ៨.គណបក្សហ្វ៊ុនស៊ិនប៉ិច ។
លោកប្រធានគណៈកម្មការរៀបចំការបោះឆ្នោតខេត្តសៀមរាប បន្តទៀតថា ក្នុងដំណាក់កាលនៃការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ ដោយគិតចាប់ពីថ្ងៃទី២១ ដែលជាថ្ងៃបើកយុទ្ធនាការឃោសនារកសំឡេងឆ្នោតដំបូង រហូតមកទល់ព្រឹកថ្ងៃទី៣១ ខែឧសភានេះ នៅទូទាំងខេត្តមិនមានបណ្ដឹងកើតឡើងនៅក្នុងដំណាក់កាលនេះទេ រួមទាំងសភាពការណ៍ទូទៅ គឺមានសន្តិសុខ សុវត្ថិភាព និងសណ្តាប់ធ្នាប់ល្អ ដោយគ្មានអំពើហិង្សា និង គ្មានការគំរាមកំហែង ពិសេសមិនមានបញ្ហាអ្វីកើតឡើងគួរឲ្យកត់សម្គាល់នោះឡើយ ហើយគណៈកម្មការឃុំសង្កាត់រៀបចំការបោះឆ្នោត កំពុងសហការជាមួយអាជ្ញាធរដែនដី ក្នុងការរៀបចំតម្រាយផ្លូវឱ្យគណបក្សនយោបាយ ព្រមទាំងមានការបែងចែកពេលវេលា ដើម្បីចៀសវាងកុំឱ្យមានការប្រឈម ការទល់មុខគ្នាក្នុងការដង្ហែក្បួនទាំងឡាយ ខណៈដំណាក់កាលនៃយុទ្ធនាការឃោសនាបោះឆ្នោត នឹងត្រូវបញ្ចប់នៅថ្ងៃទី០៣ ខែមិថុនា ឆ្នាំ២០២២ ។
ព័ត៌មានជាតិ ថ្មីៗ
សូមបញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥នេះ នឹងធ្វើឡើងនៅថ្ងៃទី០៥ ខែមិថុនា ឆ្នាំ២០២២ ចាប់ពីម៉ោង ៧:០០ព្រឹក រហូតដល់ម៉ោង ៣:០០រសៀល ៕
អត្ថបទ ៖ លោក លីវ សាន្ត
