លោក មាឃ បូរ៉ា អ្នកគ្រប់គ្រងសួនរុក្ខជាតិអង្គរ នៃអាជ្ញាធរជាតិអប្សរា បានឱ្យដឹងថា ដើម្បីចូលរួមថែរក្សាអនាម័យឱ្យមាននិរន្ដរភាព នៅក្នុងរមណីយដ្ឋានកែច្ឆៃ សួនរុក្ខជាតិអង្គរ អាជ្ញាធរជាតិអប្សរាបានដាក់បម្រាមចំនួន ៦ចំណុច ចំពោះភ្ញៀវទេសចរណ៍ជាតិ និងអន្ដរជាតិ ដែលមិនអនុវត្ដទៅតាមការណែនាំ ឬល្មើសបម្រាមមួយចំនួន ដើម្បីរក្សានិរន្ដរភាពបរិស្ថានអនាម័យស្អាត នៅក្នុងសួនរុក្ខជាតិអង្គរ។
លោកបន្តថា បម្រាមទាំង៦ រួមមាន ហាមយកទឹកបរិសុទ្ធ និងការវេចអាហារដោយថង់ប្លាស់ស្ទិកចូលក្នុងសួន ហាមយកអាវុធជាតិផ្ទុះ សត្វចិញ្ចឹមគ្រប់ប្រភេទ ហាមបន្ទោរបង់ក្រៅបន្ទប់ទឹកដែលមានរៀបចំនៅក្នុងសួន ឬប្រព្រឹតអាបាយមុខខុសច្បាប់ណាមួយជាដើម។ ចំពោះការដាក់បម្រាម ៦ចំណុចនេះ គឺស្ថិតនៅក្នុងប័ណ្ណចូលទស្សនារួចជាស្រេច ហើយមានបុគ្គលិកណែនាំឱ្យអ្នកទេសចរបានយល់ដឹង។ បម្រាមទាំងនេះ ដើម្បីឱ្យរណីយដ្ឋានមួយនេះ កាន់តែមានភាពទាក់ទាញអ្នកទេសចរ បន្ទាប់ពីពួកគាត់បានទស្សនាប្រាសាទអង្គរវត្ដ ឬប្រាសាទបុរាណផ្សេងៗទៀត ព្រោះសួនរុក្ខជាតិអង្គរនេះ ស្ថិតនៅក្បែប្រាសាទអង្គរ។ ចំពោះភ្ញៀវទេសចរណ៍ជាតិ និងអន្ដរជាតិ ដែលមិនអនុវត្ដទៅតាមការណែនាំ ឬល្មើសបម្រាមមួយចំនួននេះ ក្រុមការងារនឹងធ្វើការផាកពិន័យជាប្រាក់ចំពោះភ្ញៀវទេសចរណ៍ចំនួន ៤០ម៉ឺនរៀល។
សូមជម្រាបថា សួនរុក្ខជាតិអង្គរ មានទីតាំងស្ថិតនៅតាមបណ្ដោយផ្លូវទៅប្រាសាទអង្គរវត្ដ ក្នុងសង្កាត់គោកចក ក្រុងសៀមរាប នៅលើផ្ទៃដីជាង ១៥ហិកតា ដោយមានរុក្ខជាតិប្រមាណជាង ៥០០ប្រភេទនៅក្នុងសួន។ បន្ទាប់ពីបានបើកឱ្យចូលទស្សនាដោយមិនគិតថ្លៃចាប់ពីថ្ងៃទី១៩ ខែឧសភា ឆ្នាំ២០២២កន្លងមក ដែលមកដល់ពេលនេះ មានអ្នកទេសចរទៅទស្សនាសួនរុក្ខជាតិនោះប្រមាណជាង ២ម៉ឺននាក់ហើយ។ សួនរុក្ខជាតិអង្គរនេះ មានលក្ខណៈពិសេសណាស់ ក្នុងការអភិរក្សរុក្ខជាតិខ្មែរសំខាន់ៗ ជាពិសេសគឺរុក្ខជាតិដែលអាចយកមកផ្សំធ្វើជាឱសថព្យាបាលរោគផងដែរ។ ក្រៅតែពីដាំរុក្ខជាតិអាចផ្សំជាឱសថ ដែលជាគំនិតដ៏សំខាន់នោះ វាក៏មានប្រយោជន៍សំខាន់មួយទៀត គឺជួយដល់វិស័យបរិស្ថាន នៃដំណើរការប្រែប្រួលអាកាសធាតុ ដោយបានផ្ដល់ជាម្លប់និងបញ្ចេញអុកហ្ស៊ីហ្សែន Oxygen សម្រាប់ប្រព័ន្ធដកដង្ហើមផងដែរ។ជាមួយគ្នានោះ ការផ្ដើមគំនិតបង្កើតសួនរុក្ខជាតិអង្គរ ក៍ដើម្បីជួយដល់ការប្រែប្រួលអាកាសធាតុនៅតំបន់អង្គរនេះ ការលើកស្ទួយដល់វិស័យបរិស្ថានផងនិងលើកស្ទួយដល់សុខភាពសាធារណៈនិងភ្ញៀវទេសចរណ៍ផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
