គណៈកម្មការរៀបចំការបោះឆ្នោតខេត្តសៀមរាប នៅព្រឹកថ្ងៃទី០១ ខែមិថុនា ឆ្នាំ២០២២ បានបើកកិច្ចប្រជុំស្ដីពីការការពាក់សន្តិសុខ សុវត្ថិភាព សណ្តាប់ធ្នាប់ ក្នុងអំឡុងពេលបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដែលនឹងចាបើផ្ដើមនាពេលខាងមុខនេះ។ កិច្ចប្រជុំប្រព្រឹត្តិទៅក្រោមវត្តមាន លោក អ៊ឹង គឹមលាង អភិបាលរងខេត្តសៀមរាប និងលោក នឹម វ៉ាន់សំ ប្រធានគណៈកម្មការរៀបចំការបោះឆ្នោតខេត្ត ដោយមានការចូលរួមពីតំណាងគណបក្សនយោបាយ ចំនួន៥ ចូលរួមប្រជុំ ក្នុងចំណោមគណបក្សនយោបាយចំនួន១៣ ផងដែរ។
លោក អ៊ឹង គឹមលាង មានប្រសាសន៏ថា ចំពោះសកម្មភាពការឃោសនារកសំឡេងឆ្នោត ដើម្បីជ្រើសរើសក្រុមប្រឹក្សាឃុំ-សង្កាត់ អាណត្តិទី៥ កន្លងមកនេះ សម្រាប់នៅតាមបណ្តាស្រុកក្រុងទាំង១២ យើងឃើញថា យុទ្ធនាការឃោសនារកសំឡេងឆ្នោត ដែលមានគណបក្សនយោបាយមួយចំនួន ក្នុងចំណោមគណបក្សនយោបាយចំនួន១៣ ដែលបានចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥នេះ បានប្រព្រឹត្តិទៅដោយរលូន។ លោកក៏បានណែនាំដល់គ្រប់ស្ថាប័ន អង្គភាពពាក់ព័ន្ធ មានកងកម្លាំងស្នងការខេត្ត កងរាជអាវុធហត្ថខេត្ត និងកងកម្លាំងភូមិភាគ៤ ដែលដាក់នៅតាមគោលដៅសំខាន់ៗ របស់ការិយាល័យបោះឆ្នោតនីមួយនោះ គឺចាប់ពីពេលនេះតទៅរហូតដល់ថ្ងៃបោះឆ្នោត ត្រូវចូលរួមធ្វើយ៉ាងណាយកចិត្តទុកដាក់ឲ្យបានខខ្ពស់ ដើម្បីការពារសន្តិសុខ សុវត្ថិភាព សណ្តាប់ធ្នាប់ ក្នុងពេលបោះឆ្នោតឲ្យបានល្អប្រសើរ ជៀសវាងបញ្ហានានាដែលនឹងកើតមានឡើងដោយយថាហេតុណាមួយ។
បើតាមលោក នឹម វ៉ាន់សំ ប្រធាន គជប ខេត្តសៀមរាប បានបង្ហាញថា នៅទូទាំងខេត្តសៀមរាប មានឃុំសង្កាត់ចំនួន១០០ មានការិយាល័យបោះឆ្នោតចំនួន ១.៥០៨ការិយាល័យ និងមានអ្នកមានឈ្មោះក្នុងបញ្ជីបោះឆ្នោតចំនួន ៥៨៨.៥៣៣នាក់ ហើយការបោះឆ្នោតនឹងធ្វើឡើងនៅថ្ងៃទី០៥ ខែមិថុនា ឆ្នាំ២០២២ ចាប់ពីម៉ោង ៧:០០ព្រឹក រហូតដល់ម៉ោង ៣:០០រសៀល។ ចំពោះកិច្ចប្រជុំគ្នានាពេលនេះ គឺក្នុងគោលបំណងដើម្បីបញ្ជាក់អំពីការរួមកម្លាំងសាមគ្គី ដែលកើតចេញពីយើងទាំងគ្នា ហើយក៏ជាការបង្ហាញឲ្យឃើញនូវឧត្ដមភាព កិត្យានុភាពរបស់ក្រុមការងារកន្លងមក ដែលយើងទទួលការខុសត្រូវជាមួយនឹងការបោះឆ្នោត យើងចាំបាច់ត្រូវគោរព ឱ្យបានសមស្របទៅតាមលក្ខន្តិកៈ របស់គណៈកម្មការជាតិរៀបចំការបោះឆ្នោតដែលបានណែនាំ ជាពិសេសសូមរក្សានូវភាពថ្លៃថ្នូរ វិន័យ នឹងការគោរពទៅតាមច្បាប់ដែលបានកំណត់ ជៀសវាងការកើតនូវអំពើហិង្សាណាមួយ ដែលធ្វើឲ្យប៉ះពាល់កិត្តិយសដល់គណបក្សប្រជាជនកម្ពុជាយើង។
គួរឲ្យដឹងដែរថា នៅក្នុងខេត្តសៀមរាប មានគណបក្សនយោបាយចំនួន១៣ ចូលរួមប្រកួតប្រជែង ១. គណបក្សប្រជាជនកម្ពុជា ២.គណបក្សភ្លើងទៀន ៣. គណបក្សខ្មែររួបរួមជាតិ ៤. គណបក្សហ៊្វុនស៊ិនប៉ិច ៥. គណបក្សខ្មែរស្រឡាញ់ជាតិ ៦. គណបក្សប្រជាធិបតេយ្យមូលដ្ឋាន ៧. គណបក្សឆន្ទៈខ្មែរ ៨. គណបក្សសំបុកឃ្មុំសង្គមប្រជាធិបតេយ្យ ៩. គណបក្សកែទម្រង់កម្ពុជា ១០. គណបក្សកម្ពុជានិយម ១១. គណបក្សសញ្ជាតិកម្ពុជា ១២. គណបក្សយុវជនកម្ពុជា និង ១៣. គណបក្សរស្មីខេមរា និងមានអ្នកមានឈ្មោះក្នុងបញ្ជីបោះឆ្នោតចំនួន ៥៨៨.៥៣៣នាក់ផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
