ក្រុមទាហានមកពីកងឯកភាពនានានៃប្រទេសកូឡុំប៊ី ចំនួន១៥នាក់ ទទួលបាននូវការហ្វឹកហ្វឺនមួយ ស្តីពីការគ្រប់គ្រងគុណភាព និងបទដ្ឋានប្រតិបត្តិការនៅកម្ពុជា។
វគ្គហ្វឹកហ្វឺននេះ ធ្វើឡើងរយៈពេល២សប្តាហ៍ គិតចាប់ពីថ្ងៃទី៣០ ឧសភា ដល់ថ្ងៃទី ០៩ ខែមិថុនា ឆ្នំា ២០២២។ ដែលពិធីបើកបានធ្វើឡើងនៅសារមន្ទីរសន្តិភាព សកម្មភាពកម្ចាត់មីនកម្ពុជា ក្នុងស្រុកប្រាសាទបាគងខេត្តសៀមរាប ។
យោងតាមរបាយការណ៍របស់ កញ្ញា អ៊ុ សុភាវី ប្រធាននាយកដ្ឋានសហប្រតិបត្តិការអន្តរជាតិ និងគ្រប់គ្រងគម្រោងបានឱ្យដឹងថា ក្រោមកិច្ចសហប្រតិបត្តិការរវាងត្បូង_ត្បូង ក្នុងវិស័យមីន កូឡុំប៊ី ជាប្រទេសដំបូងគេដែលទទួលបានវគ្គហ្វឹនហ្វឺននេះ។
ព័ត៌មានជាតិ ថ្មីៗ
កញ្ញាបន្តថា ចាប់តាំងពីឆ្នាំ២០១០មកទល់ពេលនេះ កូឡុំប៊ីបានបញ្ជូនមន្ត្រីរបស់ខ្លួនចំនួន១៧៥នាក់មកហើយ ហើយសម្រាប់វគ្គនេះជាវគ្គចុងក្រោយ ដែលគាំទ្រថវិកាទាំងស្រុងដោយទីភ្នាក់ងារកិច្ចសហប្រតិបត្តិការអន្តរជាតិជប៉ុន ហៅកាត់ថា ចៃកា (JICA)។
កញ្ញាសុភាវី ឲ្យដឹងថា សិក្ខាកាមសរុបក្នុងវគ្គនេះមានចំនួន ១៥រូប ក្នុងនេះស្រ្តីមានចំនួន២រូប ដែលពួកគេទាំងនោះមកពីកងទ័ពជើងគោក១០នាក់ ទ័ពជើងទឹក២នាក់់ ទ័ពអាកាស១នាក់ និងតំណាងស្ថាប័នផ្នែករក្សាសន្តិភាពក្នុងវិស័យកម្ចាត់មីនចំនួន២នាក់ ។
ឯកឧត្តម អ៊ុ ភូមិរ៉ូ អគ្គនាយករងមជ្ឈមណ្ឌល់សកម្មភាពកម្ចាត់មីនម្ពុជា បានលើកឡើងថា ប្រទេសកូឡុំប៊ីគឺជាប្រទេសតំបូងគេដែលទទួលការហ្វឹនហ្វឺន សហប្រតិបត្តិការ ត្បូង-ត្បូង ក្នុងវិស័យសកម្មភាពមីន នៅក្នុងឆ្នាំ២០១០ដល់ឆ្នាំ ២០១១ ក្នុងតំណាក់កាលទីមួយ។
និងតំណាក់កាលទី២នេះ មាន៧វគ្គ ហើយនេះក៏ជាវគ្គបញ្ចប់ផងដែរ។ ឯកឧត្តមបន្តថា ដោយសារវិបត្តិជំងឺកូវីដ១៩ វគ្គហ្វឹកហ្វឺននេះ ត្រូវបានអាក់ខានអស់ពេលជិត២ឆ្នាំ។ ប៉ុន្តែក្រោមនយោបាយស្រោចវ៉ាក់សាំងរបស់រាជរដ្ឋាភិបាលកម្ពុជា បានបើកឱកាសឲ្យយើងអាចបើកវគ្គហ្វឹកហ្វឺននេះឡើងវិញ។ ឯកឧត្តម ក៏លើកទឹកចិត្តដល់សិក្ខាកាមឱ្យមានការផ្លាស់ប្តូរចំណេះដឹងជាមួយគ្នា ក៏ដូចជាចាត់ទុកវគ្គហ្វឹកហ្វឹននេះមិនត្រឺមតែផ្តល់បទពិសោធន៍ពីសំណាក់គ្រូបង្គោលរបស់ស៊ីម៉ាក់ ប៉ុន្តែភាគីកម្ពុជាក៏អាចរៀនសូត្រពីបទពិសោធន៍នូវសកម្មភាពមីនពីប្រទេសកូឡុំបីផងដែរ៕
អត្ថបទ និង រូបភាព ៖ លោក ជា ស្រស់
