នាព្រឹកថ្ងៃទី៣០ ខែឧសភា ឆ្នាំ២០២២ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយអាជ្ញាធរស្រុកប្រាសាទបាគង បានធ្វើការប្រគល់វិញ្ញាបនបត្រសម្គាល់ម្ចាស់អចលនវត្ថុ សរុបចំនួន ២,៨១៤ក្បាលដី ជូនប្រជាពលរដ្ឋស្ថិតនៅក្នុងភូមិគោកត្នោត ឃុំកណ្តែក។
លោក ប៊ូជុំ សម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត លើកឡើងថា ដោយមានការយកចិត្តទុកដាក់ពីថ្នាក់ដឹកនាំគ្រប់លំដាប់ថ្នាក់ ជាពិសេសឯកឧត្តម ទៀ សីហា អភិបាលខេត្តសៀមរាប និងមានការគាំទ្របច្ចេកទេសពី ក្រសួងរៀបចំដែនដី នគរូបនីយកម្ម និងសំណង់ បានសម្រេច អនុញ្ញាតជាគោលការណ៍ដល់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយអាជ្ញាធរ មន្ទីរអង្គភាពជំនាញពាក់ព័ន្ធនានា និងអាជ្ញាធរមូលដ្ឋាន ចាត់ចែងអនុវត្តន៍ការចុះបញ្ជីដីធ្លីមានលក្ខណៈជាប្រព័ន្ធ និងចេញវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋជាម្ចាស់ដីផ្ទាល់តែម្តង។
ដោយឡែក ក្បាលដីនៅសល់ចំនួន ៤១៨ក្បាល នៃក្បាលដីសរុប ៣,២៣២ក្បាលដី ដែលបានធ្វើការចុះបញ្ជីដីធ្លីមានលក្ខណៈជាប្រព័ន្ធក្នុងភូមិគោកត្នោតកន្លងមក លោកអនុប្រធានមន្ទីរ បញ្ជាក់ថា ក្បាលដីទាំងនោះ នៅមានជាប់ពាក់ព័ន្ធនឹងតំបន់បុរាណដ្ឋាន ដែលបានការពារដោយអាជ្ញាធរជាតិអប្សរា និងមន្ទីរវប្បធម៌ និងវិចិត្រសិល្បៈ ដែលទាមទារឱ្យគណៈកម្មការរដ្ឋបាល បន្តពិនិត្យ និងដោះស្រាយតាមនីតិវិធីជាបន្តបន្ទាប់ ដើម្បីឈានទៅដល់ការចេញប័ណ្ណជូនម្ចាស់ដីជាបន្តទៀត។
លោក បញ្ជាក់ទៀតថា ការងារទាំងអស់នេះ គឺជាទិសដៅរបស់រាជរដ្ឋាភិបាល ដើម្បីផ្ដល់សិទ្ធិកាប់កាន់ដីស្របច្បាប់ជូនដល់ប្រជាពលរដ្ឋ ដើម្បីលើកស្ទួយជីវភាពប្រចាំថ្ងៃរបស់ខ្លួន ឱ្យកាន់តែប្រសើរឡើង និងធានាបានសុវត្ថិភាព ចៀសផុតការរំលោភបំពាន ឬដកហូតដោយមិនទាន់បានផ្តល់សំណងសមរម្យ និងយុត្តិធម៌ទេនោះ។
គួរជម្រាបថា លទ្ធផលនៃការចុះបញ្ជីដីធ្លីមានលក្ខណៈជាប្រព័ន្ធសម្រាប់ខេត្តសៀមរាប មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានធ្វើការបិទផ្សាយ នឹងចេញប័ណ្ណរួចរាល់បានចំនួន ៨៦ភូមិ រួមមាន៖ ១. ក្រុងសៀមរាប មានចំនួន ០៩ សង្កាត់ ស្មើនឹង ៥៣ភូមិ គឺ សង្កាត់សៀមរាបចំនួន ៧ភូមិ, សង្កាត់សាលាកំរើកចំនួន ៧ ភូមិ, សង្កាត់ស្វាយដង្គំចំនួន ១៤ ភូមិ, សង្កាត់ជ្រាវចំនួន ៧ភូមិ, សង្កាត់ស្លក្រាមចំនួន ៨ភូមិ, សង្កាត់គោកចកចំនួន ៣ភូមិ និងសង្កាត់នគរធំចំនួន ១ភូមិ, សង្កាត់សំបួរចំនួន ៥ភូមិ និងសង្កាត់ស្រង៉ែចំនួន ១ភូមិ ។ ២. ស្រុកសូទ្រនិគម ឃុំដំដែក ស្មើនឹង ១៣ភូមិ ក្នុងនោះ ១០ភូមិ បានចេញប័ណ្ណរួចរាល់ និង ៣ភូមិ ដែលបានធ្វើការបិទផ្សាយរួចរាល់។ ៣ស្រុកប្រាសាទបាគង បានចំនួន ៣ឃុំ ស្មើនឹង ៦ភូមិ គឺ ឃុំបាល្ល័ង្កចំនួន ១ភូមិ ឃុំអំពិលចំនួន ៤ ភូមិ និងឃុំកណ្តែកចំនួន ២ភូមិ ក្នុងនោះ មាន ១ភូមិបានចេញប័ណ្ណរួចរាល់ និង ១ភូមិទៀតបានបិទផ្សាយរួចរាល់។ ៤. ស្រុកពួក ឃុំពួក ស្មើនឹង ៦ភូមិ ក្នុងនោះ ៤ ភូមិ បានចេញប័ណ្ណរួចរាល់ និង ២ ភូមិបានបិទផ្សាយរួចរាល់។ ៥.ស្រុកក្រឡាញ់ ឃុំកំពង់ថ្កូវ ស្មើនឹង ៨ភូមិ ក្នុងនោះ ៦ភូមិ បានចេញប័ណ្ណរួចរាល់ និង ២ភូមិ ដែលបានធ្វើការបិទផ្សាយរួចរាល់។ និង៦.ស្រុកជីក្រែង ឃុំកំពង់ក្តី បានចំនួន ១ភូមិ ដែលកំពុងតែរៀបចំការបិទផ្សាយ។
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
