ក្រុមគ្រូបង្រៀននៃអនុវិទ្យាល័យមិត្ដភាពខ្មែរជប៉ុន ព្រះឥន្ទកោសា ស្ថិតនៅសង្កាត់ស្លក្រាម ក្រុងសៀមរាប បានបង្កើតផ្សារប្រតិដ្ឋ លើកទី៨ របស់ខ្លួន កាលពីថ្ងៃទី២៩ ខែឧសភា ឆ្នាំ២០២២ ដើម្បីដាក់តាំងបង្ហាញ និងលក់ផលិតផលស្នាដៃរបស់សិស្សានុសិស្ស លើផ្នែកបំណិនជីវិតរបស់ពួកគាត់ បន្ទាប់ពីខកខានមួយរយៈពេល ដោយសារជំងឺកូវីដ-១៩។
លោក ហុង ហ៊ុយអ៊ាន នាយកអនុវិទ្យាល័យមិត្ដភាពខ្មែរជប៉ុន ព្រះឥន្ទកោសា បានឲ្យដឹងថា ផ្សារប្រតិដ្ឋនេះ ជាផ្សារលក់ស្នារដៃសិស្សរយៈពេលខ្លី មានន័យថា បើកលក់ហើយបិទទៅវិញក្រោយពីលក់បានរយៈពេលខ្លី ដោយដាក់តាំងពិព័រណ៌នូវមុខម្ហូបអាហារ និងសម្ភារៈវត្ថុអនុស្សាវរីយ៍ ដែលបានធ្វើដោយដៃសិស្សានុសិស្ស ដែលធ្លាប់ទទួលបានការបង្ហាត់បង្រៀនពីលោកគ្រូ-អ្នកគ្រូ និងពីអាណាព្យាបាលសិស្សកន្លងមក។ លោកថា ការបើកផ្សារប្រតិដ្ឋដាក់តាំងស្នារដៃសិស្សនេះ មានតែនៅអនុវិទ្យាល័យព្រះឥន្ទកោសាមួយប៉ុណ្ណោះ ដើម្បីឲ្យសិស្សចេះរួបរួមសាមគ្គីគ្នា និងចេះធ្វើការងារក្រុម ជាការជួបជុំសប្បាយរីករាយ រវាងសិស្ស អតីតសិស្ស គ្រូ និងសហគមន៍ និងដើម្បីអបអរទិវាកុមារអន្តរជាតិ ០១ មិថុនាខាងមុខ។ ជាមួយគ្នានោះ ក៍ជាការបណ្ដុះគំនិតដល់សិស្ស លើផ្នែកបំណិនជីវិតមូលដ្ឋាន សម្រាប់យកទៅប្រើប្រាស់ទៅថ្ងៃមុខ។
លោកនាយកអនុវិទ្យាល័យ បន្ដថា ថវិកាដែលទទួលបានក្រោយពីការលក់នូវស្នារដៃរបស់សិស្សនេះ គឺមួយផ្នែក យកទៅទូទាត់ថ្លៃដើម មួយផ្នែកទៀតយកទៅលើកទឹកចិត្ដដល់សិស្សដែលទៅសិក្សាមិនដែលឈប់សម្រាក និងសិស្សក្រីក្រ ដើម្បីកាត់បន្ថយការបោះបង់ការសិក្សា និងមួយផ្នែកទៀតយកទៅសម្រាប់ទ្រទ្រង់ក្នុងសាលា។
លោក ហុង ហ៊ុយអ៊ាន បញ្ជាក់បន្ថែមថា ផ្សារប្រតិដ្ឋ ដែលដាក់តាំងពិពរណ៌ស្នារដៃសិស្សានុសិស្សនេះ ជាលើកទី៨ ហើយ ប៉ុន្ដែត្រូវបានខកខានរយៈពេល ៣ឆ្នាំ ចាប់តាំងពីឆ្នាំ២០១៨ ដល់ឆ្នាំ២០២១ ដោយសារជំងឺកូវីដ១៩ និងកង្វះថវិកានៅក្នុងសាលា។ ការរៀបចំបើកផ្សារនេះ គឺយើងបានចំណាយដើមទុន ប្រមាណ ១០លានរៀល ក្នុងនោះសាលាទទួលបានការជួយគាំទ្រឧបត្ថម្ភចំនួន ៥០០$ ពីអង្គការយុវជនខ្មែរ និងអភិវឌ្ឍសង្គម ដែលមានលោក ឈួន បូរិត នាយកប្រតិបត្តិរបស់អង្គការ។ ដោយឡែកក្រៅពីនេះ បានចំណាយបន្ថែមលើការផ្ដល់ប្រាក់លើកទឹកចិត្ត (ជាប្រាក់គូប៉ុង) ដល់សិស្សដែលយកចិត្តទុកដាក់រៀនសូត្រ រៀនមិនដែលឈប់សោះ (គិតពីដើមឆ្នាំដល់ត្រឹមថ្ងៃ២០/០៥/២២) ចំនួន ១៨២នាក់ សិស្សក្រីក្រខ្លាំងចំនួន ២៩នាក់ ក្នុងម្នាក់ទទួលបានថវិកាចំនួន ៣.០០០រៀល។ ទឹកប្រាក់៣០០០៛/ម្នាក់មិនច្រើន តែជាកិត្តិយស និងជាមោទនភាពសម្រាប់ការខិតខំប្រឹងប្រែងរបស់ពួកគេ ដែលទាំងនេះក៍ជាការរួមចំណែកជំរុញការរៀនសូត្រ និងកាត់បន្ថយអត្រាសិស្សបោះបង់ផងដែរ៕
អត្ថបទ និង រូបភាព៖ លោក បូ សាវី
