នៅថ្ងៃទី៩ ខែមិថុនា ឆ្នាំ២០២២នេះ រដ្ឋបាលខេត្តសៀមរាប បានចាប់ផ្តើមបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ដួសទី៥ ប្រភេទPfizer ជូនមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋ នៅតាមក្រុង ស្រុកទាំង១២ ក្នុងខេត្តសៀមរាប និងបិទបញ្ចប់យុទ្ធនាការនេះទៅវិញនៅថ្ងៃទី២១ ខែមិថុនាខាងមុខនេះ។
គួររំលឹកថា សម្រាប់ខេត្តសៀមរាប បានទទួលចំណាត់ថ្នាក់លេខ១ សម្រាប់យុទ្ធនាការចាក់វ៉ាក់សាំងបង្ការជំងឺកូវីដ-១៩ ដួសទី៣ នៅទូទាំងប្រទេស ប៉ុន្តែចំនួនអ្នកមកទទួលវ៉ាក់សាំងសម្រាប់ដូសទី៤ មានសភាពថមថយទៅវិញ។
បើតាមការលើកឡើងរបស់លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល ក្នុងឱកាសបំពេញការងារនៅខេត្តសៀមរាបកាលពីពេលថ្មីៗនេះ មានប្រសាសន៍ថា ដោយមានការយកចិត្ដទុកដាក់ខ្ពស់ពីសម្ដេចតេជោ ហ៊ុន សែន នាយករដ្ឋមន្ដ្រី បានអនុញ្ញាតឱ្យបើកយុទ្ធនាការចាក់វ៉ាក់សាំងដូសទី៥ ឬដូសជំរុញ ដល់ក្រុមកម្លាំង ដែលកំពុងបំពេញការងារនៅជួរមុខ ដោយចាប់អនុវត្ដន៍ពីថ្ងៃទី៩ខែមិថុនានេះ។ ក្រុមជួរមុខដែលត្រូវទទួលបានវ៉ាក់សាំងដូសទី៥ មុនគេនេះ រួមមានកងកម្លាំងយោធា នគរបាល ក្រុមគ្រូពេទ្យទាំងរដ្ឋ និងឯកជន អ្នកសារព័ត៌មាន សិល្បករ សិល្បការិនី ក្រុមអ្នកមានប្រព័ន្ធការពារខ្សោយ ឬមនុស្សវ័យ៦០ឆ្នាំ។ បន្ថែមលើនោះ សម្ដេចតេជោក៏បានអនុញ្ញាតដល់ជនបរទេស ដែលស្នាក់នៅប្រទេសកម្ពុជា ពិសេសបុគ្គលិកអង្គការជាតិ អង្គការន្ដរជាតិ បុគ្គលិកស្ថានទូត និងដៃគូជាច្រើនទៀតទទួលវ៉ាក់សាំងដូសទី៥ នេះផងដែរ។
ព័ត៌មានជាតិ ថ្មីៗ
លោកជំទាវ ក៏បានបញ្ជាក់ដែរថា មកដល់ពេលនេះ មានប្រជាពលរដ្ឋចំនួន៩៤ភាគរយ នៃចំនួនប្រជាពលរដ្ឋសរុបទូទាំងប្រទេស បានទទួលការចាក់វ៉ាក់សាំងបង្ការជំងឺកូវីដ១៩។ លោកជំទាវ ក៏បានអំពាវដល់ប្រជាពលរដ្ឋ ដែលមិនទាន់បានទទួលវ៉ាក់សាំងដូសទី៣ និងដូសទី៤ សូមទៅទទួលវ៉ាក់សាំងបង្ការជំងឺកូវីដ១៩នេះឱ្យបានគ្រប់គ្នា។
សម្រាប់ថ្ងៃនេះដែរ នៅបញ្ជាការដ្ឋានយោធភូមិភាគទី៤ ក៏បានចាប់ផ្តើមបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ដួសទី៥ ដែលមានរយៈពេល ៥ថ្ងៃ នៅតាមទីបញ្ជាការដ្ឋាននីមួយៗ ដែលចំណុះឱ្យយោធភូមិភាគទី៤ ដែលមានចំនួន៤ខេត្ដ រួមមាន ប្រតិបត្ដិការសឹករងខេត្ដសៀមរាប ខេត្ដឧត្ដរមានជ័យ ខេត្ដកំពង់ធំ និងខេត្ដព្រះវិហារ និងនៅតាមទីបញ្ជាការដ្ឋានកងពលថ្មើរជើងមួយចំនួនទៀត។
អត្ថបទ និង រូបភាព៖ លោក ម៉ី សុខារិទ្ធ លោក បូ សាវី និង លោក ជា ស្រស់
កែសម្រួល៖ លោក សេង ផល្លី
