អគ្គលេខាធិការដ្ឋានអចិន្រៃ្តយ៍ក្រុមប្រឹក្សាជាតិកម្ពុជាដើម្បីស្រ្តី (ក.ជ.ក.ស) នៅព្រឹកថ្ងៃទី១៣ ខែកក្កដា ឆ្នាំ២០២២នេះ បានសហការជាមួយរដ្ឋបាលខេត្តសៀមរាបរៀបចំកិច្ចប្រជុំពិភាក្សាស្វែងយល់អំពីស្ថានភាពរបស់ស្រ្តីក្នុងមុខងារសាធារណៈ និងវិស័យផ្សេងៗ បញ្ហាប្រឈម និងវិធានការនានាក្នុងការអនុវត្តច្បាប់ គោលនយោបាយ របស់អង្គភាពមន្ទីរពាក់ព័ន្ឋក្នុងខេត្ត និងដើម្បីប្រមូលព័ត៌មាន ទិន្នន័យ សមិទ្ឋផលនានាដែលអាជ្ញាធរមានសមត្ថកិច្ចថ្នាក់ក្រោមជាតិ និងមន្ទីរអង្គភាពពាក់ព័ន្ឋសម្រេចបានក្នុងការលើកកម្ពស់ ស្ថានភាព ជីវភាព ឋានៈ តួនាទី និងសុខុមាលភាពស្ត្រីក្នុងការអនុវត្តច្បាប់ គោលនយោបាយជាតិ វិធានការ អនុសាសន៍ដ៍ខ្ពង់ខ្ពស់របស់សម្តេចតេជោ នាយករដ្ឋមន្ត្រីនិងអនុសញ្ញាអន្តរជាតិ ស៊ី-ដ (CEDAW) ដើម្បីចងក្រងរបាយការណ៍របស់ក្រុមប្រឹក្សាជាតិកម្ពុជាដើម្បីស្រ្តី ក៍ដូចជាដើម្បីស្វែងយល់អំពីបញ្ហាប្រឈម និងឧបសគ្គ ព្រមទាំថវិធានការទាំងឡាយក្នុងការដោះស្រាយបញ្ហាស្ត្រី ជាពិសេសក្នុងពេលជួបវិបត្តិនៃជំងឺកូវីដ-១៩។
លោកស្រី យូ សុភា អភិបាលរងខេត្តសៀមរាប មានប្រសាសន៍ថា ដើម្បីរួមចំណែកក្នុងការអនុវត្តយុទ្ធសាស្រ្តចតុកោណដំណាក់កាលទី៤ ក្នុងនីតិកាលទី៦ របស់រាជរដ្ឋាភិបាលកម្ពុជា រដ្ឋបាលខេត្តបានចូលរួមជំរុញ និងអនុវត្តច្បាប់ គោលនយោបាយ និងកម្មវិធីកំណែទម្រង់នានា ព្រមទាំងបានដាក់បញ្ចូលផែនការអនុវត្ត នៅក្នុងផែនការអភិវឌ្ឍន៍ខេត្ត ក្រុងស្រុក និងឃុំសង្កាត់ ឲ្យឆ្លើយតបនឹងយេនឌ័រ ជំរុញការបង្កើនភាពអង់អាចផ្នែកសេដ្ឋកិច្ចរបស់ស្រ្តី និងធានាឲ្យមានវិធានការផ្លូវច្បាប់សមស្រប ក្នុងការទប់ស្កាត់រាល់ទម្រង់នៃការរើសអើងលើស្រ្តី និងការកេងប្រវ័ញ្ចកម្លាំងពលកម្ម និងផ្លូវភេទ ព្រមទាំងធ្វើការផ្លាស់ប្តូរនូវឥរិយាបថ និងផ្នត់គំនិតដែលរើសអើងលើស្រ្តី ជាមួយនឹងការអភិវឌ្ឍន៍ សមត្ថភាព និងដោះស្រាយនូវឧបសគ្គ ដែលរារាំងដល់ការទទួលបាននូវសិទ្ធិក្នុងការចូលរួម និងការទទួលផលប្រយោជន៍របស់ស្រ្តី ក្នុងកិច្ចអភិវឌ្ឍន៍សេដ្ឋកិច្ច និងសង្គមជាតិ ដោយរួមទាំងការធ្វើសេចក្តីសម្រេច។
លោកស្រី យូ សុភា បានបញ្ជាក់ថា ទោះបីយើងខិតខំយ៉ាងណាក្តី ប៉ុន្តែតាមការសង្កេតឃើញកន្លងមកបញ្ហាមួយចំនួននៅតែមានដូចជា៖ អំពើហិង្សា ដូចជាអំពើហិង្សាទាក់ទងនឹងយេនឌ័រ បញ្ហាគ្រឿងញៀន ការចំណាកស្រុកនៅតែបន្តកើតមានឥតស្រាកស្រាន្ត និងជាចំណុចកង្វល់របស់យើងចំពោះមុខ។ ហើយបញ្ហាអសកម្មទាំងនេះបណ្តាលមកពីកក្តាសត្យានុម័ត និងអន្តោម័តជាច្រើន ដែលជាចលករធ្វើឲ្យរាំងស្ទះ និងពុំសូវមានប្រសិទ្ធភាព ដែលទាមទារឲ្យយើងទាំងអស់ត្រូវបន្តការខិតខំបន្ថែមទៀត។ ជាមួយគ្នានោះលោក លោកស្រី ថ្នាក់ដឹកនាំមន្ទីរអង្គភាពពាក់ព័ន្ធ និងប្រតិភូគណៈមេធាវី ធ្វើការផ្តល់ធាតុចូលសំខាន់ៗ អំពីការអនុវត្តច្បាប់ជាតិពាក់ព័ន្ធ គោលនយោបាយ វិធានការ និងអនុសាសន៍របស់សម្តេចតេជោនាយករដ្ឋមន្ត្រី អំពីការលើកកម្ពស់ស្ថានភាព ជីវភាព ឋានៈ តួនាទី និងសុខុមាលភាពស្រ្តី នៅក្នុងខេត្តសៀមរាបបានយ៉ាងផុសផុល។
ថ្លែងបូកសរុបកិច្ចប្រជុំពិភាក្សាលោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធាន ក.ជ.ក.ស បាន សម្តែងនូវក្តីបារម្ភជាមួយនឹងអត្រាខ្ពស់ នៃការបោះបង់ការសិក្សារបស់ក្មេងស្រី ដែលទាមទារចាំបាច់ឱ្យយើងត្រូវសិក្សាស្វែងយល់ប៉ាន់ប្រមាណពីឬសគល់នៃមូលហេតុព្រោះកត្តានេះ វានាំជួបជោគវាសនាមិនល្ទៅអអនាគតរបស់ក្មេងស្រីនោះ។ ជាមួយគ្នានោះបញ្ហាចំណាកស្រុកក្នុងភាពប្រថុយប្រថានដោយចាញ់បោកមេខ្យល់ នៅតែបន្តកើតមាន ឥតស្រាកស្រាន្ត និងជាចំណុចកង្វល់របស់យើងចំពោះមុខ។
លោកជំទាវរដ្ឋលេខាធិការ ក៏បានណែនាំដល់អ្នកពាក់ព័ន្ធទាំងអស់ត្រូវបន្តសង្កេត និងយកចិត្តទុកដាក់បន្ថែមទៀត ចំពោះស្រ្តីដែលគេជួលឱ្យពរពោះ ដើម្បីលក់ទារកឱ្យគេ វាគឺជាការប្រថុយប្រថានទៅនឹងសុខភាពជាបទល្មើសជួញដូរមនុស្ស និងជាគំរូអាក្រក់ដល់គ្រួសារ អ្នកដទៃ និងសង្គមជាតិទាំងមូលរបស់យើង បញ្ហានេះធ្លាប់បង្ក្រាបបានជាច្រើនករណីរួចមកហើយ។ បញ្ហាទាំងនេះ ទាមទារឲ្យយើងទាំងអស់ត្រូវបន្តការខិតខំបន្ថែមទៀត ដើម្បីធ្វើការអប់រំ ពន្យល់ណែនាំ ដើម្បីឱ្យគាត់ផ្លាស់ប្តូរឥរិយាបទ និងត្រូវមានវិធានការសមស្រប ជាក់ស្តែងបំផុតក្នុងការការពារជនរងគ្រោះ ឬជនងាយរងគ្រោះផ្សេងៗ ប្រកបដោយតម្លភាព គណនេយ្យភាព យុត្តិធម៌ ឈរលើស្មារតីវិជ្ជាជីវៈខ្ពស់ និងការទុកប្រយោជន៍រួម ប្រយោជន៍ជាតិជាធំទាំងអស់គ្នា៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
