បើតាមទីភ្នាក់ងារសារព័ត៌មាន Reuters បានឲ្យដឹងនៅថ្ងៃពុធនេះថា លោក ហ្គូតាបាយ៉ា រ៉ាចាប៉ាកសា (Gotabaya Rajapaksa) ប្រធានាធិបតីស្រីលង្កា បានភៀសខ្លួនចេញពីប្រទេសហើយក្នុងរយៈពេលតែប៉ុន្មានម៉ោងប៉ុណ្ណោះ មុននឹងលោកត្រូវលាលែងចេញពីតំណែងតាមការទាមទាររបស់ក្រុមបាតុករ ដែលខឹងសម្បារចំពោះការដឹកនាំ និងបរាជ័យក្នុងការដោះស្រាយវិបត្តិសេដ្ឋកិច្ចរបស់លោក។
មន្ត្រីអន្តោប្រវេសន៍ស្រីលង្កាម្នាក់ ក្នុងលក្ខខណ្ឌមិនបញ្ចេញឈ្មោះបានឱ្យដឹងទៀតថាលោក រ៉ាចាប៉ាកសា និងភរិយា ព្រមទាំងអង្គរក្សពីរនាក់ បានភៀសខ្លួនចេញពីប្រទេសដោយជិះលើយន្ដហោះមួយគ្រឿងរបស់កងទ័ពអាកាសនៃប្រទេសស្រីលង្កា។ ចំណែកមន្ត្រីរដ្ឋាភិបាលម្នាក់ទៀត ក៏បានបញ្ជាក់ដែរថាប្រធានាធិបតីរូបនេះបានចាកចេញពីប្រទេសឆ្ពោះទៅកាន់រដ្ឋធានីម៉ាលេ (Male) នៃប្រទេសម៉ាល់ឌីវ ខណៈក្រុមមន្ត្រី អន្តោប្រវេសន៍បានអះអាងថា ពួកគេមិនមានអំណាចឃាត់ប្រធានាធិបតីដែលកំពុងអំណាច មិនឱ្យចាកចេញពីប្រទេសបាននោះទេ។
គួរបញ្ជាក់ថា លោក រ៉ាចាប៉ាកសា ត្រូវបានគេរំពឹងថានឹងលាលែងចេញពីតំណែងនៅថ្ងៃពុធនេះ ដើម្បីបើកផ្លូវបង្កើតរដ្ឋាភិបាលថ្មីមួយ ក្រោយក្រុមបាតុករបានសម្រុកចូល កាន់កាប់គេហដ្ឋានរបស់លោក និងរបស់លោកនាយករដ្ឋមន្ត្រីកាលពីថ្ងៃសៅរ៍សប្ដាហ៍មុន ទាមទារឱ្យអ្នកទាំង២ ចុះចេញពីតំណែង។ លោក រ៉ាចាប៉ាកសា មិនបានបង្ហាញ ខ្លួនជាសាធារណ ចាប់តាំងពីថ្ងៃសុក្រសប្ដាហ៍មុនមកម្ល៉េះ ហើយសភាស្រីលង្កា គ្រោងនឹងបោះឆ្នោតជ្រើសរើសប្រធានាធិបតីថ្មីនៅថ្ងៃទី២០ ខែកក្កដានេះ៕
