ប្រជាពលរដ្ឋខ្មែរជាច្រើននាក់ រស់នៅក្នុងខេត្ដសៀមរាប បាននាំគ្នាធ្វើពិធីបុណ្យកាន់ទុក្ខ តាមបែបព្រះពុទ្ធសាសានា ចំពោះមរណៈភាពរបស់អតីតនាយករដ្ឋមន្ដ្រីជប៉ុន លោក ស៊ីន ហ្សូអាបេ ដែលបានស្លាប់កាលពីថ្ងៃទី០៨ ខែកក្កដា ឆ្នាំ២០២២កន្លងទៅ ដែលពិធីនេះធ្វើឡើងនៅវត្ដរាជបូណ៍ ខេត្ដសៀមរាប នាថ្ងៃទី១៤ ខែកក្កដា ឆ្នាំ២០២២នេះ។
លោក ឈា ប៊ុនធឿន ជាពលរដ្ឋក្នុងក្រុងសៀមរាប បានលើកឡើងថា ការចូលរួមធ្វើពិធីបុណ្យនេះ ដោយសារលោកជាពលរដ្ឋមួយរូប ក្នុងចំណោមពលរដ្ឋខ្មែរជាច្រើនរូបទៀត ដែលតែងតែអាណិត ស្រលាញ់ ហើយសែនសោកស្ដាយដែលអតីតនាយករដ្ឋមន្ដ្រីជប៉ុន លោក ស៊ីន ហ្សូអាបេ ដែលបានទទួលមរណៈភាពនាពេលកន្លងទៅថ្មីៗនេះ។ លោកថា លោក ស៊ីហ្សូ អាបេ គឺជាឥសរៈជនឆ្នើមមួយរូបដែលមានឈ្មោះល្បីល្បាយ និងជាបុគ្គលមួយរូបដែលមានទំនាក់ទំនងល្អជាមួយប្រទេសកម្ពុជា ទើបធ្វើឱ្យប្រជាពលរដ្ឋខ្មែរ រួមមានគ្នាធ្វើបុណ្យកាន់ទុក្ខចំពោះមរណៈភាពលោក បើទៅជាតិសាសន៍ខុសគ្នាក៍ដោយ។
ពលរដ្ឋមួយរូបទៀត លោក មុត សំបូរ បានបង្ហាញអារម្មណ៍ថា ក្នុងនាមលោកជាពលរដ្ឋខ្មែរមួយរូបតែងមើលឃើញប្រទេសជប៉ុន បានផ្ដល់ជំនួយដល់ប្រទេសកម្ពុជាជាច្រើន ជាពិសេសការកសាងហេដ្ឋារចនាស្ពានថ្នល់ ដែលជំនួយទាំងនេះហើយ ធ្វើឱ្យប្រជាជនកម្ពុជាមានការអាណិតអាសូរ ចំពោះមរណៈភាពរបស់លោក អាបេ ទើបបានរួមគ្នាធ្វើពិធីកាន់មរណៈទុក្ខនាពេលនេះ។ ហើយការរៀបចំពិធីនេះឡើងមិនមែនសម្រាប់តែកាន់មរណៈទុក្ខប៉ុណ្ណោះទេ ប៉ុន្ដែធ្វើឡើងដើម្បីដឹងគុណដល់អតីតនាយរដ្ឋមន្ដ្រីលោក ស៊ីនហ្សូ អាបេ ដោយសូមបួងសួងសូមឱ្យប្រទេសទាំងពីរ កាន់តែមានទំនាក់ទំនងល្អ ជាមួយគ្នាជាអមតៈ បើទោះបីអតីតនាយករដ្ឋមន្ដ្រីរូបនោះទទួលមរណៈភាពទៅហើយក្ដី។
សូមបញ្ជាក់ថា លោក ស៊ីនហ្សូ អាបេ អតីតនាយករដ្ឋមន្ដ្រីជប៉ុន បានទទួលមរណៈភាពនៅថ្ងៃទី៨ ខែកក្កដា ឆ្នាំ២០២២ បន្ទាប់ពីត្រូវបានបាញ់ប្រហារនៅលើផ្លូវ ក្នុងទីក្រុង Nara ភាគខាងលិចប្រទេសជប៉ុន ខណៈលោកកំពុងធ្វើយុទ្ធនាការសម្រាប់ការបោះឆ្នោតសភាជាន់ខ្ពស់នាពេលខាងមុខ។ ជាមួយនោះការិយាល័យកុងស៊ុលជប៉ុន ប្រចាំខេត្ដសៀមរាប បានបើកឱ្យប្រជាពលរដ្ឋខ្មែរ និងមន្ដ្រីរាជការជាច្រើនចូលរួមសារសារមរណៈទុក្ខ នៅក្នុងសៀវភៅមរណៈទុក្ខ ដែលបង្ហាញឱ្យឃើញពីទឹកចិត្ដប្រជាពលរដ្ឋខ្មែរមានការអាណិតអាសូរដល់អតីតនាយករដ្ឋមន្ដ្រី ស៊ីហ្សូ អាបេ ជាពិសេសបង្ហាញឱ្យឃើញពីមិត្ដភាពកាន់តែយូរអង្វែងរវាងប្រទេសទាំងពីរកម្ពុជា-ជប៉ុន៕
អត្ថបទ និតរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
