ថ្លែងនៅក្នុងពិធីប្រគល់អារហាររូបករណ៍ដល់កុមារក្រីក្រក្រៅសាលា នៅសាលាបឋមសិក្សាទៀបាញ់គំរូ ស្រុកពួក ខេត្តសៀមរាប កាលពីរសៀលថ្ងៃទី១៤ ខែកក្កដា ឆ្នាំ២០២២ លោក ជួន សុភី តំណាងអង្គការសាលារៀនទន្សាយ បានឲ្យដឹងថា អង្គការសាលារៀនទន្សាយ បានកំពុងអនុវត្តន៍គម្រោងការអប់រំសម្រាប់កុមារក្រៅសាលា ដើម្បីធ្វើចូលរួមចំណែកក្នុងការអនុវត្តគោលដៅទី៤ នៃការអភិវឌ្ឍន៌ប្រកបដោយនិរន្តភាព សម្រាប់ឆ្នាំ២០១៦-២០៣០ ដោយបានកំណត់ថា ធានាឱ្យមានការអប់រំប្រកបដោយគុណភាពជាបរិយាប័ន្ន និងសមធម៌ព្រមទាំងលើកកម្ពស់ ឱកាសរៀនសូត្រពេញមួយជីវិតសម្រាប់មនុស្សគ្រប់រូប និងជាពិសេសផែនការមេសម្រាប់អប់រំកុមារមានពិការភាព របស់ក្រសួងអប់រំ យុវជននិងកីឡា។
លោក ជួន សុភី បានបញ្ជាក់ថា ដើម្បីរួមចំណែកជាមួយរាជរដ្ឋាភិបាលកាត់បន្ថយភាពក្រីក្រ ដូចជារួមចំណែកលើកកម្ពស់គុណភាពបង្រៀន និងរៀនតាមរយៈថ្នាក់សមាហរណកម្ម និងអប់រំបញ្ចូលគ្នាសម្រាប់នៅក្រៅសាលា កុមារពិបាកក្នុងការរៀនសូត្រ កុមារមានពិការភាពបញ្ញាក្នុងការរៀនសូត្រឱ្យកាន់តែប្រសើរឡើង និងឱ្យមានប្រសិទ្ធភាពខ្ពស់ ដោយទទួលបានគាំទ្រពីក្រសួងអប់រំ យុវជននិងកីឡា និងអជ្ញាធរស្រុកពួក និងទទួលបានមូលនិធិគាំទ្រពីម្ចាស់ជំនួយមានដូចជា អង្គការ អេត អាក់ស្យុង។ ជាក់ស្ដែងសព្វថ្ងៃនេះអង្គការសាលារៀនទន្សាយ បានកំពុងគាំទ្រកុមារចំនួន ៣៩៧នាក់ ស្រី ១៨៨នាក់ ក្នុងនោះកុមារទទួលបានអារហាររូបករណ៍ជាសម្ភារសិក្សា ចំនួន ៣៨៤នាក់ ស្រី ១៨១នាក់ និងកុមារដែលទទួលបានកង់ចំនួន ១៣២នាក់ ស្រី ៦៤នាក់ និងគាំទ្រដំណើរការថ្នាក់រៀនកុមារមានពិការភាពចំនួន៥ ផងដែរ។ ជាមួយគ្នានោះអង្គការសាលារៀនទន្សាយ និងព្យាយាមបន្តសកម្មភាពជួយកុមារក្រីក្រីក្រៅសាលារៀន និងមានពិការភាពនៅឆ្នាំសិក្សាក្រោយទៀត។
បើតាមលោកស្រី ឆែម សុធា អភិបាលរងស្រុកពួក ខេត្តសៀមរាប បានមានប្រសាសន៍ថា ចាប់តាំងពីឆ្នាំ២០១៥មក អជ្ញាធរស្រុកពួកបានគាំទ្រ និងសហការយ៉ាងល្អដល់ការអនុវត្តគ្រោងអប់រំកុមារពិការបញ្ញានៅក្នុង ៥ឃុំ ដែលមានដូចជា ឃុំខ្នាត ឃុំពួក ឃុំយាង ឃុំសរសរស្ដម្ភ ឃុំអធិបតី ដោយមានការបង្កើតក្រុមការងារមួយក្រុមដែលមានមន្ទីរអប់រំជាប្រធាន។ ហើយបច្ចុប្បន្ននេះ គម្រោងរបស់អង្គការសាលារៀនទន្សាយ បានផ្ដល់ជាអារហារូបករណ៍ដល់កុមារ មានដូចជា កង់ និងសម្ភារសិក្សា ហើយក៏នឹងផ្ដល់សម្ភារជំនួយដល់កុមារមានពិការភាពដូចជារទេះ ឧបករណ៍ជំនួនស្ដាប់ និងវ៉ែនតា ជួសជុលកែលំអថ្នាក់រៀនបណ្ដុះបណ្ដាលគ្រូបង្រៀន ផ្សព្វផ្សាយអំពីសិទ្ធិទទួលបានការអប់រំកុមារ និងបំបាត់ភាពរើសអើងដល់កុមារមានពិការភាពជាពិសេស។
លោកស្រីក៏បានអំពាវនាវសូមឱ្យអ្នកពាក់ព័ន្ធ ជាពិសេសប្រជាពលរដ្ឋ ត្រូវបើកចិត្តឱ្យទូលាយសម្រាប់កុមារក្រៅសាលាឱ្យបានច្រើនថែមទៀត ដើម្បីផ្ដល់ឱកាសឱ្យពួកគេទទួលបានការអប់រំប្រកបដោយគុណភាព និងស្មើភាពដូចកុមារដទៃទៀតផងដែរ៕
អត្ថបទ និង រូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
