សារធាតុញៀនប្រភេទមេតំហ្វេតាមីន ម៉ាទឹកកក ICE និងប្រភេទមេតំហ្វេតាមីន WY ចំនួនប្រមាណជាង ១០គីឡូក្រាម ត្រូវបានសមត្ថកិច្ច រួមនឹងអាជ្ញាធរជាតិប្រយុទ្ធប្រឆំាងគ្រឿងញៀនដុតបំផ្លាញចោល ដើម្បីអបអរឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា នៅខេត្ដសៀមរាប ក្រោមប្រធានបទ «ដោះស្រាយបញ្ហាគ្រឿងញៀនក្នុងវិបត្តិសុខភាព និងមនុស្សធម៌» នៅព្រឹកថ្ងៃទី១៥ ខែកក្កដា ឆ្នាំ២០២២នេះ ក្រោមអធិបតីភាព ឯកឧត្ដម មាស វិរិទ្ធ អគ្គលេខាធិការនៃអគ្គនាលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងលោក ពិន ប្រាកដ អភិបាលរងខេត្តសៀមរាប ដោយមានការចូលរួមពីសំណាក់ឯកឧត្តមលោកជំទាវជាថ្នាក់ដឹកនាំមន្ទីរអង្គភាពជុំវិញខេត្ត កងកម្លាំងសមត្ថកិច្ចទាំង៣ រួមនឹងសិស្សានុសិស្សជាច្រើនរូបទៀត។
មានប្រសាសន៍ក្នុងឱកាសនោះឯកឧត្ដម មាស វិរិទ្ធ បានថ្លែងថា សារធាតុញៀនដែលធ្វើការដុតបំផ្លាញចោលនាឱកាសនេះ គឺជានូវវត្ថុតាងគ្រឿងញៀន សរុបចំនួន ២០៩ករណី ដែលបានមកពីសាលាដំបូង និងអយ្យការអមសាលាដំបូងខេត្តចំនួន៣ រួមមាន៖ ខេត្ដសៀមរាប ខេត្ដកំពង់ធំ និងខេត្ដព្រះវិហារ ដែលសរុបជាង ១០គីឡូក្រាម។ បរិមាណគ្រឿងញៀនទាំងនេះ ត្រូវបានក្រុមឧក្រិដ្ឋជនយកមកធ្វើអាជីវកម្ម ធ្វើជាជំនួញរបស់ខ្លួន ដើម្បីស្វែងរកប្រាក់ចំណូល ដោយបានពង្វក់ស្មារតីមនុស្ស អូសទាញជនស្លូតត្រង់ ជាពិសេសក្នុងស្រទាប់យុវវ័យឲ្យហ៊ានប្រព្រឹត្ត ឲ្យហ៊ានសាកល្បង ដោយចាប់ផ្តើមដំបូងពីការប្រើប្រាស់ រហូតឈានទៅដល់ការប្រព្រឹត្ត អំពើនៃការចាត់ចែង ការរក្សាទុក ការដឹកជញ្ជូន និងការជួញដូរដោយខុសច្បាប់ ដោយសារឥទ្ធិពលនៃគ្រឿងញៀននេះ។
ឯកឧត្ដមអគ្គលេខាធិការ បានបង្ហាញដែរថា ការប្រើប្រាស់គ្រឿងញៀនបានបង្កឲ្យមានបទល្មើសនានា ដែលកើតមានឡើងនៅក្នុងសង្គមដូចជា អំពើឃាតកម្ម ចាប់ជំរិត រំលោភសេពសន្ថវៈ លួចឆក់ ប្លន់ ទ្រព្យសម្បត្តិ អំពើហិង្សាក្នុងគ្រួសារ និងបង្កអសន្តិសុខជាច្រើនដល់សង្គមជាតិទាំងមូល។ ចំពោះការដុតបំផ្លាញវត្ថុតាងសារធាតុញៀននាពេលនេះ គឺដើម្បីធានាបាននូវសន្ដិសុខសុវត្ថិភាពបានល្អប្រសើរជូនប្រជាពលរដ្ឋ ជាពិសេសការបង្ក្រាបបទល្មើសនេះ បានបង្ករសន្ដិសុខល្អក្នុងការបោះឆ្នោតក្រុមប្រឹក្សាឃុំសង្កាត់អាណត្ដិទី៥ នាពេលកន្លងមក។
ជាមួយគ្នានោះដែរឯកឧត្ដម ក៏បានជម្រុញដល់អាជ្ញាធរពាក់ព័ន្ធ សូមចូលរួមទប់ស្កាត់ការជួញដូរគ្រឿងញៀនឱ្យបានខ្លាំងក្លាបន្ថែមទៀត ខណៈដែលបទល្មើសគ្រឿងញៀន ត្រូវបានឧក្រិដ្ឋជន នៅបន្ដធ្វើការជួញដូរដោយមិនទាន់មានការថយចុះនៅឡើយទេ។ ក្នុងនោះក៏សូមអំពាវនាវដល់ជនរួមជាតិ ជាពិសេសយុវជន យុវនារី និងប្រជាពលរដ្ឋ សូមចៀសឲ្យឆ្ងាយពីគ្រឿងញៀន និងត្រូវចងចាំថា គ្រឿងញៀនបំផ្លាញអ្នក គ្រួសារអ្នក និងសហគមន៍។ យុវជន យុវនារី គឺជាទំពាំងស្នងឬស្សីរបស់សង្គមជាតិ បើយុវជន យុវនារីខ្មែរជ្រើសរើសយកការប្រើប្រាស់គ្រឿងញៀន វានឹងនាំឲ្យមានផលប៉ះពាល់យ៉ាងធ្ងន់ធ្ងរដល់ធនធានមនុស្សក្នុងសង្គមជាតិ។
មានប្រសាសន៍ក្នុងឱកាសនោះដែរ លោក ពិន ប្រាកដ អភិបាលរងខេត្ត បានបង្ហាញថា ដើម្បីលើកកម្ពស់ប្រសិទ្ធភាព ការងារបង្ការ ទប់ស្កាត់ ប្រយុទ្ធប្រឆាំងគ្រឿងញៀនទទួលបានជោកជ័យ គ្រប់បណ្ដាលអ្នកពាក់ព័ន្ធ រួមនឹងប្រជាពលរដ្ឋទូទៅត្រូវបន្តផ្ដោតការយកចិត្តទុកដាក់ ចាត់តាំងអនុវត្តឲ្យបានកាន់តែខ្លាំងក្លាថែមទៀត នូវបទបញ្ជារបស់រាជរដ្ឋាភិបាល ស្ដីពីការពង្រឹងវិធានការប្រយុទ្ធប្រឆាំងគ្រឿងញៀន គោលនយោបាយភូមិ ឃុំមានសុវត្ថិភាព គោលនយោបាយភូមិ ឃុំ សង្កាត់ «ស» គ្មានគ្រឿងញៀន ពិសេសការចាត់តាំងអនុវត្តវិធានការទាំង៥ នៃយុទ្ធនាការ ប្រយុទ្ធប្រឆាំង គ្រឿងញៀនខុសច្បាប់ឲ្យបានម៉ឺងម៉ាត់បំផុត។ ក្នុងនោះត្រូវបន្តធ្វើសកម្មភាពផ្សព្វផ្សាយអប់រំឲ្យកាន់តែល្អប្រសើរ សកម្ម និងផុលផុសថែមទៀត ដោយបន្តពង្រឹង និងពង្រីកកិច្ចសហការ និងចលនាឲ្យមានការចូលរួម និងគាំទ្រពីគ្រប់សមាសភាពនៃសង្គម សំដៅធ្វើយ៉ាងណាឲ្យគ្រប់ក្រុមគោលដៅទាំងអស់ បានទទួលការផ្សព្វផ្សាយអប់រំ និងយល់ដឹងកាន់តែច្បាស់អំពីច្បាប់ និងផលប៉ះពាល់ពាក់ព័ន្ធនឹងគ្រឿងញៀន។
បើតាមលោក មាស ច័ន្ធពិសិដ្ឋ ព្រះរាជអាជ្ញានៃអយ្យការអមសាលាដំបូង ខេត្ដសៀមរាប បានបង្ហាញថា សារធាតុគ្រឿងញៀនជាង ១០គីឡូក្រាម ដែលត្រូវបានដុតកម្ទេចចោលនាឱកាសនេះ មានប្រភេទមេតំហ្វេតាមីន ម៉ាទឹកកកចំនួន ១០.៨៣៧,៤៨ក្រាម និងប្រភេទមេតំហ្វេតាមីនចំនួន ១៤៦,១១ក្រាម ដែលត្រូវបានប្រមូលយកមកពីខេត្តចំនួន៣ គឺខេត្ដសៀមរាប ខេត្ដកំពង់ធំ និងខេត្ដព្រះវិហារ ក្នុងនោះ៖ ខេត្តសៀមរាប មានប្រភេទមេតំហ្វេតាមីន ម៉ាទឹកកក ចំនួន ៩៥៧ក្រាម, ប្រភេទមេតំហ្វេតាមីន ចំនួន ៥៩ក្រាម។ ខេត្តកំពង់ធំ មានប្រភេទមេតំហ្វេតាមីនម៉ាទឹកកក ចំនួន ៤០៦៨,១ក្រាម និង ខេត្តព្រះវិហារ មានសារធាតុញៀនប្រភេទមេតំហ្វេតាមីន ម៉ាទឹកកក ចំនួន ៥៨១២,៤៧ក្រាម និងប្រភេទថ្នាំគ្រាប់ពណ៌ផ្កាឈូក ចំនួន ៨៧,១១ក្រាម៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
