កាលពីថ្ងៃទី១៥ ខែកក្កដា ឆ្នាំ២០២២នេះ សមាគមចលនាយុវជនកម្ពុជា ក្រុម១៥៧ សាខាខេត្តសៀមរាប បានរៀបចំពិធីដាំកូនឈើចំនួន ១,៤០០ដើម និងប្រលែងកូនត្រីចំនួន ៤,៣០០ក្បាល នៅក្នុងតំបន់អូរកូនតឹង នៃស្រុកវ៉ារិន ខេត្តសៀមរាប ក្នុងឱកាសគម្រប់ខួប ១៤ឆ្នាំ នៃការបង្កើតសមាគមមួយនេះឡើង។ ពិធីនេះដែរប្រព្រឹត្តិទៅក្រោមវត្តមាន លោក នាក់ ណេរ៉ុន អភិបាលរងខេត្ត រួមនឹងវត្តមានមេបញ្ជាការរងយោធភូមិភាគទី៤ ប្រធានសមាគមចលនាយុវជនកម្ពុជា នឹងឯកឧត្តមលោកជំទាវ អស់លោកលោកសី្រ តំណាងសភាពាណិជ្ជកម្មសៀមរាប-ឧត្តរមានជ័យ សហភាពសហព័ន្ឋយុវជនកម្ពុជាខេត្ត មន្ទីរបរិស្ថានខេត្ត ខណ្ឌរដ្ឋបាលព្រៃឈើខេត្ត រដ្ឋបាលស្រុកវ៉ាន ព្រមទាំងសប្បុរសជនជាច្រើននាក់។
មានប្រសាសន៍ក្នុងឱកាសនោះ លោក នាក់ ណេរ៉ុន អភិបាលរងខេត្ត បានលើកឡើងថា ការដាំដើមឈើឡើងវិញនាពេលនេះ ដើម្បីបំផុស្មារតីដល់ប្រជាពលរដ្ឋយើង ឲ្យចេះស្រឡាញ់ព្រៃឈើ និងចូលរួមដាំដើមឈើឡើងវិញ និងចូលរួមទប់ស្កាត់ការប្រែប្រួលអាកាសធាតុ ហើយអ្វីដែលជាពិសេសនោះ ចង់ជម្រុញឲ្យមានការចិញ្ចឹមសត្វដំរីនៅទីនេះ ព្រោះថាបច្ចុប្បន្ននៅប្រទេសយើងសព្វថ្ងៃនេះ ជិតផុតពូជដំរីអស់ហើយ បើយើងអាចធ្វើបានគួរតែចិញ្ចឹមដំរីឡើងវិញ ពីដើមដំរីនៅប្រទេសយើងសំបូរណាស់ តែឥឡូវមានតិចតួចមិនដូចនៅប្រទេសថៃ និងប្រទេសជិតខាងយើងទេ។
លោកអភិបាលរងខេត្ត បានបញ្ជាក់ថា ការដាំកូនឈើនៅថ្ងៃនេះ គឺឆ្លុះបញ្ចាំងឲ្យឃើញនូវការភ្ញាក់រលឹករបស់សហគមន៍យើងទាំងមូល ក្នុងការប្រឈមមុខដោះស្រាយបញ្ហាការបាត់បង់ព្រៃឈើ និងជាស្មារតីម្ចាស់ការក្នុងការទទួលខុសត្រូវលើការគ្រប់គ្រងធនធានធម្មជាតិ។ ជាពិសេសសម្រាប់កូនចៅជំនាន់ក្រោយ ដើម្បីឱ្យខេត្តរបស់យើង រក្សាបាននូវគម្របបៃតងស្រស់ស្អាត វាពិតជាមានសារៈប្រយោជន៍ខ្លាំងណាស់ វាមានតួនាទីយ៉ាងសំខាន់ក្នុងការជួយថែរក្សាលំនឹងនៃការប្រែប្រួលអាកាសធាតុ ដែលព្រៃឈើ នឹងបរិស្ថានធម្មជាតិ តាមរយៈការជួយធ្វើនិយ័តកម្មអាកាសធាតុ ជួយកាត់បន្ថយឥទ្ធិពលអវិជ្ជមាននៃការប្រែប្រួលអាកាសធាតុ និងទប់ទល់នឹងគ្រោះរាំងស្ងួត ទឹកជំនន់ ខ្យល់ព្យុះជាដើម។
បើតាមលោក ហ៊ុន ប៉ូគា ប្រធានសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប បានឲ្យដឹងថា សមាគមចលនាយុវជនកម្ពុជា ក្រុម១៥៧ ត្រូវបានបង្កើតឡើងនៅថ្ងៃទី១៥ ខែកក្កដា ឆ្នាំ២០០៨ ដោយឯកឧត្ដមបណ្ឌិត ហ៊ុន ម៉ាណែត ក្នុងគោលបំណងដើម្បីធ្វើសម្មភាពមនុស្សធម៌។ ហើយខេត្តសៀមរាបសមាគមមួយនេះ ត្រូវបានចាប់ផ្ដើមកាលពីថ្ងៃទី១១ ខែកក្កដា ឆ្នាំ២០២០ នឹងបានបន្តរសកម្មភាពមនុស្សធម៌នេះដូចភ្លៀងរលឹម រហូតមកទល់បច្ចុប្បន្ននេះ។ ជាក់ស្ដែងសំរាប់ឆ្នាំ២០២១-២០២២នេះដែរ សមាគមបានធ្វើសកម្មភាពការងារសរុប ៣៩២គោលដៅ។
ក្នុងឱកាសនោះដែរ សមាគមចលនាយុវជនកម្ពុជា ក៏បាននាំយកអំណោយមួយចំនួនប្រគល់ជូនទីបញ្ជាការតំបន់អូរកូនតឹង មាន៖ សូឡា ២ឈុត និងម៉ាស៊ីនព្រីន១ គ្រឿង និងអំណោយជូនដល់បងប្អូនប្រជាពលរដ្ឋចំនួន ៣០គ្រួសារ ក្នុងមួយគ្រួសារៗ រួមមាន៖ អង្ករ ២០គីឡូក្រាម មីជាតិ ១កេស ទឹកត្រី ១យួរ ទឹកស៊ីអ៉ីវ ១យួរ អំបិល ១គីឡូក្រាម ស្ករស ១គីឡូក្រាម ប៊ីចេង ១កញ្ចប់ និង សាប៊ូ ១ដុំផងដែរ៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
