គរុសិស្សជំនាន់ទី៣៧ ចំនួន ១៦១នាក់ មកពីខេត្តសៀមរាប និងខេត្តឧត្តរមានជ័យ ត្រូវបានប្រឡងបញ្ចប់វគ្គបណ្ដុះបណ្ដាលជាគ្រូបឋមសិក្សា ១២+២ ជំនាន់ទី៣៧ ហើយត្រូវបានប្រារព្ធពិធីបិទវគ្គ នាថ្ងៃទី១៥ ខែកក្កដា ឆ្នាំ២០២២នេះ ក្រោមអធិបតីភាពលោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្ដម ទៀ សីហា អភិបាលខេត្តសៀមរាប ព្រះតេជៈព្រះគុណព្រះវិជ័យរង្សី ឡាច លាង ព្រះអនុគណក្រុងសៀមរាប ព្រមទាំងវត្តមានប្រធានអនុប្រធានមន្ទីរអង្គភាព សហភាពសហព័ន្ធយុវជនកម្ពុជាខេត្ត រួមជាមួយនឹងគរុសិស្សជាច្រើនរូបទៀត។
បើតាមលោក ឈត់ ឆៀង នាយកសាលាគរុកោសល្យ និងវិក្រឹតការខេត្ដសៀមរាប បានបញ្ជាក់ថា ការសិក្សារបស់គរុសិស្សជំនាន់ទី៣៧ នៅឆ្នាំទី២ ឆមាសទី២ បានជួបនូវវិបត្តិកូវីដ-១៩ ហើយការសិក្សាដំណើរការតាមវិធីចម្រុះ និងតាមប្រព័ន្ឋពីចម្ងាយ ដោយមានកម្មវិធីសិក្សា និងសកម្មភាពបណ្តុះបណ្តាលច្បាស់លាស់ និងមានរចនាសម្ព័ន្ធគ្រប់គ្រង បុគ្គលិកគ្រូឧទ្ទេសត្រឹមត្រូវ ហើយធ្វើឲ្យសិស្សទទួលបានលទ្ធផលគួរឱ្យកត់សំគាល់ ហើយពួកគេបានចាប់ប៉ុស្តិ៍ ទៅបម្រើការពីឆ្នាំសិក្សា២០២០-២០២១ ចំនួន ១៦១នាក់ ដែលក្នុងនោះក្របខណ្ឌខេត្តសៀមរាបចំនួន ១១៥នាក់ និងក្របខណ្ឌ ខេត្តឧត្តរមានជ័យចំនួន ៤៦នាក់។ ជាមួយគា្ននោះគរុសិស្សជំនាន់ទី៣៨ ចំនួន ១៦៤នាក់ បានចេញបម្រើការឆ្នាំសិក្សា២០២១-២០២២។ ចំណែកគរុសិស្សឆ្នាំទី១ ជំនាន់ទី៣៩ កំពុងទទួលការបណ្តុះ បណ្តាលឆ្នាំ២០២១-២០២២នេះ មានចំនួន ១៣៧នាក់ ក្របខណ្ឌខេត្តសៀមរាប ៩៣នាក់ និងខេត្តឧត្តរមានជ័យ ៤៤នាក់។
មានប្រសាសន៍បិទវគ្គបណ្ដុះបណ្ដាលលោក ពិន ប្រាកដ អភិបាលរងខេត្ដសៀមរាប បានអបអរសាទរចំពោះគរុសិស្សជំនាន់ទី៣៧ ទាំងអស់ ដែលបានខិតខំប្រឹងប្រែង យកអស់ទាំងកម្លាំងកាយ កម្លាំងចិត្ត ក្នុងរយ:ពេលកន្លងមក ហើយថ្ងៃនេះទទួលបានលទ្ធផលជោគជ័យយ៉ាងល្អប្រសើរ។ ជាក់ស្ដែងគរុសិស្សដែលបានប្រឡងបញ្ចប់ វគ្គបណ្តុះបណ្តាលជាគ្រូបឋមសិក្សាដែលទទួលបានលទ្ធផលជាប់ជាស្ថាពរ សុទ្ធសឹងតែហើយបានចេញទៅបម្រើការងារតាមមូលដ្ឋានក្នុងក្រុងស្រុក របស់ខ្លួនតាំងពីក្នុងឆ្នាំសិក្សា២០២០-២០២១មកម្លេះ ប៉ុន្ដែទើបសញ្ញាបត្រជូនពួកគាត់យកទៅប្រើប្រាស់ជាផ្លូវនាពេលនេះ ដោយសារបញ្ហាការាត្បាតជំងឺកូវីដ-១៩ នាពេលកន្លងមក។ សកម្មភាពនេះ គឺបានឆ្លើយតបទៅនឹងគោលនយោបាយរបស់រាជរដ្ឋាភិបាល ដែលបានដាក់ចេញនូវការអភិវឌ្ឍធនធានមនុស្ស ពិសេសវិស័យអប់រំ ចាប់តាំងពីទីក្រុងរហូតដល់ជនបទឲ្យទទួលបានការសិក្សាចាប់តាំងពីថ្នាក់មត្តេយ្យរហូតដល់ឧត្ដមសិក្សាដោយស្មើភាព និងសមធម៌។
លោកអភិបាលរងខេត្ត បន្ដថា សាលាគរុកោសល្យ និងវិក្រឹតការខេត្ត បានយកចិត្តទុកដាក់ខ្ពស់ក្នុងការបណ្តុះបណ្តាលគ្រូបឋមសិក្សាជាច្រើនជំនាន់ និងជាច្រើននាក់កន្លងមក បានលទ្ធផលជោគជ័យល្អប្រសើរគួរជាទីពេញចិត្ត។ ហើយការបញ្ចាប់វគ្គបណ្ដុះបណ្ដាលគ្រូកំរិតបឋមសិក្សានេះដែរ បានធ្វើឱ្យវិស័យអប់រំកាន់តែមានគុណភាពធំធេង ដើម្បីសម្រេចនូវគោលដៅអភិវឌ្ឍប្រកបដោយចីរភាព ដែលត្រូវធានាឱ្យការចូលរៀនរបស់កុមារប្រកបដោយសមធម៌ បរិយាបន្ន និងមានគុណភាពឆ្លើយតបទៅនឹងកាតព្វកិច្ចសិក្សា ដែលមានចែងក្នុងរដ្ឋធម្មនុញ្ញ នៃព្រះរាជាណាចក្រកម្ពុជា និងនិន្នាការអន្តរជាតិ ក្នុងដំណាក់កាលសាកលភាវូបនីយកម្ម។ ដើម្បីឱ្យធនធានមនុស្សប្រទេសជាតិប្រកបដោយសក្តានុពល ប្អូនៗត្រូវយកចិត្តទុកដាក់អភិវឌ្ឍបន្តលើចំណេះដឹងវិជ្ជាជីវៈ ការប្រតិបត្តិការវិជ្ជាជីវៈ ការសិក្សាវិជ្ជាជីវៈ និងសីលធម៌វិជ្ជាជីវៈ ប្រកបដោយគុណវុឌ្ឍិសម្រាប់ធនធានប្រទេសជាតិយើង ដើម្បីឆ្លើយតបទៅនឹងយុទ្ធសាស្ត្រកំណែទម្រង់វិស័យអប់រំ ព្រមទាំងលើកកម្ពស់ឱកាសសិក្សាពេញមួយជីវិត បន្តអនុវត្តការអប់រំឌីជីថល សម្រាប់បណ្ដុះបណ្តាលធនធានមនុស្សក្នុងបរិការណ៍សង្គមសេដ្ឋកិច្ចឌីជីថល៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
