កុមារមានអាយុចាប់ពី ៩ទៅ១១ឆ្នាំ នៅពុំទាន់ហួសពេល ក្នុងការឱ្យពួកគាត់សិក្សាភាសាផ្សេងៗឡើយ អ្នកអាណាព្យាបាល គួរផ្តោតសំខាន់ឱ្យកូនៗរបស់ខ្លួនបានសិក្សាចំណេះដឹងទូទៅភាសាជាតិជាមុនសិន ដោយភាសាជាតិជាយាន និងជាមូលដ្ឋានគ្រឺះដ៏សំខាន់ និងរឹងមាំ ដើម្បីឈោងទៅចាប់សិក្សាលើភាសាផ្សេងៗ ហើយកុមារនឹងប្រើបានទាំងពីរ ឬទាំងបីភាសាយ៉ាងច្បាស់លាស់ ដោយមិនភ្លេចភាសាដើម។ នេះបើតាមការលើកឡើងរបស់ អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អ៊ីយូខេសិន ក្នុងឱកាសសម្ពោធដាក់ឱ្យប្រើប្រាស់ជាផ្លូវការអគារសិក្សាថ្មីរបស់មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប សាខាខេត្តសៀមរាបនៅទី១៧ ខែកក្កដា ឆ្នាំ២០២២។
អ្នកឧកញ៉ា បន្ថែមថា លោកមានការសោកស្តាយ និងហៅការប្រញាប់ប្រញាល់ឱ្យកូនទៅសិក្សាភាសាបរទេសមុនអាយុ៩ឆ្នាំ ដោយមិនបានឆ្លងកាត់ការសិក្សាចំណេះដឹងទូទៅភាសាខ្មែរ ថាជាការគិតខុស ព្រោះវាអាចបង្កឱ្យលទ្ឋផលនៃការសិក្សាភាសាបរទេសកូនៗរបស់ពួកគាត់ មិនអាចប្រើភាសាទាំងពីរជាផ្លូវការបានច្បាស់លាស់។
អ្នកឧកញ៉ា បានផ្ដល់អនុសាសន៍ដល់អាណាព្យាបាលថា មុននឹងបញ្ជូនកូនៗទៅសិក្សាភាសាបរទេស សូមឱ្យពួកគេបានសិក្សាចំណេះដឹងទូទៅភាសាខ្មែរ ឱ្យបានដល់អាយុយ៉ាងហោច ៩ឆ្នាំ ឬ ១១ឆ្នាំសិន។ មួយវិញទៀត អាណាព្យាបាល ត្រូវពិនិត្យតាមដានការសិក្សារបស់កូនជាប្រចាំ គួរកុំបង្ខំឱ្យកូនរៀនសូត្រ ដើម្បីតែពិន្ទុល្អដោយការដាក់សម្ពាធតាមរយៈការពិន័យ ឬការលើកទឹកចិត្តដោយខ្វះភាពតាមដាន និងមិនយល់ពីបញ្ហានៃការសិក្សារបស់កូន។ ទន្ទឹមនឹងការតាមដានការសិក្សានេះ អាព្យាបាល គួរលើកទឹកចិត្ត និងជំរុញការសិក្សាតាមបែបសិក្សាផង កម្សាន្តសប្បាយផងដល់កូនៗ ចៀសការដាក់ពិន័យ ឬហិង្សាឱ្យរៀននោះទេ។ បន្ថែមពីនោះ ចំពោះគ្រួសារដែលមានលទ្ឋភាព គួរជ្រើសរើសគ្រឺះស្ថានសិក្សា ដែលមានគុណភាព និងមាននិយាមគរុកោសល្យច្បាស់លាស់ នោះកូនៗលោកអ្នកនឹងខិតខំសិក្សា ជួយកាត់បន្ថយជាអតិបរិមានូវការបាក់ទឹកចិត្ត ទាំងកូនៗ និងឪពុកម្តាយ។
អត្ថបទ និង រូបភាព៖ លោក យូ វង្ស និងលោក ស៊ាន សុផាត
កែសម្រួល៖ លោក សេង ផល្លី
