នៅថ្ងៃទី១៧ខែកក្កដាឆ្នាំ២០២២នេះ ក្រុមការងារចុះមូលដ្ឋានរបស់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ បាននាំយកនូវទៀនព្រះវស្សា គ្រឿងឧបភោគបរិភោគ និងបច្ច័យទៅវេរប្រគេនព្រះសង្ឃដែលគង់ចាំព្រះវស្សា ចំនួន០៣វត្ត ស្ថិតក្នុងឃុំពាក់ស្នែង ស្រុកអង្គរធំ ខេត្ដសៀមរាប។
ឯកឧត្ដម ផៃ សុខខេង នាយករងខុទ្ធការល័យសម្ដេចពិជ័យសេនា ទៀ បាញ់ និងជាប្រធានក្រុមការងារប្រចាំការចុះមូលដ្ឋានឃុំពាក់ស្នែង មានប្រសាសន៍ថា ពិធីបុណ្យចូលកាន់ព្រះវស្សា ក្នុងរយៈពេលអស់មួយត្រីមាសព្រះសង្ឃគង់ចាំព្រះវស្សានៅក្នុងទីវត្ត ពេលនេះត្រូវបានក្រុមការងារ នាំយកមកវេរប្រគេនដល់ព្រះសង្ឃ ដើម្បីព្រះសង្ឃយកទៅដុត បំភ្លឺបូជាថ្វាយព្រះ និងសិក្សារៀនសូត្រនូវ គម្ពីធម៌វិន័យ ព្រះសម្មាសាម្ពុទ្ធ ព្រះបរមគ្រូនៃយើង ។ឯកឧត្ដមបានបន្ដថា ការប្រារព្ធធ្វើពិធីវេរប្រគេនទៀនព្រះវស្សាទៅតាមគន្លងប្រពៃណីព្រះពុទ្ធសាសនានេះ ដើម្បីឧទ្ទិសកុសលផលបុណ្យដល់បុព្វការីជន សាច់សារលោហិត កម្មាភិបាល យុទ្ធជន យុទ្ធនារី ដែលបានពលី មរណៈ ក្នុងបុព្វហេតុជាតិមាតុភូមិដែលបាន ចែកឋានទៅកាន់លោកខាងមុខផងដែរ ។
ឯកឧត្ដមបន្ថែមថា ពុទ្ធចក្រ និងអាណចក្រ ត្រូវបានដើរទន្ទឹមគ្នា ក្នុងការអភិវឌ្ឍន៍ប្រទេសជាតិឱ្យកាន់តែមានភាពរីចំរើនបន្ថែមទៀត ។ជាពិសេសការចូលរួមសាមគ្គី ជាមួយបងប្អូនប្រជាពលរដ្ឋ និងពុទ្ធសាសនិកក្នុងមូលដ្ឋានមិនដែលអាក់ខានឡើយ។ ឯកឧត្ដម បានសំណូមពរឲ្យប្រជាពុទ្ធបរិស័ទទាំងអស់គ្នា ចូលរួមគោរពច្បាប់ចរាចរណ៍ផ្លូវគោក និងអនុវត្តឲ្យបានខ្ជាប់ខ្ជួន នូវគោលការណ៍ រក្សាអនាម័យឲ្យបានល្អ រួមជាមួយនឹងវិធានការនានា ដែលកំណត់របស់ក្រសួងសុខាភិបាល ដោយត្រូវបន្តរក្សាការប្រុងប្រយ័ត្នខ្ពស់ក្នុងការបង្ការ និងការពារនូវការឆ្លងរីករាលដាលនៃជំងឺកូវីដ១៩ និងបន្តទៅទទួលវ៉ាក់សាំងការពារជំងឺកូវីដ-១៩ ទៅតាមការណែនាំរបស់ក្រសួងសុខាភិបាល។ ក្នុងនោះ សមាជិកក្រុមប្រឹក្សាឃុំសង្កាត់អាណត្ដិទី៥ដែលទើបឆ្នោតថ្មី ត្រូវយកចិត្ដទុកដាក់ មើលការខុសត្រូវនូវទុក្ខលំបាកប្រជាពលរដ្ឋបន្ថែមទៀត។
សូមជម្រាបថា ទេយ្យទាន ដែលបានប្រគល់និងប្រគេនដល់ព្រះសង្ឃនូវវត្ដចំនួនបីនោះ រួមមាន ទៀនវស្សា៦គូរ ស្លាដក៣គូរ អង្ករ ៦បេ មី៦កេះ ទឹកសុទ្ធ ៦កេះ ទឹកកផ្លែឈើ៦កេះទឹកស៊ីវ៦កេះទឹកត្រីកេះតែ៦កញ្ចប់ ស្កស៣០គ.ក អំបិល ប្រេងឆា ទឹកដោះគោ និងថវិកា៦០ម៉ឺនក្នុងមួយវត្ដ រួមមាន សាប្បុរិសារ៉ាម ហៅវត្ដខ្នារត្រាច ប្រាសាទឥទ្ទ្រមុន្នីព្រៃព្រះ និងហៅវត្ដព្រៃព្រះ និងវត្ដសីហវៈណារាម ហៅវត្ដព្រះចែង ៕
អត្ថបទ និង រូបភាព៖ លោក បូ សាវី
