នៅថ្ងៃទី១៤ ខែកក្កដា ឆ្នាំ២០២២នេះ អគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន បានរៀបចំសិក្ខាសាលាស្តីពី ភាពជាអ្នកដឹកនាំប្រព័ន្ធផ្សព្វផ្សាយក្នុងយុគសម័យបដិវត្តន៍ឧស្សាហកម្ម៤.០ នៅសណ្ឋាគារសុខាសៀមរាប ខេត្តសៀមរាប ក្រោមអធិបតីភាព ឯកឧត្តម ផុស សុវណ្ណ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋានព័ត៌មាន និងសោតទស្សន៍ តំណាងដ៏ខ្ពង់ខ្ពស់ឯកឧត្តម ខៀវ កាញារិទ្ឋ រដ្ឋមន្ត្រីក្រសួងព័ត៌មាន រួមជាមួយវត្តមានឯកឧត្តម លោកជំទាវ ថ្នាក់ដឹកនាំក្រសួងព័ត៌មាន ប្រធានមន្ទីរព័ត៌មានរាជធានី ខេត្ត និងមន្ត្រីរាជការទាំង២៥, វាគ្មិនកិត្តិយសជាតិ និងអន្តរជាតិ ស្ថាប័នប្រព័ន្ធផ្សព្វផ្សាយ និងអ្នកសារព័ត៌មានជាតិ និងអន្តរជាតិ ដែលបានចូលរួមនៅទីនេះដោយផ្ទាល់ជាង ៥០រូប និងចូលរួមពីចម្ងាយតាមរយ: Video Conference ជាច្រើនរូបទៀតផងដែរ។
អង្គសិក្ខាសាលាប្រព្រឹត្តិទៅពេញមួយថ្ងៃ ដោយមានបទបង្ហាញ និងបានជជែកពិភាក្សាគ្នា ស្តីពីភាពជាអ្នកដឹកនាំនៃប្រព័ន្ធផ្សព្វផ្សាយ និងការវិវត្តន៍ នៃបច្ចេកវិទ្យាក្នុងយុគសម័យបដិវត្តឧស្សាហកម្មជំនាន់ទី៤ ។ ការចែករលែកបទពិសោធពី វាគ្មិនអន្តរជាតិគឺ លោក George Kuruvilla ប្រធានក្រុមហ៊ុនប្រឹក្សាយោបល់វិស្វកម្មសោតទស្សន៍ នៃក្រសួងព័ត៌មាន និងសោតទស្សន៍ឥណ្ឌា ពាក់ព័ន្ធនឹងបទពិសោធន៍ជាច្រើនទាក់ទងនឹងផលប៉ះពាល់ ឬបច្ច័យ (impact) នៃបដិវត្តឧស្សាហកម្មជំនាន់ទី៤ លើវិស័យសារព័ត៌មាន ដែលមានទាំងកាលានុវត្តភាព និងបញ្ហាប្រឈម។ លោក សុខ សំអាត ជាអ្នកជំនាញទីផ្សារឌីជីថល ក៏បានធ្វើបទបង្ហាញពាក់ព័ន្ធនឹងម៉ូឌែលអាជីវកម្មប្រព័ន្ធផ្សព្វផ្សាយ ក្នុងយុគសម័យឌីជីថលនេះដែរ ។ លោកសំអាត បានលើកឡើងពីសារ:សំខាន់ នៃបដិវត្តឧស្សាហកម្មជំនាន់ទី៤ លើវិស័យសារព័ត៌មាន ដែលសិក្ខាកាមអាចពិចារណា និងយកទៅអនុវត្តបានតាមតម្រូវការរបស់អង្គភាព។ ជាមួយគ្នានោះ ក៏មានវាគ្មិនខ្មែរពីររូបផ្សេងទៀតគឺលោក លាង ដឺលុច និពន្ធនាយកសារព័ត៌មានថ្មីៗ និងលោក ផ្លុង វិចិត្រ និពន្ធនាយកសារព័ត៌មានស៊ីស៊ីថាមស៍ ដែលបានចែករំលែកបទពិសោធន៍ នៃការធ្វើឌីជីថលលូបនីយកម្មនៃអង្គភាពសារព័ត៌មានទាំងពីរ។
ថ្លែងបូកសរុប និងបិទអង្គសិក្ខាសាលា ឯកឧត្តម ផុស សុវណ្ណ ក្នុងនាមក្រសួងព័ត៌មាន និងក្រុមការងាររៀបចំសិក្ខាសាលា បានវាយតម្លៃខ្ពស់ចំពោះការចូលរួមរបស់ វាគ្មិនកិត្តិយសជាតិ និងអន្តរជាតិ តំណាងស្ថាប័នសារព័ត៌មាន ទាំងអស់ ដែលបានខិតខំចែករំលែកចំណេះដឹង និងបទពិសោធន៍ល្អៗ របស់ខ្លួន ដល់សិក្ខាកាមដែលបានចូលរួមនាឱកាសនេះ ថាជាការចូលរួមដ៏មានសារ:សំខាន់ក្នុងការអភិវឌ្ឍន៍ប្រព័ន្ធផ្សព្វផ្សាយ និងសារព័ត៌មាននៅកម្ពុជាឲ្យកាន់តែប្រសើរឡើងបន្ថែមទៀត ដើម្បីមានសមត្ថភាពប្រកួតប្រជែងទាំងនៅក្នុងប្រទេស និងអន្តរជាតិ។ ឯកឧត្តម បានផ្តល់នូវចំណុចគន្លឺះ និងធាតុចូល មួយចំនួន ដើម្បីអភិវឌ្ឍន៍ប្រព័ន្ធផ្សព្វផ្សាយ និងសារព័ត៌មាននៅកម្ពុជា សំដៅធ្វើឱ្យប្រព័ន្ធផ្សព្វផ្សាយ និងសារព័ត៌មានត្រូវផ្តោតសំខាន់ លើផលប្រយោជន៍អតិថិជន ព្រោះបច្ចុប្បន្ននេះ អតិថិជនត្រូវការ content ដែលមានគុណភាព និង មានប្រយោជន៍សម្រាប់ពួកគេ។ ឯកឧត្តម មានប្រសាសន៍បន្តថា៖ ថ្នាក់ដឹកនាំអង្គភាពត្រូវត្រួតពិនិត្យឡើងវិញនូវឥរិយាបថ នៃភាពជាអ្នកដឹកនាំរបស់ខ្លួន និងត្រូវខិតខំអភិវឌ្ឍន៍សមត្ថភាពវិជ្ជាជីវ: និងចំណេះដឹង ក្នុងការប្រើប្រាស់បច្ចេកវិទ្យា ដើម្បីអាចដើរទាន់នៃការវិវត្តឥតឈប់ឈររបស់បច្ចេកវិទ្យា ព្រោះថា មិនមាននរណាម្នាក់ល្អឥតខ្ចោះនោទេ ដូចនេះ អង្គភាព និងអ្នកសារព័ត៌មានត្រូវពង្រឹងកិច្ចសហប្រតិបត្តិការ និងចេះជួយគ្នាទៅវិញទៅមក។
ឯកឧត្តម សង្កត់ធ្ងន់ថា៖ មនុស្សបង្កើតបច្ចេកវិទ្យា ហើយមនុស្សជាអ្នកប្រើបច្ចេកវិទ្យា និងអ្នកខ្លះប្រើវា ដើម្បីបំផ្លាញពិភពលោក។ ដូច្នេះយើងត្រូវប្រើប្រាស់បច្ចេវិទ្យាក្នុងផ្លូវដ៏ត្រឹមត្រូវ និងបម្រើផលប្រយោជន៍មនុស្សជាតិ៕
អត្ថបទ និងរូបភាព: លោកយូ វង្ស និងលោកជា ស្រស់ កែសម្រួលដោយ លីវ សុខុន!!! ។
