នាថ្ងៃទី៣១ ខែកក្កដា ឆ្នាំ២០២២នេះ ក្រុមការងារគណបក្សចុះជួយមូលដ្ឋានស្រុកស្រីស្នំ ខេត្តសៀមរាប សហការជាមួយគណ:កម្មាធិការគណបក្សប្រជាជនកម្ពុជា ស្រុកស្រីស្នំបានរៀបចំកិច្ចប្រជុំផ្សព្វផ្សាយខ្លឹមសារមហាសន្និបាតគណ:កម្មាធិការកណ្តាលវិសាមញ្ញរបស់គណបក្សប្រជាជនកម្ពុជា ក្រោមអធិបតីភាព ឯកឧត្តម ស៊ិន រុន អនុប្រធានក្រុមការងារគណបក្សចុះមូលដ្ឋានស្រុកស្រីស្នំ តំណាងដ៏ខ្ពង់ខ្ពស់ ឯកឧត្តម លន់ សុធី ប្រធានក្រុមការងារគណបក្សចុះមូលដ្ឋានស្រុកស្រីស្នំ រួមជាមួយឯកឧត្តម លោក លោកស្រីអនុប្រធានក្រុមការងារចុះជួយស្រុក ប្រធាន អនុប្រធានក្រុមការងារចុះជួយឃុំ ភូមិ ព្រមទាំងវត្តមាន ប្រធាន អនុប្រធាន និងមន្ត្រីក្រុមការងារយុវជនខេត្តចុះជួយស្រុក ឃុំ ភូមិ ក្នុងស្រុកស្រីស្នំសរុចំនួន ១២៥រូប។ លោក ហ៊ន់ ឬទ្ធិ ប្រធានគណបក្សស្រុក បានអានទាំងស្រុងនូវសេចក្ដីជូនដំណឹង ស្តីពីលទ្ធផល នៃសន្និបាតគណ:កម្មាធិការកណ្តាលវិសាមញ្ញរបស់គណបក្សប្រជាជនកម្ពុជា ទាំង៧ចំណុច ក្នុងន័យឆ្លុះបញ្ចាំងនូវការផ្តល់យុត្តិធម៌របស់ប្រជាពលរដ្ឋ ចំពោះសច្ចភាព នៃការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ទាំងនៅថ្នាក់ជាតិ និងថ្នាក់មូលដ្ឋាន ដោយបង្ហាញច្បាស់ថា ប្រជាជនគាំទ្រសន្តិភាព គាំទ្រការអភិវឌ្ឍ និងគាំទ្រសម្តេចអគ្គមហាសេនាបតីតេជោ ហ៊ុន សែនជាប្រធានគណបក្សប្រជាជន និងជានាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងបានកោតសរសើរ និងវាយតម្លៃខ្ពស់ចំពោះក្រុមការងារគណបក្សចុះមូលដ្ឋានគ្រប់ថ្នាក់ គ្រប់ផ្នែកដែលប្រឹងប្រែងគ្រប់លទ្ធភាពយកអស់កម្លាំងកាយចិត្តលះបង់ពេលវេលា និងធនធានផ្ទាល់ខ្លួនផ្សារភ្ជាប់ជាមួយមូលដ្ឋាន និងប្រជាជន ក្នុងស្មារតីសាមគ្គីឯកភាពផ្ទៃក្នុងដ៏រឹងមាំ ដើម្បីបំរើបុព្វហេតុរបស់គណបក្ស។ ជាមួយគ្នានោះ អង្គសន្និបាតក៏បានអំពាវនាវដល់ជនរួមជាតិទាំងមូល ទាំងនៅក្នុង និងនៅក្រៅប្រទេស បន្តរួមសាមគ្គីគ្នាជាធ្លុងមួយ ក្រោមដំបូលរដ្ឋធម្មនុញ្ញ និងម្លប់ដ៏ត្រជាក់ នៃព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការ:ដ៏ខ្ពង់ខ្ពស់បំផុត និងរួមសាមគ្គីជុំវិញរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ដើម្បីថែរក្សាសន្តិភាព ការពាររាល់សមិទ្ធផលរបស់សង្គមជាតិ និងបន្តកសាងមាតុភូមិយើងឱ្យកាន់តែរីកចម្រើនឱ្យប្រសើរឡើងថែមទៀត។
ក្នុងកិច្ចប្រជុំ ក៏ទទួលបាននូវមតិចូលរួមរបស់ប្រធានក្រុមការងារចុះជួយឃុំនានាក្នុងស្រុកស្រីស្នំ លើកឡើងបង្ហាញពីចំណាប់អារម្មណ៍ និងឆន្ទ:គាំទ្រចំពោះលទ្ឋផល នៃអង្គសន្និបាតគណកម្មាធិការកណ្តាលវិសាមញ្ញរបស់គណបក្សប្រជាជនកម្ពុជានេះ និងបន្តខិតខំប្រឹងប្រែងអនុវត្តឱ្យបានជោគជ័យតាមស្មារតី នៃលទ្ធផល និងសេចក្តីសម្រេចនេះ។ មានប្រសាសន៍សំណេះសំណាលក្នុងកិច្ចប្រជុំ ឯកឧត្តម ស៊ិន រុន សមាជិកអចិន្ត្រៃគណបក្សខេត្តនិងជាអនុប្រធានក្រុមការងារគណបក្សចុះជួយស្រុកស្រីស្នំ ខេត្តសៀមរាប ណែនាំ និងជំរុញដល់ក្រុមការងារចុះជួយស្រុកនេះទាំងអស់យកទៅអនុវត្តឱ្យមានប្រសិទ្ធភាពតាមស្មារតី នៃសន្និបាតគណ:កម្មាធិការកណ្តាលវិសាមញ្ញនៃគណបក្សប្រជាជនកម្ពុជា សំដៅពង្រឹងឲ្យបានខ្លាំងក្លានូវយុទ្ឋសាស្ត្រនានា ដែលគណបក្សបានដាក់ទិសដៅអនុវត្តបន្ត។ ឯកឧត្តម បានជំរុញលើកទឹកចិត្តចំនួន៥ចំណុច ជូនដល់សមាជិក សមាជិកាក្រុមការងារចុះជួយមូលដ្ឋានស្រុកស្រីស្នំ គ្រប់លំដាប់ថ្នាក់យកទៅអនុវត្តបន្ត ដើម្បីពង្រឹងការអនុវត្តទិសដៅការងាររបស់គណបក្ស សម្រាប់ការបោះឆ្នោតជ្រើសរើសតំណាងរាស្ត្រនីតិកាលទី៧ ដែលនឹងប្រព្រឹត្តិទៅនៅថ្ងៃទី២៣ ខែកក្កដាឆ្នាំ២០២៣ ខាងមុខ។ ឯកឧត្តម ស៊ិន រុន មានប្រសាសន៍ថា៖ក្រុមការងារទាំងអស់ត្រូវប្រឹងប្រែង និងយកចិត្តទុកដាក់ទី១ -ក្តាប់ឱ្យបានពីសភាពការណ៍ និងស្ថានភាពគណបក្សនយោបាយនានា ដែលមាននៅក្នុងមូលដ្ឋាន។ ទី២ ត្រូវរក្សាសាមគ្កីភាពផ្ទៃក្នុង រិះរកគន្លឺះដែលនាំឱ្យជោគជ័យ និងត្រូវថ្លឹងថ្លែងផងដែរ ពីកត្តាប្រឈមនានា, ទី៣ ត្រូវធ្វើជាគំរូឈានមុខ សម្រាប់ជាត្រីវិស័យក្នុងការពង្រឹង និងបំពាក់បំប៉នគោលជំហរជូនទៅដល់យុវជន ដែលជាអ្នកបន្តវេននាពេលអនាគត, ទី៤ មេឃុំ មេប៉ុស្តិ៍ ស្មៀនឃុំ មេភូមិ ទាំង៤នេះ ជាតួអង្គសំខាន់ក្នុងការបំរើសេវាសាធារណ:ជូនប្រជាជន ក្នុងមូលដ្ឋាន ប្រកបដោយភាពលឿនរហ័ស តម្លាភាព និងគណនេយ្យភាព ឈរលើស្មារតីគោរពតួនាទី ភារកិច្ចរបស់ខ្លួន និងទី៥ បន្តរួមសហការគ្នាអនុវត្តការងារឱ្យមានប្រសិទ្ធភាព តាមគោលការណ៍ និងទិសដៅរបស់បក្សដាក់ជូន៕
អត្ថបទ និងរូបភាព: លោកយូ វង្ស
កែសម្រួលដោយ លីវ សុខុន!!!
