នៅក្នុងឱកាសអញ្ជើញចូលជួបសំដែងការគួរសម និងពិភាក្សាការងារជាមួយ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន នាព្រឹកថ្ងៃទី០២ ខែសីហា ឆ្នាំ២០២២ លោក Raymond Sia Say Guan ប្រធានសមាគមធនាគារនៅកម្ពុជា បានគោរពអញ្ជើញ ឯកឧត្តម រដ្ឋមន្រ្តី ចូលរួមជាអធិបតីកម្មវិធី ប្រគល់ពានរង្វាន់ដល់អ្នកសារព័ត៌មាន ដែលបានជាប់ជាម្ចាស់ជ័យលាភី ការប្រកួតប្រជែងសរសេរអត្ថបទពាក់ពន្ធ័វិស័យធនាគារ និងហិរញ្ញវត្ថុ ដែលគ្រោងធ្វើឡើងនៅរសៀលថ្ងៃទី០៥ ខែសីហា ឆ្នាំ២០២២ នាសណ្ឋាគារកាំបូឌីយ៉ាណា រាជធានីភ្នំពេញ ។
លោកជំទាវ ឌិត នីតា អនុប្រធានសមាគមមីក្រូហិរញ្ញវត្ថុកម្ពុជា អមដំណើរដោយគណៈគ្រប់គ្រងសមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងក្លិបអ្នកកាសែតកម្ពុជា ។
តាមការបញ្ជាក់របស់ លោក កាំង តុងងី ប្រធាននាយកដ្ឋានទំនាក់ទំនងនៃ សមាគមមីក្រូហិរញ្ញវត្ថុកម្ពុជា បានលើកឡើងថា ក្រៅពីកម្មវិធីប្រគល់ពានរង្វាន់ដល់ម្ចាស់ជ័យលាភី ក៏ជាឱកាសបង្កើតទំនាក់ទំនងរវាងអ្នកសារព័ត៌មាន និងអ្នកបំពេញការងារក្នុងវិស័យធនាគារ ដើម្បីអោយកិច្ចការផ្សព្វផ្សាយរបស់អ្នកសារព័ត៌មាន ពាក់ពន្ធ័វិស័យធនាគារ និងហិរញ្ញវត្ថុ បានកាន់តែទូលំទូលាយ និងសុីជម្រៅ ។
លោក Raymond Sia Say Guan បានជម្រាបជូនថា កន្លងមកនេះគឺ សមាគមធនាគារ នៅកម្ពុជា បានសហការជាមួយក្លឹបអ្នកកាសែតកម្ពុជា ដើម្បីធ្វើជាការប្រកួតប្រជែងសរសេរអត្ថបទព័ត៌មាន ទាក់ទងវិស័យធនាគារ និងហិរញ្ញវត្ថុ ដើម្បីជំរុញការយល់ដឹងរបស់អ្នកសារព័ត៌មានឲ្យយល់ពីកិច្ចការងាររបស់ធនាគារ ជាពិសេសដោយសារមូលដ្ឋានគ្រឹះនៃសកម្មភាពនិងកំណើនរបស់ធនាគារ គឺការយល់ដឹងរបស់ប្រជាជន និងទំនាក់ទំនងដើម្បីធ្វើយ៉ាងណាអោយប្រជាជន យល់ដឹងអំពីរបៀបរបបធ្វើការរបស់ធនាគារ ។
ដូច្នេះការចូលរួមអ្នកកាសែត គឺជាការចាំបាច់មួយ បង្កើនទំនុកចិត្តការយល់ដឹង ក៏ដូចជាបង្កើនទំនុកចិត្តរបស់សាធារណជន មកលើការងាររបស់ ធនាគារ ដែលជាផ្នែកមួយដ៏សំខាន់នៃកម្លាំងចលកររបស់សេដ្ឋកិច្ចជាតិ។ ឯកឧត្តម រដ្ឋមន្រ្តី ថ្លែងសរសើរចំពោះការផ្ដួចផ្ដើមគំនិតរៀបចំជាការ ប្រកួតប្រជែងសរសេរអត្ថបទព័ត៌មាន ទាក់ទង វិស័យធនាគារ និងហិរញ្ញវត្ថុ ។ ឯកឧត្តម ខៀវ កាញារីទ្ធ បានលើកឡើងថា កាលពីមុនមកគឺយើងជំរុញបញ្ហា អក្ខរកម្មសារព័ត៌មាន តែឥឡូវនេះឃើញថា អក្ខរកម្មសារព័ត៌មាន មានកំណើនគ្រាន់បើហើយ ប៉ុន្តែឥឡូវយើងនៅខ្វះ អក្ខរកម្ម ធនាគារ ដោយសារថាកន្លងមកនេះ នៅពេលមានការ បោះឆ្នោតម្តងៗ គណបក្សនយោបាយខ្លះបានលើកការឃោសនា ដោយអត់បានយល់អ្វីទាំងអស់ ដែលធ្វើឲ្យប៉ះពាល់ដល់ទំនុកចិត្តសាធារណៈទៅលើការងារធនាគារ ហើយចំពោះធនាគារ ការជឿ និងមានទំនុកចិត្តរបស់ប្រជាជន គឺជាមូលដ្ឋានដ៏ធំនៃសកម្មភាព និងការរស់រានមានជីវិត។
ដូច្នេះហើយយើងកំពុងតែគិតអំពីការរៀបចំគោលការណ៍យ៉ាងណាដែល គណបក្សនយោបាយ នៅពេលបោះឆ្នោត ត្រូវជៀសវាងអំពីការឃោសនាណាដែលប៉ះពាល់ដល់មូលដ្ឋានគ្រឹះនៃសេដ្ឋកិច្ចជាតិ ក៏ដូចជាមូលដ្ឋានគ្រឹះនៃ ធនាគារ។
ឆ្លៀតក្នុងឱកាសនេះដែរ ឯកឧត្តម រដ្ឋមន្រ្តី បានសំណូមពរ សមាគមធនាគារកម្ពុជា ក្នុងការជំរុញធ្វើយ៉ាងណាអោយអក្ខរកម្មធនាគារនេះបានកាន់តែរីកជ្រាបទៅក្នុងចំណោម អ្នកសារព័ត៌មាន៕
