យោងតាមសេវាកម្មភូគព្ភសាស្ត្ររបស់ប្រជាជាតិប៉ាស៊ីហ្វិកបានឲ្យដឹងថា ភ្នំភ្លើងមួយកន្លែងនៅកោះភាគខាងជើងរបស់តុងហ្គាបានផ្ទុះឡើងចំនួន ៨ ដងក្នុងរយៈពេល ៤៨ ម៉ោងចុងក្រោយនេះ និងបានព្រមានអ្នកស្រុកឲ្យនៅឆ្ងាយពីតំបន់នោះផងដែរ ។
នេះបើតាមការចេញផ្សាយដោយទីភ្នាក់ងារសារព័ត៌មាន Al Jazeera នៅថ្ងៃពុធ ទី២១ ខែកញ្ញា ឆ្នាំ២០២២។
ភ្នំភ្លើង Home Reef បានផ្ទុះឡើងក្នុងរយៈពេល ១០ ថ្ងៃចុងក្រោយនេះ និងបានហូរចេញនូវកម្អែភ្នំភ្លើង ក៏ដូចជាព្រួសផ្សែង និងផេះយ៉ាងហោចណាស់ ៣ គីឡូម៉ែត្រទៅលើអាកាស ខណៈក៏មានការផ្ទុះចំនួន ៦ ដងផងដែរក្នុងរយៈពេល ២៤ ម៉ោងចុងក្រោយកាលពីថ្ងៃអង្គារ ។
សេវាកម្មភូគព្ភសាស្ត្របាននិយាយនៅក្នុងសេចក្តីថ្លែងការណ៍មួយថា អ្នកបើកយន្តហោះត្រូវបានព្រមានឲ្យមានការប្រុងប្រយ័ត្ននៅពេលហោះហើរកាត់តាមដែនអាកាសក្បែរភ្នំភ្លើង បន្ទាប់ពីកម្រិតប្រកាសអាសន្នអាកាសចរណ៍សម្រាប់ភ្នំ Home Reef បានកើនឡើងដល់ពណ៌ទឹកក្រូច ពោលក្រោមកម្រិតភាពអាសន្នតែមួយប៉ុណ្ណោះ ។
គួរបញ្ជាក់ថា សកម្មភាពរញ្ជួយគឺជារឿងធម្មតាទៅហើយនៅជុំវិញតុងហ្គា ដែលជាប្រទេសប្រជុំកោះតូចមួយដែលមានមនុស្សប្រហែល ១០០,០០០ នាក់ និងមានកោះចំនួន ១៧១ ប៉ុន្តែកម្រិតការព្រមានកាលពីថ្ងៃអង្គារគឺខ្លាំងជាងធម្មតា ដោយសារតែល្បឿននៃការផ្ទុះបានកើនឡើងយ៉ាងឆាប់រហ័សនៅឯភ្នំភ្លើង Home Reef ។
ទន្ទឹមនោះនៅក្នុងខែមករាឆ្នាំនេះ តុងហ្គាក៏បានជួបការផ្ទុះនៃភ្នំភ្លើង Hunga-Tonga-Hunga-Ha’apai ផងដែរ ដែលជាភ្នំភ្លើងដ៏មានឥទ្ធិពលបំផុតមួយក្នុងសម័យទំនើប ហើយវាក៏ជាការផ្ទុះដូចគ្រាប់បរមាណូដែលបានបង្កើតរលកយក្សស៊ូណាមិក្នុងជម្រៅ ១៥ ម៉ែត្រ និងបានសម្លាប់មនុស្ស ៣ នាក់ បំផ្លាញភូមិ និងកាត់ផ្តាច់ខ្សែទំនាក់ទំនងរបស់តុងហ្គា ដែលធ្វើឲ្យប្រទេសនេះនៅឆ្ងាយពីពិភពលោកជាច្រើនសប្តាហ៍ ៕
