ថ្ងៃទី២៥ ខែកញ្ញា ឆ្នាំ២០២២ ឯកឧត្តម បណ្ឌិត អ្នកឧកញ៉ា សៀង ណាំ តំណាងរាស្រ្តមណ្ឌលសៀមរាបនិងជាប្រធានក្រុមការងារខេត្តចុះមូលដ្ឋានស្រុកក្រឡាញ់ និងលោកជំទាវ ឯកឧត្ដម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប និងអមដំណើរដោយរដ្ឋបាលស្រុក លោក លោកស្រី មកពីមន្ទីរ អង្គភាពពាក់ព័ន្ធជុំវិញខេត្ត បានចុះសួរសុខទុក្ខ និងនាំយកអំណោយរបស់សម្ដេចពិជ័យសេនាទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារចុះមូលដ្ឋានខេត្តសៀមរាប ដល់គ្រួសារមានជីវភាពខ្វះខាត និងរងគ្រោះដោយសារទឹកជំនន់ចំនួន ៥១១គ្រួសារក្នុងស្រុកក្រឡាញ់។
តាមរបាយការណ៍របស់លោក សុខ ណារ៉េត អភិបាលស្រុកក្រឡាញ់ស្តីទី បង្ហាញថា គិតចាប់ពីថ្ងៃទី ១៧ ដល់ ២២ ខែកញ្ញានេះ ស្រុកក្រឡាញ់ មានភ្លៀងធ្លាក់ជាប់ៗគ្នា ព្រមទាំងទទួលទឹកជំនន់ហូរធ្លាក់ពីស្រុកស្រីស្នំ និងស្រុកវ៉ារិនផងដែរ។ ទឹកជំនន់នេះ បានបង្កឱ្យលិចក្រោមផ្ទះ ផ្លូវ ក្នុងក្នុងនោះមាន ឃុំចំនួន ០៨និង ៥៨ភូមិ ស្មើនឹង ៥១១គ្រួសារ។
ជាមួយនឹងផលប៉ះពាល់នេះ ឯកឧត្តម បណ្ឌិត អ្នកឧកញ៉ា សៀង ណាំ និងឯកឧត្ដម ទៀ សីហា បានសម្តែងការសោកស្តាយ ចំពោះការខាតបង់ទ្រព្យសម្បត្តិដោយសារគ្រោះធម្មជាតិនេះ។
ព័ត៌មានជាតិ ថ្មីៗ
ជាមួយនោះ ឯកឧត្ដម ទៀ សីហា បានអំពាវនាវដល់ប្រជាពលរដ្ឋ ត្រូវមានការប្រុងប្រយ័ត្នខ្ពស់ ចំពោះការឆ្លងចរន្តអគ្គិសនី កូនចៅតូចៗអំឡុងពេលទឹកជំនន់ និងត្រូវរក្សាអនាម័យ ហូបស្អាត ផឹកស្អាត ដើម្បីចៀសវាងពីជំងឺឆ្លងផ្សេងៗ។
គួរជម្រាបថា អំណោយដែលបានប្រគល់ជូនប្រជាពលរដ្ឋ តាមរយៈរដ្ឋបាលស្រុកក្រឡាញ់នាពេលមាន ត្រីខកំប៉ុងចំនួន ៦០០យួរ អង្ករចំនួន ១៥តោន និងថវិកាចំនួន ២០លានរៀល។
អត្ថបទ និង រូបភាព៖ លោក យូ វង្ស និងលោក ស៊ាន សុផាត
កែសម្រួល៖ លោក សេង ផល្លី
