ភ្ញៀវទេសចរជាតិ និងអន្ដរជាតិរាប់ពាន់នាក់ បាននាំគ្នាទៅទស្សនារមណីយដ្ឋានអង្គរ នាឱកាសនៃថ្ងៃឈប់សម្រាប់ក្នុងពិធីបុណ្យភ្ជុំបិណ្ឌប្រពៃណីជាតិខ្មែរ នាថ្ងៃទី២៤ ខែកញ្ញា ឆ្នាំ២០២២ ដែលជាថ្ងៃទីមួយ។
ក្រុមអ្នកទេសចរជាតិបានឱ្យដឹងដូចៗគ្នាថា ពិធីបុណ្យភ្ជុំបិណ្ឌនាឆ្នាំនេះចំថ្ងៃឈប់សម្រាកច្រើនថ្ងៃ ហើយស្ថានភាពជំងឺកូវីដ-១៩ បានធូរស្រាល ទើបពួកគាត់មានឱកាសដើរកំសាន្។ ជាមួយគ្នានោះការដើរកំសាន្ដនៅប្រាសាទអង្គរវត្ដ ស្របពេលប្រទេសជាតិមានសុខសន្ដិភាព ផ្លូវថ្នល់មានការអភិវឌ្ឍ ងាយស្រួលធ្វើដំណើរ ជាពិសេសការទៅទស្សនាអង្គរ ក៏ជាការលើកស្ទួយនូវតម្លៃវប្បធម៌ខ្មែរផងដែរ។
ពួកគាត់បានសម្ដែងការរីករាយ ក្នុងការជួបជុំគ្នាសប្បាយក្នុងពិធីបុណ្យភ្ជុំបិណ្ឌប្រពៃណីជាតិខ្មែរនាឆ្ណាំនេះ។ មួយវិញទៀតភ្ញៀវទេសចរដែលដើរកំសាន្ដ ក៏បានរួមចំណែកលើកស្ទួយសេដ្ឋកិច្ចដល់ប្រជាពលរដ្ឋក្នុងមូលដ្ឋាន ជាពិសេសផ្តល់ឱកាសដល់អ្នករកស៊ីផ្នែកទេសចរណ៍រៀបចំបើកទ្វារឡើងវិញ ដើម្បីបម្រើសេវាកម្មទេសចរណ៍សម្រាប់ត្រៀមទទួលភ្ញៀវទេសចរបរទេស ខណៈទីតាំងអាជីវកម្មទេសចរណ៍ជាច្រើនកន្លងមក បានបិទទ្វារដោយសារស្ថានភាពជំងឺកូវីដ-១៩។
សូមជម្រាបថា ពិធីបុណ្យជាតិធំៗ និងពិធីបុណ្យសំខាន់ៗ ដែលអ្នកទេសចររាប់ម៉ឺននាក់ ទៅទស្សនានៅប្រាសាទអង្គរវត្ដនាខេត្ដសៀមរាប រួមមាន ពិធីបុណ្យចូលឆ្នាំថ្មីប្រពៃណីខ្មែរ ពិធីឆ្លងឆ្នាំសកល ពិធីបុណ្យភ្ជុំបិណ្យ និងពិធីបុណ្យអុំទូក អកអំបុក បណ្ដែតប្រទីប និងសំពះព្រះខែជាដើម។ ជាមួយគ្នានោះ ក្រសួងទេសចរណ៍បានឲ្យដឹងនាពេលថ្មីៗនេះថា ការមកដល់របស់ទេសចរបរទេសនៅកម្ពុជាមានសន្ទុះឡើងវិញ ក្រោយកម្ពុជាបានបើកប្រទេស ក្នុងរយៈពេល ៦ខែចុងក្រោយនេះ បន្ទាប់ពីរដ្ឋាភិបាលបានសម្រេចបើកប្រទេសលើគ្រប់វិស័យឡើងវិញ៕
អត្តបទ និង រូពភាព៖ លោក បូ សាវី
