ក្រសួងបរិស្ថាន នឹងរៀបចំកិច្ចប្រជុំរដ្ឋមន្ដ្រីបរិស្ថានអាស៊ាន លើកទី៣៣របស់ខ្លួន និងកិច្ចប្រជុំពាក់ព័ន្ធ នៅសណ្ឋាគារសុខាល័យអង្គរ ខេត្ដសៀមរាប ចាប់ពីថ្ងៃទី៣ដលល់ថ្ងៃទី៧ ខែតុលា ឆ្នាំ២០២២នេះ ដោយមានបណ្ដាប្រទេសចំនួន ១៥ប្រទេសចូលរួម។
ឯកឧត្ដម វ៉ាន់ មុនីនាថ អគ្គនាយកអគ្គនាយកដ្ឋានគោលនយោបាយ និងយុទ្ធសាស្ដ្រនៃក្រសួងបរិស្ថាន បានឱ្យដឹងនៅថ្ងៃទី២៧ ខែកញ្ញានេះថា កិច្ចប្រជុំនឹងធ្វើឡើងចំនួន៥ថ្ងៃ ដោយលើកយកប្រធានបទសំខាន់ៗ ទាក់ទងនឹងបរិស្ថានក្នុងតំបន់អាស៊ានរួមមាន ការងារតំបន់ឆ្នេរ ការងារអប់រំបរិស្ថាន ការបម្រែបំរួលអាកាសធាតុ ការបំពុលផ្សែងអាប់ឆ្លងដែន និងកិច្ចប្រជុំពាក់ព័ន្ធផ្សេងៗទៀត។ ជាមួយគ្នានោះក៍មានកិច្ចប្រជុំបរិស្ថានអាស៊ានបូកបី ចិន ជប៉ុន កូរ៉េ ដើម្បីពិនិត្យមើលពីវឌ្ឍនៈភាពទាំងអស់ ដែលអាស៊ានបូកបីនេះ បានឯកភាពគ្នាកាលពីប្រាំឆ្នាំមុន។ ក្នុងនោះដែរ ក៍មានកិច្ចប្រជុំអាស៊ាន អាមេរិក កិច្ចប្រជុំអាស៊ានសហគមន៍អឹរ៉ុបផងដែរ ដើម្បីពិភាក្សាគ្នាពីបរិស្ថាន និងការបម្រែបំរួលអាកាសធាតុ។
ឯកឧត្ដមបានបន្ដថា នៅថ្ងៃទី០៥ ខែតុលា នឹងបើកជាផ្លូវការដែលមានការអញ្ជើញជាអធិបតីយពី ឯកឧត្ដម សាយ សំអាល់ រដ្ឋមន្ដ្រីក្រសួងបរិស្ថាន ប៉ុន្ដែនៅថ្ងៃទី០៣ និងថ្ងៃទី០៤ ខែតុលា ជាកិច្ចប្រជុំពិភាក្សារដ្ឋមន្ដ្រីអាស៊ាន ដើម្បីដាក់ឯកសារជូនឧត្ដមមន្ដ្រី ពិនិត្យនិងសម្រេចបន្ទាប់ពីបើកជាផ្លូវការ។ ឯកឧត្ដមបញ្ជាក់ថា ចាប់ពីថ្ងៃទី០៥ ដល់ថ្ងៃទី០៦ នឹងមានកិច្ចប្រជុំពិភាក្សាគ្នាលំអិតស្ដីពីជីវៈចំរុះជាមួយភាគីពាក់ព័ន្ធដែលជាដៃគូរជំនួយនៅក្នុងតំបន់អាស៊ាន។
ព័ត៌មានជាតិ ថ្មីៗ
សូមបញ្ជាក់ថា កិច្ចប្រជុំរដ្ឋមន្ដ្រីបរិស្ថានអាស៊ាននេះ នឹងធ្វើឡើងដោយផ្ទាល់ និងប្រជុំតាមប្រព័ន្ធហ្សូមផង ដែលមានបណ្ដាប្រទេសចំនួន ១៥ចូលរួម ក្នុងនោះមានប្រទេសចិន ប្រទេសកូរ៉េ ប្រទេសជប៉ុន សហរដ្ឋអាមេរិក សហគមន៍អឺរ៉ុប និងបណ្ដាប្រទេសក្នុងតំបន់អាស៊ាន៕
អត្ថបទ និងរូបភាព៖ លោក បូ សាវី
