ក្រុមអាជីវករដែលលក់ដូរនៅខាងមុខប្រាសាទអង្គរវត្ដ បានសម្ដែងការសប្បាយចិត្ដដោយសារការលក់ដូររបស់ពូកគាត់មានភាពល្អប្រសើរ ពីសំណាក់កំណើនភ្ញៀវទេសចរដែលមកទស្សនានៅអង្គរវត្ដ ក្នុងឱកាសថ្ងៃឈប់សម្រាកនៃពិធីបុណ្យភ្ជុំបិណ្ឌរយៈពេល ៣ថ្ងៃកន្លងទៅ។
លោក សាត មាស ក៍ដូចជាអាជីវករផ្សេងទៀតនៅខាងមុខអង្គរវត្ដ បានឲ្យដឹងនៅថ្ងៃទី២៨ ខែកញ្ញានេះថា ក្នុងអំឡុងពេលឈប់សម្រាកនៃពិធីបុណ្យភ្ជុំបិណ្ឌ រយៈពេល ៣ថ្ងៃកន្លងមកនេះ មានអ្នកទេសចរជាច្រើននាក់បានទៅទស្សនាប្រាសាទអង្គរវត្ដ ហើយពួកគាត់មួយចំនួនបានចូលទិញទំនិញ និងទទួលទានអាហារ នៅកន្លែងអាជីវករខាងមុខប្រាសាទអង្គរវត្ត។ ក្នុងមួយថ្ងៃៗ ពួកគាត់អាចលក់ដូរបានច្រើនគួរសម្យពីអ្នកទេសចរជាតិ និងអន្ដរជាតិ បើធៀបកាលពី ២ឆ្នាំមុន មានភាពខុសគ្នាឆ្ងាយក្នុងរដូវបុណ្យភ្ជុំដូចគ្នានេះដែរ ដោយសារជំងឺកូវីដ-១៩ មិនមានអ្នកទេសចរទៅទស្សនាប្រាសាទអង្គរវត្ត។ ប៉ុន្ដែសម្រាប់ឆ្នាំ២០២២នេះ គឺមានភ្ញៀវទេសចរច្រើនហួសពីការស្មាន ខណៈដែលអាជីវករនៅទីនោះរំពឹងលើភ្ញៀវទេសចរ។
ក្រុមអាជីវករបានថ្លែងអំណគុណដល់រាជរដ្ឋាភិបាល ដែលបានបើកឱ្យអ្នកទេសចរដើរកំសាន្ដឡើងវិញ ដែលអាចឱ្យសេដ្ឋកិច្ចពួកគាត់មានភាពល្អប្រសើរ បន្ទាប់ពីជំងឺកូវីដ-១៩ បានធូរស្រាល។
គួរឲ្យដឹងថា យោងតាមរបាយការណ៍របស់នាយកដ្ឋាន ទេសចរណ៍ វប្បធម៌ នៃអាជ្ញាធរជាតិអប្សរា បានបង្ហាញថា ក្នុងរយៈពេល ៣ថ្ងៃចាប់ពីថ្ងៃទី២៤ ដល់ថ្ងៃទី២៦ ខែកញ្ញា ឆ្នាំ២០២២នេះ មានអ្នកទេសចរជាតិ និងអន្ដរជាតិ ទៅទស្សនារមណីយដ្ឋានអង្គរ មានចំនួន ១១៤,៦១៦នាក់ ក្នុងនោះអ្នកទេសចរជាតិមានចំនួន ១១១,១៤៦នាក់ និងភ្ញៀវទេសចរបរទេសទិញសំបុត្រមានចំនួន ៣,៤៧០នាក់។ ចំពោះលំហូរទេសចរណ៍ចូលទស្សនាប្រាសាទអង្គរនេះដែរ បានបង្ហាញថា វិស័យទេសចរណ៍បានងើបឡើងវិញហើយ បន្ទាប់ពីអាក់ខាន ២ឆ្នាំកន្លងមកដោយសារការរីករាលដាលនៃជំងឺកូវីដ-១៩ ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
