នៅព្រឹកថ្ងៃទី២៨ ខែកញ្ញា ឆ្នាំ២០២២ មន្ទីរសុខាភិបាលខេត្តសៀមរាប បានរៀបចំកិច្ចប្រជុំប្រចាំត្រីមាសទី៣ នៃក្រុមការងារពិសេសថ្នាក់ខេត្ត សម្រាប់លុបបំបាត់ជំងឺគ្រុនចាញ់ ដើម្បីធ្វើការពង្រឹងនូវតួនាទីបន្ថែមដល់ក្រុមការងារ និងពិនិត្យ ពិភាក្សាទៅលើស្ថានភាពជំងឺគ្រុនចាញ់ក្នុងខេត្ត និងបញ្ហាប្រឈមមួយចំនួន។ កិច្ចប្រជុំនេះដែរប្រព្រឹត្តិទៅក្រោមអធិបតីភាពលោក ពិន ប្រាកដ អភិបាលរងខេត្ត និងជាប្រធានក្រុមការងារពិសេសថ្នាក់ខេត្ត ដោយមានការអញ្ជើញចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ អង្គភាព ស្ថាប័នពាក់ព័ន្ឋមួយចំនួនក្នុងខេត្ត អភិបាល អភិបាលរងក្រុងស្រុក មន្ត្រីសុខាភិបាលនៃស្រុកប្រតិបត្តិ និងមន្ត្រីនៃមណ្ឌលសុខភាពតាមបណ្តាឃុំ-សង្កាត់ ក្នុងទូទាំងខេត្ត។
បើតាមលោក ស៊ឹង រិទ្ធីរ៉េត អនុប្រធានមន្ទីរសុខាភិបាលខេត្ត បានឲ្យដឹងថា តាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា កម្ពុជាមានគោលដៅលុបបំបាត់ជំងឺគ្រុនចាញ់ នៅឆ្នាំ២០២៥ ខណៈដែលមកដល់បច្ចុប្បន្នជំងឺគ្រុនចាញ់មានចំនួនថយចុះច្រើន ជាក់ស្ដែងសម្រាប់ខែកក្កដា ក្នុងខេត្តសៀមរាប មានករណីគ្រុនចាញ់ចំនួន ៥ករណី ប៉ុន្តែសម្រាប់ខែសីហា ឆ្នាំ២០២២នេះ មានចំនួនតែ ២ករណីតែប៉ុណ្ណោះ។ សម្រាប់ស្ថានភាពនៃការឆ្លង និងឈឺដោយជំងឺគ្រុនចាញ់នៅក្នុងខេត្តនាពេលបច្ចុប្បន្ន មានភាពថយចុះជាលំដាប់។ ដូច្នេះរាជរដ្ឋាភិបាលសង្ឃឹម និងជឿជាក់ថា ការលុបបំបាត់ជំងឺគ្រុនចាញ់ ក្នុងឆ្នាំ២០២៥ ច្បាស់ជាលុបបំបាត់បានជាក់ជាមិនខាន។
លោក ពិន ប្រាកដ អភិបាលរងខេត្តសៀមរាប មានប្រសាសន៍ថា រាជរដ្ឋាភិបាលកម្ពុជា បានដាក់គោលដៅលុបបំបាត់ជំងឺគ្រុនចាញ់ប្រភេទ ហ្វាស៊ីប៉ារ៉ូម ឲ្យអស់នៅកម្ពុជា និងលុបបំបាត់ជំងឺគ្រុនចាញ់ប្រភេទវីវ៉ាក់ នៅឆ្នាំ២០២៥ ដូចនេះ យើងត្រូវពិនិត្យនិងតាមដានជាប្រចាំពិនិត្យនូវនិន្នាការនៃជំងឺ បើឃើញមានអត្រាកើនឡើងយើងត្រូវរិះរកយុទ្ឋសាស្ត្រថ្មីនិងរួមគ្នាដោះស្រាយ ដើម្បីឈានទៅលុបបំបាត់ជំងឺគ្រុនចាញ់តាមការកំណត់ប្រកបដោយប្រសិទ្ឋភាព និងទទួលបានលទ្ឋផលគាប់ប្រសើរ ដូច្នេះតាមរយៈនេះ សុំឲ្យក្រុមការងារពិសេសថ្នាក់ខេត្តសម្រាប់លុបបំបាត់ជំងឺគ្រុនចាញ់ខេត្ត ចូលរួមពិនិត្យលើការងារអនុវត្តកន្លង មករបស់យើង ថាតើនៅមានសេសសល់ចំណុចណាខ្លះ ដែលអនុវត្តមិនទាន់បានរលូន និងបានជួបបញ្ហាប្រឈម និងភាពងាយស្រួលដូចម្តេចខ្លះ គួរនាំគ្នាលើកយកបើកបង្ហាញឱ្យអស់ ដើម្បីរួមគ្នារិះរកវិធីសាស្ត្រដោះស្រាយ។
លោក ពិន ប្រាកដ បានជំរុញដល់ក្រុមការងារពិសេសថ្នាក់ខេត្ត បន្តការអប់រំពីវិធានការបង្ការជំងឺគ្រុនចាញ់ និងបំផុសលើកទឹកចិត្តចលនាចូលរួមរបស់ប្រជាជន ក្នុងការអនុវត្តសកម្មភាពលុបបំបាត់ប្រភពកកើតសត្វមូស ដង្កូវទឹក អនាម័យ បរិស្ថាន និងត្រូវស្វែងរកសេវាពិនិត្យពិគ្រោះ និងព្យាបាលជំងឺឲ្យបានត្រឹមត្រូវ ទាន់ពេលវេលា នៅមូលដ្ឋានសុខាភិបាលសាធារណៈដូចជា មណ្ឌលសុខភាព ឬមន្ទីរពេទ្យបង្អែក ដែលនៅជិតលំនៅដ្ឋានបំផុត ដើម្បីកាត់បន្ថយអត្រាឈឺ និងស្លាប់ដោយសារជំងឺគ្រុនចាញ់ឲ្យទទួលបាននូវប្រសិទ្ធភាពខ្ពស់៕
