គិតដល់ដំណាច់ឆ្នាំ២០២២ខាងមុខនេះ ក្រសួងទេសចរណ៍ព្យាករណ៍ថា ប្រទេសកម្ពុជាអាចនឹងទទួលបានភ្ញៀវទេសចរអន្តរជាតិចន្លោះពី ១លាន ៥០ម៉ឹននាក់ ទៅដល់ ២លាននាក់ ខណៈក្នុងរយៈពេល៨ខែនេះ កម្ពុជា ទទួលបានអ្នកទេសចរណ៍បរទេសប្រមាណជិត ១លាននាក់រួចទៅហើយ ទន្ទឹមនោះ ទេសចរផ្ទៃក្នុងក៏នឹងអាចកើនពី១០ ទៅ១១លាននាក់ផងដែរ។
នេះបើតាមការឱ្យដឹងពី ឯកឧត្តម សុង តុងហាប់ រដ្ឋលេខាធិការក្រសួងទេសចរណ៍ និងជាអនុប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ នៃក្រសួងទេសចរណ៍ នៅក្នុងសិក្ខាសាលា ស្តីពីការស្នើសុំអាជ្ញាបណ្ណទេសចរណ៍តាមថ្នាលបច្ចេកវិទ្យា CamDx និងការផ្សព្វផ្សាយបទដ្ឋានគតិយុទ្ធ និងវិធានការណ៍ថ្មីៗរបស់ក្រសួងទេសចរណ៍ នៅខេត្តសៀមរាប ថ្ងៃទី២៩ ខែកញ្ញា ឆ្នាំ២០២២នេះ។
ឯកឧត្តម រដ្ឋលេខាធិការ បញ្ជាក់ថា សម្រាប់វិស័យទេសចរណ៍កម្ពុជារំពឹងថានឹងងើបទ្បើងក្នុងអត្រាដ៏ល្អប្រសើរក្នុងឆ្នាំ២០២២ ក្នុងចំនួនទេសចរអន្តរជាតិពី ១,៥ទៅ២លាននាក់ និងទន្ទឹមនោះ ទេសចរផ្ទៃក្នុងពី១០ទៅ១១លាននាក់។
ជាមួយនឹងការបោះជំហាន នៃកំណើនភ្ញៀវទេសចរឡើងវិញនេះ ឯកឧត្តម រដ្ឋលេខាធិការ លើកឡើងថា រាជរដ្ឋាភិបាលបានបង្ហាញការយកចិត្តទុកដាក់ខ្ពស់ លើផលប៉ះពាល់របស់អាជីវកម្មទេសចរណ៍សរុបទូទាំងប្រទេស ដោយសម្រេចដាក់ឱ្យអនុវត្តន៍វិធានការគោលនយោបាយសេដ្ឋកិច្ច-សង្គម និងកម្មវិធីសហហិរញ្ញប្បទានស្តារ និងជំរុញកំណើនវិស័យទេសចរណ៍។ ជាមួយគ្នានេះ ការអនុញ្ញាតឱ្យជនបរទេសដែលស្នាក់នៅ និងបំពេញការងារនៅក្នុងប្រទេសកម្ពុជាចាប់ពី២ឆ្នាំឡើងទៅអាចចូលទស្សនារមណីយដ្ឋានអង្គរដោយមិនគិតប្រាក់នោះ ក៏ជាចំណែកមួយននៃកំណើនអ្នកទេសចរនេះដែរ។
ឯកឧត្តមបន្តថា បន្ថែមពីនេះ ក្រសួងទេសចរណ៍កំពុងបន្តជំរុញយ៉ាងសកម្ម ក្នុងការសម្រេចឱ្យបាននូវផែនការសកម្មភាពការងារការកែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី៣ បូក២ ឆ្នាំ២០២២របស់ក្រសួងទេសចរណ៍ ដើម្បីបន្តការកែទម្រង់ជាបន្តបន្ទាប់ឱ្យស្របតាមឌីជីថលូនីកម្ម សម្រួលដល់ការធ្វើធុរកិច្ចទេសចរណ៍ និងពង្រឹងឧត្តមភាពប្រកួតប្រជែង ឆ្ពោះទៅការងើបទ្បើងវិញឱ្យបានឆាប់នៃវិស័យទេសចរណ៍កម្ពុជា។
ក្នុងឱកាសនោះ លោក យុន លីនណេ អភិបាលរងខេត្តសៀមរាប បានលើកឡើងផងដែរថា អស់រយៈពេលជិត២ឆ្នាំដែលជំងឺកូវីដ១៩ បានរាតត្បាតនៅលើពិភពលោក ខេត្តសៀមរាប ដែលជាប៉ូលទេសចរណ៍ដ៏សំខាន់របស់កម្ពុជា ស្ទើរតែបាត់បងទាំងស្រុងនូវវត្តមានអ្នកទេសចរជាតិ និងអន្តរជាតិ និងសេវាកម្មទេសចរណ៍ក៏ស្ទើរបិទទាំងស្រុងផងដែរ។ ប៉ុន្តែក្រោមការដឹកនាំរបស់សម្ដេចតេជោ ហ៊ុន សែន ប្រមុខរាជរដ្ឋាភិបាល ដែលបានដាក់ចេញនូវគោលនយោបាយស្រោចវ៉ាក់សាំង បានធ្វើឱ្យកម្ពុជាមានឱកាសក្នុងការបើកប្រទេសឡើងវិញ។ ទន្ទឹមនេះដែរ ដើម្បីស្តារវិស័យទេសចរណ៍ រាជរដ្ឋាភិបាលកម្ពុជា ក៏បានផ្លូវ៣៨ខ្សែជូនប្រជាពលរដ្ឋក្នុងខេត្តសៀមរាប និងលើកកម្ពស់សោភណ្ឌភាពដងស្ទឹងសៀមរាប ដែលរួមចំណែកទាក់ទាញអ្នកទេសចរ បានមួយកម្រិតទៀតផងដែរ៕
អត្ថបទ និង រូបភាព៖ លោក ជា ស្រស់
កែសម្រួល៖ លោក សេង ផល្លី
