នៅព្រឹកថ្ងៃទី២៩ ខែកញ្ញា ឆ្នាំ២០២២ ក្រុមការងារក្រសួងបរិស្ថាន និង ក្រសួងរៀបចំដែនដី នគរូបនីយកម្ម និងសំណង់ បានរៀបចំសិក្ខាសាលាប្រជុំផ្សព្វផ្សាយ និងផ្ដល់ការណែនាំអំពីការគ្រប់គ្រងសំរាម សំំណល់រឹងនៅតំបន់អភិវឌ្ឍន៍ ”ភូមិធម្មជាតិរុនតាឯក” ដែលមានប្រជាពលរដ្ឋស្ម័គ្រចិត្តរុះរើលំនៅឋានចេញពីតំបន់រមណីយដ្ឋានអង្គរចូលរួមចំនួន ៣០០នាក់ មកពីភូមិទក្សិណត្បូង ភូមិទក្សិណជើង ភូមិមណ្ឌល៣ និងភូមិត្រពាំងសេះ។
ថ្លែងក្នុងសិក្ខាសាលានោះ ឯកឧត្តម ហង្ស សុតសំភារ អនុរដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ លើកឡើងថា ក្រោមការយកចិត្តទុកដាក់ពីសម្ដេចតេជោ ហ៊ុន សែន ប្រមុខរាជរដ្ឋាភិបាល បច្ចុប្បន្នភូមិធម្មជាតិរុនតាឯក បាននិងកំពុងអភិវឌ្ឍន៍ក្លាយទៅជាតំបន់រៀបចំគ្រប់ជ្រុងជ្រោយ រួមមានសាលារៀនចាប់ពីថ្នាក់បឋម រហូតដល់វិទ្យាល័យ ទីផ្សារ មណ្ឌលសុខភាព វត្តអារាម ផ្លូវថ្នល់ខ្វាត់ខ្វែង បណ្ដាញអគ្គិសនី។ល។ នាពេលអនាគតតំបន់នេះ មិនត្រឹមតែមានលក្ខណៈជាទីក្រុងប៉ុណ្ណោះទេ វាក៏នឹងក្លាយទៅជាកន្លែងទេសចរណ៍ដ៏មានប្រជាប្រិយភាព ជាមួយនិងសក្ដានុពលទីផ្សារអចលទ្រព្យផងដែរ។
ជាមួយគ្នានោះ លោកជំទាវ ចាន់ សុម៉ាលី អនុរដ្ឋលេខាធិការក្រសួងបរិស្ថាន លើកឡើងថា នាពេលខាងមុខតំបន់រុនតាឯក នឹងក្លាយជាទីប្រជុំជន ដែលត្រូវគិតគូរពីការគ្រប់គ្រងសំណល់រឹង និងរបៀបនៃការគ្រប់គ្រង។ លោកជំទាវ បន្ថែមថា សិក្ខាសាលានាពេលនេះ មានគោលបំណងផ្សព្វផ្សាយ និងណែនាំដល់ប្រជាពលរដ្ឋ យល់ដឹងពីការទុកដាក់កាកសំណល់ផ្សេងៗ ឬកែច្នៃទៅជីធម្មជាតិ បម្រើដល់វិស័យកសិកម្ម ដែលសាកសមជាឈ្មោះភូមិគំរូ ដែលមានទាំងការអភិវឌ្ឍ និងធម្មជាតិស្រស់បំព្រង។
លោកជំទាវ អនុរដ្ឋលេខាធិការ គូសបញ្ជាក់ថា ការគ្រប់គ្រង និងកែច្នៃកាកសំណល់មានប្រសិទ្ធភាព វានឹងជួយកាត់បន្ថយការចំណាយលើការទិញជីកសិកម្ម និងការចំណាយលើការប្រមូលសំរាម ស្របពេលតំបន់រុនតាឯកនឹងក្លាយជាទីប្រជុំជននៅពេលឆាប់ៗខាងមុខនេះ។
ក្នុងនោះដែរ លោកជំទាវអនុរដ្ឋលេខាធិការ ក៏បានបកស្រាយជូនប្រជាពលរដ្ឋផងដែរថា ពុំមានការកំណត់ឱ្យប្រជាពលរដ្ឋសាងសង់ផ្ទះ ស្រះទឹក ឬដាំដើមឈើដូចគ្នានោះទេ។ ជាគោលការណ៍កំណត់នេះ សម្រាប់តែការរៀបចំដីឡូតិ៍ ២៥០ទីតាំងប៉ុណ្ណោះ ប្រសិនបើប្រជាពលរដ្ឋ មានបំណងចង់រៀបចំដូចដីឡូតិ៍គំរូ ក្រសួងនឹងរៀបចំជូន ពុំមានការបង្ខិតបង្ខំដូចពាក្យចចាមអារាមឡើយ។ ដោយឡែក ចំពោះដើមឈើដែលក្រសួងបរិស្ថានបានឧបត្ថម្ភជូនប្រជាពលរដ្ឋ មានចំនួន២១ដើម ក្នុងនោះ ១៤ប្រភេទជាឈើហូបផ្លែ។
ក្នុងសិក្ខាសាលានោះដែរ លោកជំទាវ ចាន់ សុម៉ាលី បាននាំយកអំណោយ ជាថ្នាំសង្កូវ និងអាកុលលាងដៃ របស់ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ចែកជូនប្រជាពលរដ្ឋដែលបានចូលរួមក្នុងពិធីនោះ ដោយម្នាក់ៗទទួលបានថ្នាំចំនួន ៦ដប និងអាល់កុលលាងដៃ ៣ដប។
អត្ថបទ និង រូបភាព៖ លោក សេង ផល្លី
