លោកគ្រូអ្នកគ្រូបង្រៀននៅសាលាបឋមសិក្សាសម្ដេចតេជោ ហ៊ុន សែន រុនតាឯក បានសម្ដែងនូវការរីករាយបន្ទាប់ពីប្រមុខរាជរដ្ឋាភិបាលកម្ពុជា ប្រកាសបង្កើតសាលារៀនបន្ថែមក្នុងតំបន់ភូមិធម្មជាតិរុនតាឯក ស្រុកបន្ទាយស្រី រហូតដល់កំរិតវិទ្យាល័យ សម្រាប់បណ្ដុះបណ្ដាលធនធានមនុស្ស បន្ទាប់ពីសិស្សានុសិស្សបានផ្លាស់ប្ដូរសាលាចេញពីក្រុងសៀមរាប។
លោក ហ៊ីង ហ៊ីម គណៈគ្រប់គ្រងសាលាបឋមសិក្សាសម្ដេចតេជោ ហ៊ុន សែន រុនតាឯក ស្រុកបន្ទាយស្រី បានឲ្យដឹងនៅថ្ងៃទី៣០ ខែកញ្ញានេះថា ឆ្នាំសិក្សា២០២១-២០២២នេះ មានសិស្សានុសិស្សបានរៀននៅសាលារៀនេះ ចំនួនជាង ២០០នាក់ និងមានលោកគ្រូ អ្នកគ្រូបង្រៀនចំនួន ៦នាក់ ក្នុងកំរិតបឋមសិក្សា។ សិស្សនុសិស្សពួកគាត់កំពុងពេញចិត្ដនឹងក្រេបយកចំណេះដឹងនៅសាលា បន្ទាប់ពីផ្លាស់ប្ដូរទីលំនៅថ្មីចេញពីក្រុងសៀមរាប។ ចំណែកលោកគ្រូអ្នកគ្រូពួកគាត់ក៏ពេញចិត្ដនឹងការបង្រៀនសិស្សដែរ បើទោះបីពួកគាត់ជាគ្រូកិច្ចសន្យាក្ដី។
លោកបន្ដថា ការបង្កើតសាលារៀនបន្ថែមនេះ គឺជាថ្នាលបណ្ដុះបណ្ដាលធនធានមនុស្សឱ្យកាន់តែមានភាពរីកចំរើននាពេលអនាគត ខណៈបច្ចុប្បន្ន ក្នុងតំបន់ភូមិធម្មជាតិរុនតាឯក ការធ្វើដំណើរទៅសិក្សារបស់សិស្សមានភាពល្អប្រសើរ ដោយសារមានផ្លូវស្រួលធ្វើដំណើរ មានទឹកភ្លើងគ្រប់គ្រាន់ និងមានកន្លែងទេសចរណ៍ជាច្រើនកន្លែងផងដែរ។
កញ្ញា មាស សារិន គ្រូបង្រៀនក្នុងសាលាសាលាបឋមសិក្សាសម្ដេចតេជោ ហ៊ុន សែន រុនតាឯក បានសម្ដែងការរំភើបបន្ទាប់រាជរដ្ឋាភិបាល បានប្រកាសបង្កើតសាលារៀនបន្ថែមក្នុងតំបន់នេះ សម្រាប់ជាកន្លែងបង្កើតធនធានមនុស្ស នៅឃុំរុនតាឯក និងដើម្បីងាយស្រួលឱ្យសិស្សានុសិស្ស អាចទៅរៀននៅជិតផ្ទះរបស់ពួកគាត់ ទាំងសិស្សអនុវិទ្យាល័យ និងវិទ្យាល័យ។ អ្នកគ្រូបន្ថែមថា សាលារៀនសម្ដេចតេជោ ហ៊ុន សែន មានភាពស្រស់ស្អាត ផ្ទៃដីធំទូលាយ ដែលធ្វើឱ្យសិស្សានុសិស្សពេញចិត្ដនឹងការសិក្សារបស់ពួកគាត់។ ការបង្កើតសាលារៀនគ្រប់កំរិតនៅភូមិធម្មជាតិរុនតាឯកនេះ មានការពេញចិត្ដពីអាណាព្យាបាលសិស្សក៍ដូចប្រជាពរដ្ឋផងដែរ។ ប៉ុន្ដែយ៉ាងនេះក្ដី ក្រុមគ្រូបង្រៀនស្នើរឱ្យរាជរដ្ឋាភិបាលបង្កើតកន្លែងការងារ ឱ្យប្រជាពលរដ្ឋបន្ថែមទៀត ដើម្បីជីវភាពគ្រួសារ។
គួរឲ្យដឹងថា សាលាបឋមសិក្សាសម្ដេចតេជោ ហ៊ុន សែន រុនតាឯកនេះមានផ្ទៃដីជាង ៣ហិកតា ហើយបានកសាងឡើងនៅឆ្នាំ២០២០-២០២១ ខណៈដែលប្រជាពលរដ្ឋចាប់ផ្ដើមរុះរើសំណង់មិនរាបរយ នៅមាត់ស្ទឹងសៀមរាប ហើយទៅរស់នៅភូមិធម្មជាតិរុនតាឯក ស្រុកបន្តាយស្រី មកដល់ពេលនេះ មានសិស្សានុសិស្សចំនួន ២០២នាក់ និងគ្រូបង្រៀនចំនួន ៦នាក់៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
